Aron hmol inder
17
1 LALPA chun Mosie kuomah, 2 “Israelhai inbiekpui la, an sungkuoa pahnam tin thruoitua inthokin hmol sawmpahni la khawm la, hmola chun a neitu seng hming ziek rawh. 3 Levi hmolah Aron hming ziek la, pahnam tin ta dingin hmol pakhat pei a ni ding a nih. 4 Intuokna Puon ina ka’n tuokpuina hlak che Thuthlung Bawm hmaah hmolhai chu intung rawh. 5 Ka mi thlang hmol chu hung inder a ta, Israelhaiin an chier khum zing zingna chè hi keiin ka sukrè ding a nih” a ta. 6 Mosie chun Israelhai chu a’n biekpui a, an thruoituhai chun hmol sawmpahni an pêk a, hmol pakhat chu pahnam lu peia ding a na, Aron hmol khom chu an hmol lai chun an inthrangtir a. 7 Mosie chun hmolhai chu Thuthlung Puon ina chun LALPA hmaah a sie a.
8 Zingkar chun Mosie chu Thuthlung puon ina chun a va fe a, Levi sungkuo aiawtu Aron hmol chu a lo inder chauh khom ni loin a kumŭm a, a păr a, ruon a lo ra a. 9 LALPA kuoma inthokin hmolhai chu Israel pungkhawm po po hmaa chun Mosien a hung chawi suok a, an en a, mani hmol seng chu an lăk nawk a.
10 LALPA chun Mosie kuomah, “Thuthlung Bawm hmaah Aron hmol kha va sie nawk rawh. Hieng helhmang nauhai hi ka chunga an chier sukrèna ding le an thi phà nawna dinga inhriettirtu dingin sie zing rawh” a ta. 11 LALPA thupĕk angin Mosie chun a thaw a.