24
1 Israelhai malsawmpek chu LALPA lawm zawng a nih ti Balaamin a hriet chun ni danga a dawi thiemna a hmang ang khan hmang ta loin thlalĕr tieng a ngha a,2 a hnam a hnama riebuk khuor Israelhai chu a hmu a. Pathien thlarau chu a chungah a hung tlung a,3 hi thu hi a hril ta a:
“Beor naupa Balaam thu,
Mita chieng taka hmu theitu thu,
4 Pathien thu hretu thu,
Iengkimthawthei inlàrna hmutu,
A hmaa bokkhup a,
A mit hung inhong tah thu chu:
5 Aw Jakob, i puon inhai a mawiin,
Aw Israel, i chĕngna hmunhai a mawi!
6 Tûm thing ang an intlar thrut a,
Va kama huon hring dup hmun,
LALPA phun thingrai hmun ang,
Va kama sidar hmun ang a nih.
7 Van ruotui dong thra’ng a ta,
Ram hnawngah thlai chi thlâk an tih.
An lal chu Agaga nĕkin ropui a ta,
An lalram chu chawisangin um a tih.
8 Aigupta rama inthoka,
Hung thruoi suoktu an Pathien chu,
An ta din ramsiel ki hrêu a nih.
Dotu hnam danghai dol hmangin,
An rŭhai vaw hâwp an ta,
An thalin kâp tlang an tih.
9 Sakeibaknei anga bokin,
Keipui angin bok zâl an ta,
Tu’n am chok tho ngam an ta?
Nangni malsawmtu chêu chu,
Malsawmin um hai sienla,
Trongsie inphurtu chêu chu,
Trongsephurin um raw se”
tiin.
10 Chu zet chun Balak lungsenna chu Balaam chungah a chok a. A kut nuoiin, “Ka hmêlmahai trongsie inphur dingin ka’n chà suok che a, voi thum rau mal i sawm ta a. 11 Tu hin suok nghal la, i in tieng fe dai rawh. Lawmman tam tak pek che ka tum vei leh LALPAN i lawmman hmu ding a dâl si che a” a ta.
12 Balaam chun Balak kuomah, “I mi hung tirhai kha ka lo hril a ni naw am a ni? 13 ‘Balakin tangkaruo le rangkachaka sip a lal in khom mi pe ding ni sien, LALPAN thu a mi pĕk băk chu keima chun ieng khom, a sie a thra, ka thaw thei nawh, LALPA mi hril chauh ka puong thei a nih’ ti ka lo hril tawl kha. 14 Tu hin ka mihai kuom tieng ka kir nawk ding a ni ta a, sienkhom la hung vak rawh, hieng mihai hin tuta hnunga i mihai chunga an la thaw dan ding hang hril ka ti che” a ta.
Balaam hrillawk voi lina
15 Chuongchun, Balaam chun hieng thu hi a hril a:
“Beor naupa Balaam thu,
Mita chieng taka hmu theitu thu,
16 Pathien thuhai hretu thu,
Iengkimthawthei inlărna hmutu,
A hmaa bokkhup a,
A mit hung inhong tah thu chu:
17 La hung ding mi chu ka hmu a,
La hnâi si lo mi chu ka hmuh.
Jakob a’nthok arasi hung suok a ta,
Israel a’nthokin lal hmol suok a tih.
Moab lu bŭr chu vaw hâwp a ta,
Seth nauhai lu rŭ po po khom.
18 Edom chu tukdol a ta,
A hmêlma Seir chu hne’ng a tih.
Israel ruok chu hrât pei a tih.
19 Jakob a’nthok rorêltu hung a ta,
Khuoa la um sunhai sukbo a tih”
tiin.
Balaam hrillawkna nuhnung tak
20 Chu zoah Balaam chun Amalek a hmu a, a thu chu a puong a:
“Amalek chu hnam hmasa tak a na,
Sienkhom a tawpah hung sieng a tih”
tiin.
21 Chu zoah Ken mihai a hmu a, a thu chu a puong a:
“I chĕngna hmun a him,
Lungpuiah bu i sep;
22 Sienkhom Kenhai chu suksiet ni’ng in ta,
Asuria-haiin salah thruoi an ti chêu”
tiin.
23 Chu zoah hi thu hi a hril nawk a:
“Chuong chu Pathienin a thaw phâ,
Tu am dam zo ta’ng an ta?
24 Kitim a’nthok long hung an ta,
Asur le Eber tukdol an ta,
Anni khom tlu se vong an tih”
tiin.
25 Chun, Balaam chu a tho a, a in tieng a kir nawk a, Balak khom chun a fena ding tieng a pan ve ta a.