Balaam hrillawkna hmasa tak
23
1 Balaam chun Balak kuomah, “Hi taka hin maichăm pasari mi bawlpek la, bawngchal pasari le beramchal pasari mi buotsaipek bok rawh” a ta. 2 Balak chun Balaam hril ang chun a thaw a, an pahni chun maichăm pakhat peiah bawngchal le beramchal an inhlăn a.3 Balaam chun Balak kuomah, “I thilhlân bula hin lo ngir zing la, kei chu va fe hrang ka ta, mi be dingin LALPA a hung el thei a, ka kuoma a puong taphot chu hril ka ti che” a ta. Chuongchun, tlâng kol vungah a hang fe a. 4 Pathienin Balaam chu a lo inhmupui a. Balaam chun, “Maichăm pasari ka buotsai a, maichâm tinah bawngchal le beramchal ka’n hlàn a nih,” a ta.
5 LALPA chun Balaam bauah thu a sie a, a kuomah, “Kir nawk ta la, hi thucha hi Balak kuomah hril rawh,” a ta. 6 Chuongchun a kîr nawk a, maichăm sira chun ama le Moab mi lienhai po po chu an lo ngîr a. 7 Balaam chun hrillawkna thu chu a puong suok ta a:
Arama a’nthok Balakin a mi hung thruoi,
Sak tlâng rama Moab lal chun;
‘Hung la, Jakob sungkuohai chu
Ka ta din trongsie inphur la,
Israel chu hnawl hmang rawh’ tiin.
8 LALPAN trongsie a’n phur naw chu,
Ieng tin am inphur thei ka ta?
LALPAN a hnăwl si lo hai chu,
Ieng tin am hnâwl thei ka ta?
9 Lungpui chunga inthokin ka hmu a,
Tlang sîpa inthokin ka thlir tawl:
Anni chu hnam tla hrang an na,
Hnamhai laia thrang sa ve-ah,
An inngai vè hrim hrim nawh;
10 Jakob thla pilvut zat hiel chu,
Tuin am tiem zo thei an ta?
Israelhai hmun lia threa hmun khat khom,
Tu in am inchik zo se’ng an ta?
Mi fel thiin mi’n thitir rawh,
An tawpna anga tawp ve ka nuom!”
tiin.
11 Balak chun Balaam kuomah, “I mi thaw dan hi ieng tizie am an ta a? Ka hmêlmahai chu trongsie inphur dingin ka hung inthruoitir che a, chuong chu thaw ta nêkin mal i sawm ta hlauh lem a!” a ta. 12 Balaam chun, “LALPAN ka băua thu a sie chu ka hril suok naw dim a ni?” tiin a don a.
Balaam hrillawk voi hnina
13 Balak chun a kuomah, “Hmun dangah fe’ng ei ta, chu taka inthok chun hmu thei tawl i tih. An umna chin po po hmu thei i ta, an rêng chun hmu vong kher naw ti nih. Chu taka inthok chun trongsie i mi’n phurpek ding a nih” a ta. 14 Pisga tlàng sìpa khawthlirna Zofim-a chun a thruoi a, chu taka chun maichăm pasari a siem a, maichăm tina chun bawngchal le beramchal a’n hlàn seng a.
15 Balaam chun Balak kuomah, “Saw laia LALPA ka va biek karin i thilhlân bula hin lo um rawh” a ta. 16 LALPA chun Balaam chu a’n hmupui a, a bauah thu a sie a, “Kir nawk ta la, Balak kuomah hi thucha hi hril rawh,” a ta. 17 Chuongchun a kîr nawk a, maichăm sîra chun ama le Moab mi lienhai po po chu an lo ngǐr a. Balak chun, “LALPA chun iem a hril che leh?” a ta. 18 Chuongchun, a hrillawkna chu a puong ta a:
“Balak, tho la, ngaithla rawh,
Zipor naupa, ka thû ngai rawh;
19 Pathien chu mihriem a ni naw a,
Khêl a hril ngai hrim hrim nawh;
Mihriem nauhai anga lungril,
Thlâk el hlak mi a ni nawh.
Hrila thaw si lo a ni?
Thu tiem hlen ngai lo a ni?
20 Malsawm di’n thu ka hmu a,
Mal a sawm ta sa an na,
Keiman ka thlakthleng thei nawh.
21 Jakob ta din sietna ka hmu nawh,
Israel ta din buoina ka hmu nawh;
LALPA an Pathienin a umpui a,
Anni lai Lal rawl a’n ri zing;
22 Pathienin Aiguptaa inthokin,
Anni chu a hung thruoi suok a,
Ramsiel anga tha hrât an nih;b
23 Jakob chu dăwi hnè ruol lo,
Israel chu âi ieng ang khoma,
Hang ngam ruol ding a ni nawh.
Jakob le Israel chungthua chu,
‘Pathienin a va thawpek nasa de!”,
Ti hi mihai hril tak ni’ng a tih.
24 Ngaituo ta u, hi hnam hi,
Keipui angin a hung tho a,
Sakeibaknei angin a zuonzăng;
A sa se a fak zo hma chun,
A thisen a liek kawl hma chun,
Chawlin bok nawk ngai naw nih”
tiin.
25 Balak chun Balaam kuomah, “Trongsie i’n phur dèr naw a ni khomin mal te hlek khom mal chu sawmpêk lul naw rawh” a ta. 26 Balaam chun, “LALPA hril ang ang chu ka thaw ding a nih ti ka hril ta che a ni naw am a ni?” tiin a don a.
Balaam hrillawk voi thumna
27 Balak chun Balaam kuomah, “Hung rawh, hmun dangah thruoi nawk ka ti che, chu taka inthok chun trongsie i mi’n phurpek Pathienin a remti hlauh tăkah” a ta. 28 Balak chun thlalĕr zuk thlir theina Peor tlang sîpa chun Balaam chu a thruoi a.