Thiempuhai mawphurna
18
1 LALPA chun Aron kuomah, “Nang le i naupahai le Levi chihai hin Hmun Thienghlima bawsietna maw chu phur in ta, thiempuhai bawsietna maw ruok chu nang le i naupahai chauin phur in tih. 2 Nang le i naupahaiin Thuthlung Puon in hmaa rong in bawl phaa in bula khawsaa thrangpuitu ding chêu in laibunghai, Levi chia mihai chu hung thruoi rawh. 3 I hnuoiah thok an ta, Puon ina mawphurna sin po po thawng an ta, Hmun Thienghlima bûr le bĕl le maichăm ruok chu an tawk ding a ni nawh, nang le anni in thi nawna dingin. 4 Nang leh inthlopin, Puon in enkol tieng sin po poah maw phur an ta, an sin chu anni ngeiin ching fel an ta, puo tieng mi tu khomin an hung hnai ding chĕu a ni nawh.5 “Israelhai chungah lungsenna a tlăk ta nawna dingin nangin Hmun Thienghlim le maichăm enkol sinah maw i phur ding a nih. 6 Keima ngeiin i Levi chanpuihai hi Intuokna Puon ina rong bawl dingin Israelhai laia inthokin ka thlang suok a, ka’n ser thienghlim a, i ta dinga ka thilthlawnpĕk an nih. 7 Chun, maichăma le puonzar sûng tienga rongbawlna thua chu nang le i naupahai chauin thiempu sin in thaw ding a nih. Thiempu nina sin hi a thlăwna ka pĕk chê a nih. Mi dang tu khom Hmun Thienghlim hung hnaitu chu sukhlum ni’ng an tih” a ta.
Thiempuhai chan
8 Chun, LALPAN Aron a biek a, “Ngai ta, ka kuoma thĕn thilhlân an hung chawi po po enkoltuah kei ngeiin ka ruot che a; Israelhaiin thil thienghlim an hung inhlăn po po chu nang le i naupahai kumkhuo chanpuola dingin ka pêk cheu. 9 Maichama thilhlân thienghlim tak, bu le bâl thilhlân hai, suol ngaidamna thilhlân hai le thiem naw ngaidamna thilhlân hai laia maichăma raw mahla po po chu in chan ding a nih. 10 Chuong ang sa serh chu Hmun Thienghlima ngei pasal chauin in fak ding a nih; in ta dingin thil thienghlim a ni si a.
11 “Hi khom hi in chanpuol a nih: thĕn thilhlâna Israelhaiin thilpêk an hung inhlănhai laia sie hranga um po po chu nang le i naupahai le naunuhai chanpuol ni rop dingin ka pêk che a, in sungkuoa porchĕna kai lo poin fa thei in tih.
12 “LALPA kuoma an tharsuok ra hmasa an inhlăna inthoka oliv hriek thra tak, uoiin thar inhnik tak le bu le bâl thra tak hai po po chu ka pêk che. 13 A ram tharsuok hmasa tak LALPA kuoma an hung chawi po po chu i chan a nih. In sungkuoa porchèna kai lo poin fa thei in tih.
14 “Israel rama thil hrim hrim LALPA kuoma an hung inhlăn chu i chan a nih. 15 LALPA ta dinga an pĕk, sul kêu hmasa tak taphot chu, mihriem ni sien, ran ni sien, i chan a nih. Amiruokchu, nau pasal pieng hmasa tak le ran thienghlim lo tè pieng hmasa tak phot chu i’n tlan ngei ding a nih. 16 Thla khat a tling pha intlanna man tuk zât, Hmun Thienghlima hmang tangkaruo sekel ngain i’n tlan ding a nih. Sekel khat chu gera sawmhni a nih.
17 Amiruokchu bawngchal le beramchal le kelchal pieng hmasa tak chu ran thienghlim an ni leiin intlan ding a ni nawh; an thisen chun maichàm thè la, an thău chu meia thilhlânah raw rawh, chu chu LALPA ta dinga rim inhnik a ni si a. 18 An sa chu i chanpuol ding a nih, thĕn thilhlâna inhlăn, a ir le a chang tieng malhai chu i chanpuol a ni ang bok khan. 19 Israelhaiin thil thienghlim LALPA kuoma an inhlănhai po po laia ser hrang po chu nang le i naupahai le i naunuhai chanpuol ni rop dingin ka pêk che. LALPA hmaa nang le i thlahai ta dinga kumkhuoa machi thluthlunga a nih,” a ta.
20 LALPA chun Aron kuomah, “An rama hin rochan nei naw ti nih; anni lai chanvo nei bok naw ti nih. Israelhai laia i chanvo le rochan chu keima hi ka nih.
Levi thlahai chan
21 “Intuokna Puon ina rongbawltu an ni leiin Israelhai sawmapakhat po po chu Levihai rochan dingin ka pêk a nih. 22 Tuta inthok chun Israel thlahaiin Intuokna Puon in hi an hung hnai ding a ni ta nawh, chuong naw chun an suol maw phurin thi hlauh rawi an tih. 23 Intuokna Puon ina rongbawl sin chu Levihaiin thaw ta’ng an ta, bawsietna maw iengkim chu phur ta’ng an tih. Hi hi in thlahai chen khoma ka kumkhaw thupĕk chu a nih. Israelhaia inthokin rochan nei naw ni hai. 24 Chu aia an rochana ka ruotpĕk chu LALPA kuoma Israelhai sawmapakhat inhlăn po po chu a nih. Chu lei chun an nawm anni chungthuah, ‘Israelhai lai rochan nei naw ni hai’ ka lo ti hrim kha” a ta.
25 LALPA chun Mosie a biek a, 26 “Levihai inbiekpui la, an kuomah hieng hin hril rawh: ‘In rochan dinga Israelhai sawmapakhat ka pĕk chêu chu an laka inthoka in dong pha chun, chu sawmapakhata inthoka sawmapakhat chu LALPA ta dingin in inhlăn ding a nih. 27 In thil inhlăn chu hrizawla bu thar hmasa tak le uoiin sawrna khura uoiin suok thar hmasa tak anga ngai ning a tih. 28 Chuong anga Israelhai laka sawmapakhat in dong po poa mi chu LALPA ta dingin in inhlăn ve pei ding a nih. Chu thilhlâna LALPA chanpuol po chu Aron in pĕk ding a nih. 29 In thil dong laia a thra tak le thienghlim tak pei chu LALPA chan dingin inhlăn ro’.
30 “‘Chun, Levihai kuomah hieng hin hril bok rawh: In thil nei laia a thra tak in inhlàn chun in hrizawl le uoiin sawrna khura inthoka hung suok anga ngai ni’ng a tih’ tiin. 31 Nang le i sungkuohaiin khaw lai khom fa thei in tih, Intuokna Puon ina in sinthaw hlaw a ni si a. 32 A thra tak in inhlàn chun hieng thila hin thiem naw chang ngai naw ti niu a, Israelhai thilhlân thienghlim chu sukporchè ngai nawng in ta, thì phà naw bok in tih” tiin.