3 Sak tieng, nisa suokna tieng chun Juda pawlin an pahnam inchikna seng târin puon in kei an ta, an thruoitu chu Aminadab naupa Nason ni’ng a ta 4 an tam zat chu 74,600 a nih. 5 Anni dotah Isakar pahnamin puon in kei an ta, an thruoitu chu Zuar naupa Nethanel ni’ng a ta, 6 an tam zat chu 54,400 a nih. 7 A dotah Zebulun pahnam ni’ng an ta, an thruoitu chu Helon naupa Eliab ni’ng a ta, 8 an tam zat chu 57,400 a nih. 9 Juda pahnam inrawina hnuoia um po chu, pawl thrê dan dungzuiin, 186,400 an nih. Anni hin hma thruoi an tih.

10 Sim tieng pangah mani pahnam inchikna seng târin Reuben pawlhai chu um an ta, an thruoitu chu Sedeur naupa Elizur ni’ng a ta, 11 an tam zat chu 46,500 a nih. 12 A dotah Simeon pahnam um an ta, an thruoitu chu Zurisadai naupa Selumiel ni’ng a ta, 13 an tam zat chu 59,300 a nih. 14 Anni dotah Gad pahnam um an ta, an thruoitu chu Deuel naupa Eliasaf ning a ta, 15 an tam zat chu 45,650 a nih. 16 Reuben pahnam inrawina hnuoia um po chu an pawl thrè dan dungzuiin, 151,450 an nih. Anni po hi pawl hnîna, Juda pawl dota suok ding an nih.

17 Chu zoah Levi pawlhai chun Intuokna Puon in chu zawnin, a laiah thrangin, riebûka an inkul dan indot ang peiin, mani pawl seng inchikna puonzar khaiin, suok an tih.

18 Thlang tieng panga chun mani pahnam inchikna seng târin Efraim pawlhai chu um an ta, an thruoitu chu Amihud naupa Elisama ning a ta, 19 an tam zat chu 40,500 a nih. 20 Anni dotah Manase pahnam um an ta, an thruoitu chu Pedazur naupa Gamaliel ni’ng a ta, 21 an tam zat chu 32,200 a nih. 22 A dotah Benjamin pahnam um an ta, an thruoitu chu Gideoni naupa Abidan ni’ng a ta, 23 an tam zat chu 35,400 a nih. 24 Efraim pahnam inrawina hnuoia um po chu, an pawl thrè dan dungzuiin, 108,100 an nih. Anni hi a pawl thumnaa suok dinghai chu an nih.

25 Hmar tieng panga chun Dan pawla mihai, anni inchikna seng târin um an tih. Dan pawl thruoitu chu Amisadai naupa Ahiezer ning a ta, 26 an tam zat chu 62,700 a nih. 27 A dotah Aser pahnam um an ta, an thruoitu chu Okran naupa Pagiel ni’ng a ta, 28 an tam zat chu 41,500 a nih. 29 Anni dotah Naftali pahnam um an ta, an thruoitu chu Enan naupa Ahira ning a ta, 30 an tam zat chu 53,400 a nih. 31 Dan pahnam inrawina hnuoia um po chu, an pawl thrè dan dungzuiin, 157,600 a nih. Anni hi mani pahnam puonzar seng khaia a nuhnung taka suok ding an nih.

32 Riebûka um Israel thlahai, pahnam tina mi an tiem zat chu 6,03,550 a nih. 33 LALPAN Mosie thu a pĕk ang khan, Levi chia mihai chu Israel thlahai laia tiem sa an ni ve nawh. 34 Chuong ang chun Israel thlahai chun an thaw a, LALPAN Mosie thu a pĕk ang peiin, mani pawl inchikna puonzar intărna sengah pawl tinin puon in an kei a, chuong ang chun a chi chiin, a sungkuo kuoin an intawl suok hlak a nih.