4 Anni laia hnam dang inzêl ve pei hai chun bu dang an chăk leiin Israelhai khom chun, “Tuin am sa fàk ding a mi pek ding a na? 5 Nuom nuoma Aigupta rama nga ei hmè hlak lai hun kha ei hriet zing a, fanghma dam, vaifanghma dam, purŭn bulbàl dam, purŭn sen dam le purŭn vàr dam ei hmè hlak lai hun kha. 6 Tu ruok hin chu bu châkna hlak a rê dĕr a, mana chauh naw hlak chu hmu khur ei nei ta si nawh!” tiin an inhrăwt tran a.

7 Mana chu maruoi mu anga vâr sar el, thing hnài anga entlang thei a nih. 8 Mihai chun an va rŭt khawm a, a rawt nawinaah an rawt nawi naw leh sumah an suk nawi a, bêlah an suong a, bei damin an siem a, a’n hnik dan chu oliv hrieka bei zĕu ang a nih. 9 An riebŭk hmuna zăna daidaw a tlăk pha mana chu a tla sa ve hlak a nih.

10 Sungkuo tin el chu an puon in tuolah an trap khĕk ti Mosien a hriet a. LALPA chu nasa takin a lung a sen a, Mosie khom a lungni naw a. 11 LALPA kuoma chun, “I siehlaw chungah hi buoina hi ieng leia i hung intlun am a na? I lawm naw zawng ieng am ka thaw a, mipui phurrik po po ka chungah i’n nghat el hi? 12 Hieng mipuihai hi naua paia ka hring tawl am an ni? An pi le puhai kuoma inkhâma pĕk i tiem rama chun nau pomtuin naute a pom anga pom tlung tawl dingin ieng dinga i mi ti am a na? 13 Hieng mipuihai fàk ding hi khaw laia inthokin am sâ chu hmu ta’ng ka ta? ‘Sâ mi pe rawh’ tia an mi’n hrăwt khum hlak hi a rê top si nawh. 14 Keima ringot chun hieng mipuihai hi ka phur zo naw a nih; ka ta dingin a rik taluo. 15 Hieng hi i mi thaw dan ding a ni chun tu hin mi sukhlum nghal el rawh; i mit ka tlung a ni ruok chun, ka sietna ding mi’n hmasuontir lul naw rawh” a ta.

16 LALPA chun Mosie kuomah, “Israel mipuihai laia hotu le enkoltu nia i ngai upa sawmsari hung ko khawm la, ka hmaa nang leh ngìr tlâng dingin Intuokna Puon inah hung thruoi tawl rawh. 17 Hung trum ka ta, inbiekpui ka ti che a, nangmaa um Thlarau kha lain an chungah Thlarau chu sie ve’ng ka ta, mipui phurrik chu nangma chaua phur ta loin anni chun phurpui ta’ng an ti che.

18 “Mipui chu hieng ang hin hril rawh: ‘Zinga sa in făk huna dinga insingsain insukthieng ro. ‘Sa fàk ding tuin am mi pe ta’ng a ta? Aigupta rama khan ei hnienghnâr vei leh!’ tia in inhrăwt ri kha LALPAN a hriet tah. Sa chu LALPAN pe’ng a ti chêu a, fa mol in tih. 19 Ni khat chauh amanih, ni hnih, ninga, ni sawm le ni sawmhni chauh amanih fa loin, 20 thla khat pumhlûm top, ngei rak khop le luok suok rak khopin fa’ng in tih, nangni laia um LALPA chu hnawl a, ‘Ieng leia Aigupta kha ei suoksan am a na?’ tia a hmaah in inhrăwt leiin’ ti rawh” a ta.

21 Mosie chun a kuomah, “Hi taka ka mi thruoihai hi mani kea fe thei ringot khom nuoi ruk an ni a, ‘Thla khat pumhlûm fàk ding sa pe’ng ka ti chêu’ i ta, 22 bawng ruol le beram ruol khom hi that vong inla, an fàk khop a dai ding am a ni? Tuipuia nga khom man ta vong inla, an fak khop a tling ding maw?” a ta. 23 LALPA chun Mosie kuomah, “LALPA băn a tâwi taluo a ni? Ka hril anga i chunga a tlung le tlung naw tu hin hmu’ng i tih” a ta.

24 Chuongchun Mosie chu a suok a, LALPA thu chu mipuihai a hril a. Upa sawmsarihai chu a ko khawm a, Puon In chu an ngǐr huol a. 25 LALPA chu sûma chun a hung trum a, Mosie chu a biek a, amaa Thlarau a sie chu lain upa sawmsarihai chunga chun chu Thlarau chu a sie a, an chunga Thlarau a um char chun thu an hril duol duol a, sienkhom chuong ang chun a hnungin an thaw nawk ta ngai nawh.^a

26 Anni upahai laia tiem sa, Eldad le Medad hai ruok chu Puon Inah fe ve loin an riebŭkah an um a, chuong sa khom chun thlarau chu an chungah a um ve a, riebûka chun thu an hril ve mol mol a. 27 Tlangval pakhat chu a tlân a, Mosie kuomah, “Eldad le Medad-in riebŭkah thu an hril mol mol el” tiin a va hril a. 28 Nuna naupa Josua, a tleirawl laia inthoka Mosie kaiza vengtua thrang tah chun, “Pu Mosie, khap tawl rawh” a ta. 29 Mosie chun, “Keima leiin i thîkthu i lo suksiet vieu a ni maw? LALPA chun a thlarau mi po po pe sien, zawlnei ni vong hai sien ka ti năk lai a!” a ta. 30 Mosie le Israel upahai chu riebŭk tieng an kǐr nawk a.

31 LALPA chun thlî a’n hrăngtir a, tuipuia inthokin vamìm ruol chu a hung lĕn khăwm a, an riebŭk sîr tina ni khat lam dâpin vamìm chu feet thum vela sain a hung intlăktir a. 32 Chu nî le a zăn le a zînga chen chun mipui chu fe suokin vamìm chu an rŭt khawm a, a rût tlawm tak khomin kilogram sâng chuong a rût a, riebŭk sîr tina chun nisaah an inhro thluk a. 33 Sa an fàk lai zing, an la lem zo hma chun LALPA lungsen a hung inling a, mipuihai chu hripui nasa takin a hrem a. 34 Sa inrăwp leia thihai chu chu taka chun an phŭm leiin a hmun hmingah Kibrot Hatava an inbŭk a. 35 Kibrot Hatavaa inthok chun Hazerot an pan a, chu taka chun riebûk khuorin an chăm a.