Levi chihai
3
1 Sinai tlanga LALPAN Mosie a biek laia Aron le Mosie sungkuo chanchin chu hieng ang hi a nih: 2 Aron naupahai hming chu a upa taka inthokin Nadab, Abihu, Eleazar le Ithamar hai an nih. 3 Chuonghai chu thiempu sin thaw dinga hriek nàla ser hran an nih. 4 Nadab le Abihu ruok chu Sinai tlangah mei thieng lo hmanga rimtui an inhlăn leiin, chi thla nei hman loin LALPA hmaah sukhlumin an um a, an pa Aron dam laia thiempu sin thaw chu Eleazar le Ithamar chauh an nih.5 LALPA chun Mosie kuomah, 6 “Levi thlahai chu thiempu Aron kuomah thruoi la, a rongbawlnaa thrangpuitu dingin a kuomah inumtir rawh. 7 Anni chun biekbŭka Intuokna Puon ina chun thiempu le hung pungkhawmhai po po rong chu bawl raw hai se. 8 Intuokna Puon ina hmangruo po po enkol an ta, biekbŭka hung Israel thlahai chu an lo enkai ding a nih. 9 Levihai chu Israelhai laia Aron le a naupahai sor ding lieu lieua ka pĕk suok an nih. 10 Aron le a naupahai chu thiempu sin thaw dingin ruot la, an thiempu nǐna chu kengkaw tlat hai sien, mi dang tu khom hmun thienghlima hung inrol chu sukhlum ning an tih” tiin.
Levi thlahai tiemna
11 LALPAN Mosie a biek a, 12 “Levihai hi Israel thlahai laia nuhmei sul kêu hmasa takhai aia keima ngeiin ka lăk an nih. Levihai chu ka tâ an nih. 13 Nau lutir po po ka chan an nih. Aigupta rama nau lutir po po ka sukhlum ni khan Israelhai laia nau lutir po chuh, a mihriem a ranin, ka puola dingin ka hauh hrang a nih. Anni chu ka ta ding an nih. Kei hi LALPA chu ka nih” tiin.
14 LALPA chun Sinai thlalĕrah Mosie a biek a, 15 “Levi thlahai chu an sungkuo kuo le an chi-hnam hnamin tiem rawh. Pasal taphot chu thla khata inthoka a chung tieng po tiem vong rawh” a ta. 16 LALPA thupĕk angin Mosie chun a tiem tawl a. 17 Levi naupahai chu Gerson, Kohat le Merari an nih. 18 Gerson thlahai chu Libni le Simei an nih. 19 Kohat thlahai chu Amram, Izar, Hebron le Uziel an nih. 20 Merari thlahai chu Mali le Musi an nih. Chuonghai chu an sungkuo inchik dan ang peia Levi thlahai chu an nih.
21 Gerson pahnama tiemhai chu Libni chi le Simei hai an nih. 22 Thla khata inthoka a chung tieng pasal an tiem po zat chu 7500 a nih. 23 Gerson thllahai chun biekbuk thlang tieng puon in an kei ding a nih. 24 Gerson thlahai inrawitu chu Lael naupa Eliasaf a nih. 25 Gerson nauhaiin Intuokna Puon ina an enkol ding chu biekbuk le puon in ni’ng a ta, a chung dam, intuokna puon in kota puonzâr dam, 26 biekbŭk tuol zawla puonzâr dam, biekbŭk tuolzawl inhuonna puonzâr dam, maichăm vêla mi puonzâr dam, chu taka hmang ding hruihruol po po dam chu an kutah um a ta, chuonghai enkol sin chu thawng an tih.
27 Kohat thlahai chu Amramit hai, Izarit hai, Hebron hai le Uziel hai an nih. 28 Thla khata upa china inthoka a chung tieng pasal po po chu 8,600a an nih. Kohat thlahai chu Hmun Thienghlim enkoltu ding an nih. 29 Anni chun biekbŭk sim tieng pangah puon in kei an tih. 30 Kohat chihai inrawitu chu Uziel naupa Elizafan a nih. 31 Anni enkol ding chu Thuthlung Bawm hai, dawkan hai, khawnvar siena hai, maichăm hai, Hmun Thienghlima rongbawlna bûr le bĕl po po hai, puonzâr hai le rongbawlnaa hmang chi thil hrim hrim hai chu an nih. 32 Levihai hotu lû tak chu thiempu Aron naupa Eleazar a nih. Ama chu Hmun Thienghlim enkoltuhai po po inrawitu dinga ruot a nih.
33 Merari thlahai le Merari hnam thlà sawngtuhai chu Mahli le Musi hai an nih. 34 Thla khata upa china inthoka chung tieng pasal po po chu 6200 an nih. 35 Merari thlàhai inrawitu chu Abihail naupa Zuriel a nih. Biekbuk hmar tieng pangah puon in kei an tih. 36 Merari thlàhai enkol dinga ruot chu biebŭk ban rem khawm dam, a bangruhai dam, a banhai dam, a ban thrut ker kuokhai dam, chuong thilhai le inzom hmangruo po pohai dam, 37 a tuol kot inhuonna banhai dam, ban thrut ker kuokhai dam, a kil dĕna le a hrui hai dam a nih.
38 Biekbŭk sak tieng intuokna puon in hmai, ni suokna tieng panga chun Mosie le Aron le an nauhaiin puon in kei an tih. Israelhai aiawa Hmun Thienghlim enkol chu an mawphurna a nih. Mi dang tu khomin biekbŭk a va hnai chun sukhlum ning a tih” tiin.
39 LALPA thupĕka Mosie le Aronin Levi thlàhai, an pahnam ang peia an tiemhai chu, thla khata upa chin le a chung tieng pasal po po chu 22,000 an nih.
40 LALPAN Mosie kuomah, “Israelhai laia nau pasal pieng hmasa tak po po, thla khata upa china inthoka a chung tieng po tiem vong la, an hming inchik rawh. 41 Israel thlá nau lutir po po aiah Levihai chu ka chanpuol a nih; Israelhai ran lutir po po aiah Levihai ran chu ka chanpuol bok a nih. Kei hi LALPA chu ka nih” a ta. 42 Mosie chun LALPA thupĕk angin Israelhai laia pasal nau lutir po po chu a tiem a. 43 An hming indot ang peia thla khata upa china inthoka a chung tieng pasal nau lutir po po chu 22,273 an nih.
44 LALPA chun Mosie kuomah, 45 “Israelhai laia pasal nau lutir po po aiah Levihai chu la la, an ran lutir aiah Levihai ran la bok rawh; Levihai chu ka ta ding an ni si a. Kei hi LALPA chu ka nih. 46 Israelhai nau lutir chu Levi chihai nêkin 273-a an tam lem leiin, a chuong po chu suma intlan ding a na, 47 mi pakhat peiah hmun thienghlima an sekel hmang ang sekel nga pei i lak ding a nih; sekel khat chu gera sawmhni a nih. 48 Chuonghai intlanna sum chu la la, Aron le a nauhai kuomah pe rawh” a ta.