LALPA kuoma thilpêk
27
1 LALPA chun Mosie kuomah, 2 “Israelhai chu hieng thu hi hril rawh: Tu khomin LALPA ta dinga mihriem pe dinga intiemkamna nei a, a man hŭ a pêk ding chun, 3 pasal kum sawmhni le sawmruk inkâr man chu hmun thienghlima sekel an hmang anga hisapin tangkaruo sekel sawmnga ni’ng a ta, 4 nuhmei a ni chun sekel sawmthum ni’ng a tih. 5 Kum nga le kum sawmhni inkâr mi a ni chun pasal chu sekel sawmhni ni’ng a ta, nuhmei chu sekel sawm ni’ng a tih. 6 Thla khat mi le kum nga mi inkar a ni chun pasal man chu tangkaruo sekel nga ni’ng a ta, nuhmei man chu tangkaruo sekel thum ni’ng a tih. 7 Pasal kum sawmruk chung tieng mi a ni chun a man chu sekel sawm le panga ni’ng a ta, nuhmei a ni chun sekel sawm ni’ng a tih. 8 Thu intiemkamna neitu kha a rethei leia a man dinga tuk zât a pêk thei naw a ni chun a mihriem inhlàn ding chu thiempu kuomah fepui a ta, thiempu chun a man a pèk thei zàt angin lo tuk a tih.9 “‘LALPA kuoma thilhlâna hmang tlak miin ran pĕk a lo intiem a ni chun, chuong ang ran, LALPA kuoma inhlàn dinga a pek chu ran thienghlim a hung ni tah. 10 Chu ran chu ran thrain amanih ran thra loin amanih a thlâk ding a ni nawh. Ran pakhat chu ran danga thlâk a ni khomin ran pahnihai chu ran thienghlim an ni ve ve a nih. 11 Inhlăn dinga a tiem ran chu Pathien kuoma inhlăn tlâk lo ran a ni chun thiempu kuomah a hung pèk ding a nih. 12 Thiempu chun ran chu inhlàn tlâk a ni le ni naw lo en fel a ta, aman a ti ang ang chu ni pei a tih. 13 Amiruokchu, ran chu intlan nawk ding a ni chun ran hlutna thiempu bituk hmun ngaa threa hmun khat pek belsaa intlan thei a tih.
14 “‘Chun, miin a in LALPA ta dinga a’n hlàn chun, a in thrat le thrat naw dan zirin thiempuin a hlutzie tuk a ta, a tuk ang ang chu a hlutna ni’ng a tih. 15 A petuin in chu intlan nawk a nuom chun a hlutna hmun ngaa threa hmun khat pe belsain intlan a ta, in chu a tâ ni nawk a tih.
16 “‘Miin an sungkaw ram iemani ruol LALPA ta dinga a’n hlàn chun, a ram hlutna chu bu chî an thlăk zăta inthoka sùt suok ding a nih. Barli chi kilogram sawmhni an tŭna hmun hlutzie chu tangkaruo sekel sawmnga pei ni’ng a tih. 17 A lo chu Jubili kuma inhlăn a ni chun a tìra a hlutna an tuk chu pangngai zing a tih. 18 Jubili kum hnunga inhlàn a ni ruok chun Jubili kum nawk chena a hlutna chu thiempuin sût suok a ta, a ruot dan angin a hlutna chu suktlawm ni’ng a tih. 19 Lo petuin intlan nawk a nuom chun a man hmun ngaa threa hmun khat pe belsain intlan a ta, a tâ hung ni nawk a tih. 20 Lo chu intlan nuom lo a, mi dang kuoma a zor chun, intlan kîr thei ni ta naw nih. 21 Jubili kum pha khom LALPA puol dinga inhlàn tah lo thienghlim hung ni ta’ng a ta, thiempuhai ta ni ta’ng a tih.
22 “‘Miin an sungkuo rama mi ni lo ram inchaw a, LALPA ta dinga a’n hlàn chun, 23 thiempu’n a ram hlutna chu Jubili hung tlung ding kum chena hisapin sût suok a ta, a’n hlàn ni chun a man zàt dinga ruot chu ram petu chun Pathien ta dinga thilpêk thienghlimah a pêk ding a nih. 24 Jubili a tlung pha chun a’n chawkna pa kuomah ram chu pe kîr nawk a tih. 25 Thil man zăt sŭtnaa hmang ding chu hmun thienghlima sekel an hmang anga hisâp vong ding a na, chuong ang dungzui chun sekel khat chu gera sawmhni a nih.
26 “‘Tu khomin ran pieng hmasa tak an inhlăn ding a ni nawh, ran pieng hmasa tak chu bawngchal amanih beram chal amanih khom ni sien an inhlăn ding a ni nawh, ran lutir chu LALPA chanpuol ni ta sa, LALPA ta a ni si a. 27 Ran thienghlim lo a ni chun thiempuin a man zàt LALPA ta dinga a tuk angin a neitu chun intlan a ta, a man hmun ngaa threa hmun khat pe belsa bok a tih. Intlan a ni naw chun thiempuin a man zăt a ruot anga zor ding a nih.
28 “‘Mi tu khomin LALPA ta dinga a thil nei a pĕk suok tah mihriem amanih, ran amanih le sungkaw ram amanih hrim hrim chu zor le intlan nawk ding a ni nawh, LALPA kuoma inhlàn taphot chu thil thienghlim tak a ni si a. 29 Mihriem khom ni sien, chuong anga pĕk suok ta phot chu intlan loa sukhlum ding a nih.
30 “‘A rama inthoka suok hrim hrim sawmapakhat po po, bu le bâl amanih thei ra amanih khom LALPA chanpuol a na, LALPA ta dinga thil thienghlim a nih. 31 Tu khomin a sawmapakhat an intlan chun hmun ngaa threa hmun khat hù a pêk bel sa ding a nih. 32 Bawng ruol le beram ruol laia berampu hmol hnuoia lût sawma pakhat pei chu LALPA ta dinga ran thienghlim a nih. 33 A sie a thra thlier ding a ni naw a, thlakthleng ding a ni bok nawh. A thleng lui a ni khomin a ran thleng le a aiawtu kha an thienghlim ta vé vè leiin intlan thei a ni ta nawh’ ti rawh” a ta.
34 Hieng hi Israel thlahai ta dinga thupêk Sinai tlanga LALPAN Mosie a pĕk chu a nih.