NAMBAR
Intiem
1
1 Aigupta rama inthoka Israelhai an suok hnung kum hnina le thla hnina ni hmasa taka chun Sinai Thlalera Intuokna Puon inah LALPA chun Mosie a biek a. 2 “Israelhai po po chu an chi hnam, an sungkuo le an hming indot dan ang peiin tiem rawh. 3 Israel mi po po, kum sawmhnia inthoka chung tieng, sipaia thrang thei pasal po chu nang le Aronin a pawl pawlin tiem vong ro. 4 Pahnam tin laia inthokin mi pakhat le chi tum tuma inthoka sungkuo tina lukhâituhai chun an thrangpui ding chĕu a nih. 5 A thrangpuituhai ding chĕu chu: Reuben hnama inthokin Sedeur naupa Elizur; 6 Simeon hnama inthokin Zurisadai naupa Selumiel; 7 Juda hnama inthokin Aminadab naupa Nason; 8 Isakar hnama inthokin Zuar naupa Nethanel; 9 Zebulun hnama inthokin Helon naupa Eliab; 10 Josefa thla, Efraim hnama inthokin Amihud naupa Elisama le Manase hnama inthokin Pedazur naupa Gamaliel; 11 Benjamin hnama inthokin Gideoni naupa Abidan; 12 Dan hnama inthokin Amisadai naupa Ahiezer; 13 Aser hnama inthokin Okran naupa Pagiel; 14 Gad hnama inthokin Deuel naupa Eliasaf; 15 Naftali hnama inthokin Enan naupa Ahira ning an tih. 16 Hienghai hi mipuihai laia inthoka thlang, an pi le puhai hnam thruoituhai, Israel pahnam tina an lukhăituhai chu an nih.17 Hieng an hming hril tahai hi Mosie le Aron chun an thruoi a, 18 a thla hnina ni khat ni chun mipui an ko khawm vong a, a pahnam hnamin, a sungkuo kuoin, an hming indot dan ang peiin kum sawmhnia inthoka a chung tieng po hming chu an ziek lut a, 19 LALPAN Mosie kuoma thu a pĕk angin Sinai thlalĕra chun an tiem vong a.
20 Israel nau lutir Reuben thlaa inthoka pasal kum sawmhni le a chung tieng, raldo thei chin chu an pahnam le sungkuo rikawta an inchik dan angin, an hming indot ang peiin an ziek lŭt a, 21 Reuben hnama mi chu 46,500 an nih.
22 Simeon thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 23 Simeon hnama mi po chu 59,300 an nih.
24 Gad thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 25 Gad hnama mi po chu 45,650 an nih.
26 Juda thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 27 Juda hnama mi po chu 74,600 an nih.
28 Isakar thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 29 Isakar hnama mi po chu 54,400 an nih.
30 Zebulun thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 31 Zebulun hnama mi po chu 57,400 an nih.
32 Josefa nauhaia inthokin: Efraim thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 33 Efraim hnama mi po chu 40,500 an nih.
34 Manase thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 35 Manase hnama mi po chu 32,200 an nih.
36 Benjamin thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 37 Benjamin hnama mi po chu 35,400 an nih.
38 Dan thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 39 Dan hnama mi po chu 62,700 an nih.
40 Aser thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 41 Aser hnama mi po chu 41,500 an nih.
42 Naftali thlaa inthoka pasal kum sawmhni le a chung tieng, raldo thei chin hai chu an pahnam le sungkuo rikawta an inchik dan angin, an hming indot peiin an ziek lŭt a, 43 Naftali hnama mi po chu 53,400 an nih.
44 Chuonghai po chu an nih Mosie le Aron le Israel thlahai pahnam tin thruoitu lu sawmpahnihaiin an tiem chu. 45 Israel thla sungkuo tina mi, raldo thei pasal, kum sawmhni le a chung tieng, Israel sipaia thrang thei po chu an tiem vong a, 46 an rêngin 603,550 an nih.
47 Levi hnama sungkuohai ruok chu tiem sa an ni ve nawh. 48 LALPA chun Mosie kuomah, 49 “Levi hnam chu Israel pahnamhai lai tiem sâ ve naw rawh. 50 Levi chihai chu Thuthlung biekbuk le a sunga hmangruo le thil um po po enkoltu dingin ruot tawl lem rawh. Biekbŭk le a hmangruo po po zâwn hlak an ta, enkol an ta, biekbŭk chu um ngha’ng an tih. 51 An inson zătin biekbŭk chu Levihai chun thriek an ta, an zar nawk ding pha leh Levihai bokin zar nawk an ta, mi dang hung inrol taphot chu sukhlum ni’ng an tih. 52 Israel thlahai chun mani hnam puonzar inkhaina hmun sengah, an tam dan ang peiin, a pâwl păwlin puon in kei an tih. 53 Israelhai chunga lungsenna a tlăk nawna dingin Levihai chun Thuthlungna biekbŭk huol vêlin puon in kei an ta, an vèng ding a nih” tiin a lo hril ta si a.
54 Israelhai chun LALPAN Mosie kuoma a hril ang tak chun an thaw a.