Nazar intiemkamna
6
1 LALPA chun Mosie kuomah, 2 “Israelhai kuomah hieng ang hin hril rawh: ‘Tu khom pasal amanih nuhmei amanih intiemkamna bik nei, LALPA ta dinga inser hrang dinga Nazara thutiem nei lai chun inrui thei uoiin le zu dang hrim hrim a nghei ding a nih; 3 uoiin amanih thil danga inthoka siem zu thûr hrim hrim amani le grêp ra tui khom a dawn ding a ni naw a, grêp ra tharlâm amanih le grêp ra inhro trawl khom a fâk ding a ni nawh. 4 Nazarin thutiem neia a’n ser hrang lai chun grêp huona mi hrim hrim, a mû le a hâwng takngiel khom a fâk ding a ni nawh.5 “‘Thu tiema a’n ser hrang sung chun a lu-ah hmul vawna hrim hrim a hmang ding a ni nawh. LALPA ta dinga a’n ser hrang sung hun a kim hma chun insie hrang a ta, a sam a hlà ding a nih. 6 LALPA ta dinga a’n ser hran sung po chun mithi ruong a hnaih ding a ni nawh. 7 A nu le pa le a unauhai le farnuhai thi khomin a’n sukporchè ding a ni nawh, Pathien ta dinga a’n ser hrangna chun a phuor leiin. 8 A’n ser hran sung po chun LALPA ta dinga ser thienghlim a nih.
9 “‘A bula mi thi thut ruongin a sam a tawk pala a sukporchè chun, inthienna dingin ni sari nghâk a ta, a sam chu vaw kol vong a tih. 10 A ni rietnaa chun Intuokna Puon in kotah vathrû amanih parva tuoi amanih tuok khat thiempu kuomah a hung chawi ding a nih. 11 Pakhat chu suol ngaidamna dingin thiempu chun inhlàn a ta, pakhat chu mithi ruong leia a suolna laka inremna siempek dingin pumraw thilhlânah inhlàn a tih. Chu ni ngei chun a lu chu inhlàn thienghlim a tih. 12 Thiem naw ngaidamna thilhlâna dingin beramchal tuoi, kum khat mi hung chawiin LALPA kuomah inser hrang thra nawk a ta, a hmaa a lo inser hrangna kha sukporchè a ni tàk leiin tiem sa ve ni ta naw nih.
13 “‘A’n ser hrangna ni a kim phaa Nazar mi chunga thaw dan ding chu hieng hi a nih: Intuokna Puon in kotah thruoi ding a nih. 14 LALPA ta dingin beramchal tuoi kum khat mi soisel bo chu pumraw thilhlânah, beramla tuoi kum khat mi soisel bo chu suol ngaidamna thilhlânah, beramchal soisel bo pakhat chu inremna thilhlânah inhlàn a ta, 15 chuonghai chu bu le bâl le dawn thilhlân- chol thrang lo bei dam, beiphit indip tak le hriek chokpola siem kêk dam le hriek nàl beipèr bawm khat le chun- a ruola inhlàn ding a nih.
16 “‘Thiempu chun chuonghai chu LALPA hmaah inhlănin, suol ngaidamna thilhlân le pumraw thilhlân chu inhlàn a tih. 17 Bawma chol thrang lo bei le chun beramchal chu inremna thilhlâna dingin LALPA kuomah thiempu chun inhlàn a ta; bu le bâl thilhlân le dawn thilhlân khom inhlàn sa bok a tih. 18 Nazar mi chun Intuokna Puon in kotah a lu invawtir a ta, a’n ser hrangna sam chu lang a ta, inremna thilhlâna dingin meia chun rawng a tih.
19 “‘Nazar miin inser hrangnaa lu an vawtir zo chun thiempu chun a kutah beram dàr, suong hmin sa le bawma chol thrang lo bei le beiper chu inchawitir a tih. 20 Chu zoah thiempu chun LALPA hmaa thèn thilhlâna dingin thên a ta, chu chu thil thienghlim, thiempu chanpuol ning a tih, thèn thilhlân a irawm le a mal le chun. Chu zoa chun Nazar mi chun uoiin dawn thei tang a tih. 21 Hi hi inser hrang a nuom dan anga Nazar thutiem thaw dan le LALPA hmaa a thil inhlàn dan ding chu a nih, ama nuom thua thil a’n hlànhai chu tiem sa loin. Intiemkamna a nei taphot chu Nazar dan angin a hlen ding a nih’ tiin hril tawl rawh” a ta.
Thiempuin mipui mal a sawm dan ding
22 Chun, LALPA chun Mosie a biek a, 23 “Aron le a naupahai hril la, Israelhai mal an sawm dan ding chu hieng ang hin a nih:
24 ‘LALPAN malsawmin veng sien chêu,
25 In chungah LALPA hmĕl hlim sien,
Hmai tlai inhmutir chêu raw se;
26 LALPA chu nangni tieng ngha sien,
Thlamuongna pe chêu raw se’
tiin hril rawh.
27 Chuongchun Israelhaiin anni malsawmpĕk dinga ka hming an lam chun, keiin anni chu malsawm ka tih” tiin.