5 LALPA chun Mosie a biek a, 6 “Israelhai kuomah hieng ang hin hril rawh: Pasalin amanih nuhmeiin amanih mi chungah thil poi a thaw a, LALPA lakah ringum loa a um chun thiem naw chang a ta, 7 suol a thaw lei chun thuphâ chawi a ta, a suol thaw man chu a kimin rul a ta, hmun ngaa threa hmun khat pe belsang a ta, a suol thaw tuortu kuoma chun pe’ng a tih. 8 Amiruokchu, suol man intêltu ding chu a thi a, sungkuo inhnăipui a nei si naw chun, suol rulna man sum chu thiempu chanpuola dingin LALPA kuomah a pêk ding a nih. Hi hi suol ngaidamna dinga inremna thilhlân beramchal an inhlăn băka pĕk ding a nih. 9 Israel thlahaiin chuong ang thilpêk an hung inhlăn chun a dongtu thiempu chan ni’ng a tih. 10 Thiempu tinin thilhlân an dong seng chu an chan ni’ng a tih” a ta.

11 LALPA chun Mosie a biek a, 12 “Israelhai kuomah hieng ang hin hril rawh: nuhmei tu khom a pasal lakah ringum loin a um a, 13 mi dangin an zălpui ti a pasal lakah a thup a, a chetsuol lai chie hmutu an um naw a, a uiret laia man a ni bok naw a, 14 sienkhom a pasal chu thîkna lungrilin a sip a, a nuhmei chu a ringhlel a, a nuhmei chu a lo chesuol bok si amanih, an naw leh chesuol naw sienla khom a pasal chun thîkthu siet leia a ringhlel tlat si chun, 15 a nuhmei aiawin thìk thilhlàna ding barli beiphit kilogram khat chawiin a nuhmei chu thiempu kuomah thruoi a tih. Beiphita chun hriek a buok ding a ni naw a, rim inhnik a pol sa ding a ni bok nawh; chu chu nuhmei ringhlel umhai leia thilhlân, hriet zingna thilhlân, thiem nawna man suokna dinga thilhlân a ni si a.

16 “Thiempu chun nuhmei chu hung thruoi a ta, LALPA hmaah inngǐrtir a ta; 17 pilbêlin tui thienghlim chawi a ta, tuia chun biekbŭk truonga pilvut chu hamin phul a tih. 18 Thiempuin nuhmei chu LALPA hmaah inngirtir a ta, a samtom insûttirin, a sam chu a thlaiin put a ta, a kuta chun fiena beiphit, thîk thilhlàn chu inchawitir a ta, ama chun tui sie, trongsie inphurtirna tui chu chawi a tih. 19 Thiempu chun nuhmei chu inkhămtir a ta, “Tu khomin an zàlpui naw che a, i pasal thu hnuoia i um sungin tirdakum tieng i pèt hmang naw chun trongsephur tui se-a inthok hin fihlim i tih. 20 Amiruokchu, i pasal thu hnuoia i um laiin tirdakum tieng i pêt hmang a, i pasal ni lo mi dang zălpuia i lo insukporchè a ni chun, 21 LALPAN i malpui inkàr^a inhmontirin i phìng inpuomtir sien, i mihai inhnawltirin an trongsie inphurtir raw se che. 22 Hi tui sie, trongsephur hi i rîlah lûtin i phing sukpuom sien, i malpui inkàr sukhmon raw se” ti’ng a ta, nuhmei chun “Amen, Amen” a ti ding a nih.

23 “Thiempu chun trongsiehai chu savun lekhaziela chun ziek thla’ng a ta, khâkna tuia chun inchieng a ta, 24 nuhmei chu trongsie intluntu khâkna tui chu indawntir a ta, trongsie intluntu tui chu a phingah lut a ta, nasa takin a phing sukna’ng a tih. 25 Thiempu chun thîk thilhlan beiphit chu nuhmei kuta inthok chun lang a ta, LALPA hmaah beiphit thilhlân chu thèn a ta, maichama chun fepui a tih. 26 Thiempu chun hrietzingna thilhlân beiphit chu vei khat lâng a ta, maichama chun rawng a ta, chu zoah nuhmei chu tui chu indawntir a tih. 27 Tui a’n dawntir zo chun, nuhmei chu insukporchea a pasal lakah a lo uire a ni chun, trongsie intluntu tui chu a sungah lut a ta, hung kha’ng a ta, a phing chu hung invung a ta, a malpui chu hung zùr thla vong a ta, a chipuihai trongsie phurtu hung ni’ng a tih. 28 Amiruokchu, nuhmei chu porche loa a thienghlim chun thiem nawna laka chun fihlim a ta, nau la päi thei pei a tih.

29 “Hi hi nuhmei tu khom a petek a, a pasal lakah a’n sukporche phaa inthîkna chungthu rèl dàn chu a nih. 30 Pasalin thikthusiet lei hrim hrima mi dang laka a nuhmei a ringhlel a ni chun a nuhmei chu Pathien hmaah thruoi sien la, thiempu chun hieng danhai ang hin a chungah thil a lo thaw ding a nih. 31 Chuong anga a thaw chun, pasal chu thiem naw chang theina laka chun fihlîm a ta, nuhmei chun a suol maw chu phur a tih” tiin.