4 Chu chu Mosien a hang hriet chun bokkhupin a trongtrai a. 5 Kora le a pawlhai kuoma chun, “Zingah zingkâr leh tu am ama mi, tu am a thienghlim ti LALPAN inentir a ta, chu mi chu ama hnaia hung dingin ko a ta, ama hnaiah inumtir a tih. 6 Kora, nang le i hnung zuituhai thaw ding chu hi hi a nih: mei lakna berbu chawi ro; 7 chu taka chun meiling sie unla, LALPA hmaah rimtui phul ro. LALPAN a thlang tak chu mi thienghlim ni’ng a tih. Nangni Levi thlahai hi in nih insukngèng taluo chu!” a ta.

8 Mosie chun Kora kuoma khom, “Nangni Levi thlahai, ngaithla ro. 9 Israelhai Pathien chun LALPA biekbŭka rong bawl a, mipuihai hmaah ngîra an rong bawl dingin Israel mipuihai laia inthokin a lâk hrang chêu a, a bulah a sie chêu hi in ta dingin huntawk in la ti naw rop a ni maw? 10 Nangni le in chipui Levihai chu ama bul hnaiah a’n umtir chêu leiin tuhin thiempu nina chen khom inchŭ thlâk in tum a ni maw? 11 Nang le i hnungzuituhai po po hi LALPA dodal zawnga inthuruol in nih. Aron hi tu am a na, hienga a chunga in chier hi?” a ta.

12 Mosie chun Eliaba nauhai, Dathan le Abiram chu a’n kotir a Anni chun, “Hung naw ning ungah. 13 Nenetui le khuoizu luongna rama inthoka thlalèra mi that vong dinga i mi thruoi khom hi huntawk i la ti naw a ni maw? Tu hin kan chungah insuklal i tum nawk nghal a! 14 Chu chauh chu a ni le, nenetui le khuoizu luongna ramah i mi thruoi naw a, lo le grêp huon hai kan rochung ding i mi pêk bok nawh. Hieng mihai mit hi i khel dokpek vong tum a ni? Keini chu hung naw top kan tih” an ta.

15 Mosie lung chu a sen hle a, LALPA kuomah, “An thil inhlàn lo pom naw rawh. Anni laka inthokin ieng khom ka lâk nawh, sabengtung takngiel khom; tu poi khom ka tawk bok nawh” a ta.

16 Mosie chun Kora kuomah, “Nang le i hnung zuituhai chu, nang le anni le Aron leh zingah zing tieng LALPA hmaah in hung inlang ding a nih. 17 Mi tinin mei lăkna berbu chawi seng ro, a rêngin zahni sawmnga a ni kha, chu taka chun meiling sie unla, rimtui phul inla, LALPA hmaah hung chawi ro. Nang le Aron khomin in mei lăkna chu in hung chawi ding a nih” a ta. 18 Mi tin chu mani mei lăkna seng chawiin, mei siein, rimtui phulin, Intuokna Puon in kota chun Mosie le Aron leh an va ngir a. 19 Intuokna Puon in kota anni khingtu Kora le a hnung zuituhai po po an hung inkhawm chun LALPA ropuina chu pungkhawm po po hmaah a hung inlang a.

20 LALPA chun Mosie le Aron kuomah, 21 “Pungkhawmhai laia inthok hin insie kieng ro, thâwk le khata ka sukhlum vong theina dingin” a ta. 22 Mosie le Aron ruok chu an bokkhup a, “Aw Pathien, nang chu mihriem hringna po po hnăr i na, mi pakhat suolna leiin pungkhawm po po chungah i lung a sen el di’m a nih?” an ta. 23 Chu phing leh LALPA chun Mosie kuomah, 24 “Pungkhawmhai hi hril la, Kora le Dathan le Abiram hai umna riebukhai chu inkiengsan vong raw hai se” a ta.

25 Mosie chu a tho a, Dathan le Abiram hai kuoma chun a fe a, Israel upahai chun an zui a. 26 Pungkhawmhai kuoma chun, “Hieng misuolhai puon ina inthok hin suok vong ro. An thil ieng khom tawk naw ro, an suolna chun fen hmang ve hlauh rawi a ti cheu” tiin a hril a. 27 Kora le Dathan le Abiram hai puon ina inthok chun an suok ta sup sup a. Dathan le Abiram khom chu an hung suok a, an puon in kotkhara chun an nuhmeihai, an nauhai le nautehai leh chun an ngǐr a.

28 Mosie chun, “Keima lungril puok suoka ka thaw a ni nawzie le hieng thil hi thaw dingin LALPAN a mi tir a nih ti hi thila hin hrieng in tih. 29 Hieng mihai hi mi thi dăn pangngaiin an thi a, mi po po thil tuok anga an chunga hung tlung ve a ni chun Pathienin a mi tir nawh ning a tih. 30 Amiruokchu, LALPAN thil thar danglam tak thaw a, hnuoiin a bău ka a, anni le an thil nei po po lem zo a, a hringa Seola an lut ruok chun, hieng mihai hin LALPA an lo ngainĕp a nih ti hrieng in tih” a ta.

31 Chuong thil chu a hril zo charin, an umna hnuoi chu a hung kak a, 32 hnuoi chun a bău a ka a, Kora le a sungkuo le an thil nei po po chu a lem ta vong a. 33 An thil nei po po le chun a hringin Seolah an lŭt a; hnuoi chun a bau a’n chǐp khum a, pungkhawmhai laia inthok chun an boral tah a nih. 34 An khĕk ri an hrietin, an kawl vela Israelhai chun, “Eini khom hnuoiin mi lem ve palh a tih” tiin an tlàn dar chum chum a. 35 LALPA-a inthokin mei a hung suok a, rimtui inhlàntu mi zahni le sawmnga chu a kang hlum ta vong a.

36 LALPA chun Mosie kuomah, 37 “Meilinghai kha hla deu hlekah thâi dar la, thiempu Aron naupa Eleazar khan kang hlumhai mei laknahai kha rût khawm raw se, a rênga ser thienghlim a ni ta si a. 38 Anni ngei hringna chunga suolhai meilakna hai kha sut phêk la, maicham chung inkhum thuona dingin ser rawh; LALPA kuoma inhlàn ta sa a ni leiin thil thienghlim a ni tah. Hi hi Israelhai ta dinga inchikna ni’ng a tih” a ta.

39 Thiempu Eleazar chun kang hluma um hai mei lakna dar berbu chu a lak khawm a, maicham inthuona dingin a phêkin a’n suttir a, 40 LALPAN Mosie a hril ang takin a thaw a. Hi hi Aron thlahai chauh naw chu LALPA hmaah rimtui raw dingin an hung ding a ni nawh ti inhriettirna ding a nih, chuong naw chun Kora le a hnung zuituhai ang hung ning an tih.

41 A zinga chun, “LALPA mihai in that” tiin Israel mipuihai chu Mosie le Aron chungah an chier a. 42 Mosie le Aron khinga mipui inhawr khawmhaiin Intuokna Puon in tieng an nghat lai chun sûmin Intuokna Puon in chu a hung bawm a, LALPA ropuina a hung inlang a. 43 Mosie le Aron chu Intuokna Puon in kota chun an fe a. 44 LALPA chun Mosie kuomah, 45 “Thawk le khata ka sukhlum vong theina dingin pungkhawmhai laia inthok hin inthier hmang ro” a ta. Anni chu an bokkhup a.

46 Mosie chun Aron kuomah, “I mei lakna kha chawi la, rimtui sie la, maichàma mei la bok la, inrang takin mipui tieng pan la, an ta dingin inremna siempek rawh. LALPA lungsenna a hung suok a, hripui a’n lèng tran a nih” a ta. 47 Aron chun Mosie hril angin a thaw a, mipui lai chun a tlân lŭt a. Hripui chu a’n lèng tran tah a, sienkhom Aron chun rimtui rawin an ta dingin inremna a siempĕk a. 48 A thi le a damhai inkara chun a ngîr a, hripui chu a’n kieng ta a. 49 Chuong sa khom chun, Kora leia thihai băkah mi 14,700 chu hripui chun a that hman a nih. 50 Hripui chu a’n kieng ta leiin Aron chu Mosie kuomah Intuokna Puon in kota chun a kir nawk a.