Miriam le Aronin Mosie an kalh
12
1 Mosie chun Kush mi nuhmeia a nei leiin Miriam le Aron chun an hrilsiet a. 2 “Mosie kuoma chauh maw LALPAN thu a hril bik chu? Keini kuoma khom a hril naw am a ni?” an ta. Chu chu LALPAN a lo hriet a. 3 Mosie chu pa inngaitlawm tak el, hnuoi chunga mi po po laia zaidam chungchuong a ni a. 4 LALPA chun Mosie le Aron le Miriam kuomah, “Hung suok unla Intuokna Puon inah mi hung hmu ro” a ti thut el a. Chuongchun, an pathum chun an va fe a. 5 LALPA chu sûm ngirin a hung trum a, Puon in kotkhara chun a ngîr a, Aron le Miriam chu a ko a, an pahni chun an hung suok a. 6 An kuoma chun,
“Ka thu hi ngaithla ro:
Nangni lai LALPA zawlnei a um chun,
A kuomah inlârin keima ka’n hriettir a,
Mangah ka biek hlak a.
7 Ka siehlaw Mosie laka ruok chu,
Chuong ang chun ka thaw ve nawh.
Ka sungkuo po po laka mi ringum a nih.
8 Hmai intuoin, fie takin,
Thu khir hmang loin ka biek hlak.
LALPA riruong khom hmu tah a nih.
Ieng leia ka siehlaw Mosie hi,
In soisel ngam hrim hrim am a na?
a lo ti a.
9 LALPA chu an chungah a lung a sen hle a, a fesan tawl tah a.
10 Puon in chunga sûm a hung inkieng chun, ngai ta, Miriam chu vûr anga vârin a lo inphăr ta vong a. Aronin a hang en chun a’n phâr vong tah ti a hmu a. 11 Aron chun Mosie kuomah, “Aw pu, invêtthlâk taka suol kan lo thawna kha kan chungah intlâktir lul naw rawh. 12 A nu sula inthoka naute thi sa hung pieng, a vun zûr zo tah, dâng hlâwp hlâwp ang ĕm chun inumtir lul naw rawh” a ta.
13 Mosie chun LALPA a ko a, “Aw Pathien, sukdam hrâm raw khai” tiin a ngĕn a. 14 LALPA chun Mosie kuomah, “A pain a naunu hmaia chil a sakkhum ngot khom ni sari sung chu inzak a phur a ni naw am a ni? Khawhnăwmah ni sari sie hmang inla, chu hnung chun riebûkah la lût nawk thei in tih” a ta. 15 Miriam chu riebûk puo tieng ni sari sŭng an sie a, an thruoi lut nawk hma chun mipui chu an inson nawh. 16 Chu hnunga chun mipuiin Hazerot chu an suoksan a, Paran thlalĕrah umhmun an khuor a.