5 “‘Thiempu hrim hrimin lû an vaw kol ding a ni naw a, khakhmul an tan ding a ni naw a, taksa an in-ât pop ding a ni bok nawh. 6 An Pathien ta dingin mi thienghlim an ni ding a na, an Pathien hming an sukpawi ding a ni nawh. Pathien ta dinga meia thilhlân, Pathien ta dinga fàk ding inhlàntu an ni leiin an thienghlim ding a nih.

7 “‘Nuhmei nawchizor amanih, hming se ta hnung le mi mâk ta hnung chu an nei ding a ni nawh, thiempuhai chu an Pathien ta dinga mi thienghlim an ni si a. 8 I Pathien ta dinga fak ding inhlântu an ni leiin mi thienghlimah ngai rawh. I ta dinga mi thienghlim an ni ding a nih; kei, LALPA, sukthienghlimtu chêu hi ka thienghlim si a. 9 Thiempu naunu tu khom nawchizora insukporchè a um chun a pa a sukporchè a na, meia raw hlum ding a nih.

10 “‘A unauhai laia thiempu laltak, a lua hriek nàla um tah, thiempu silfen inbel dinga ser hrang ta chun a sam a sukthur ding a ni naw a, a silfenhai a kei thlĕr ding a ni bok nawh. 11 Mithi ruong umnaa hrim hrim a lût ding a ni nawh. A nu le pahai khom ni sien, a’n sukporchè ding a ni nawh. 12 Pathien mi dinga hriek năla ser hrang a ni leiin Hmun Thienghlim a suoksan ding a ni naw a, a sukporchè ding a ni bok nawh. Kei hi LALPA chu ka nih.

13 “‘Nuhmei dingin nunghak thienglâm a nei ding a nih. 14 Hmeithai amanih, màk hnung amanih, nawchizora hmingse ta hnung amanih a nei ding a ni nawh, ama chipui ngei, nunghak thienglâm a nei ding a nih. 15 Chuonga a thaw chun a chipuihai laia a thlahai chu sukporche naw nih. Kei hi LALPA, ama sukthienghlimtu chu ka ni si a’ tiin hril rawh” a ta.

16 LALPAN Mosie a biek a, 17 “Aron kuomah hieng hin hril rawh: Suon la hung um pei dinga khom, i thlàhai laia piengsuolna nei tu khomin Pathien kuoma fàk ding inhlàn dingin hung hnai naw raw se. 18 Piengsuolna nei tu khomin an hung hnai ding a ni nawh; mitdel hai, kebai hai, hnâr inbĕk hai, kutke sei taluo hai, 19 kut zeng hai, ke zeng hai, 20 zângbâwng hai, mi thehrê hai, mit thra lo hai, pânna hnâi pŭt hai, til mu koi hai chun an mi hung hnai ding a ni nawh. 21 Thiempu Aron thlàhai laia mi pieng indik lo tu khomin ka hmaa thil inhlàn dingin an mi hung pan hnai ding a ni nawh. Piengsuolna nei a ni leiin a Pathien kuoma fàk ding inhlàn dingin a hung hnai ding a ni nawh. 22 Amiruokchu, Pathien kuoma thil inhlànhai chu a thienghlim khom, a thienghlim tak khom fa thei vong an tih. 23 Chiengkuong nawna nei an ni leiin puonzâr sung amanih maicham hnai amania ruok chu fe thei naw ni hai, ka Hmun Thienghlim sukporchè pal rawi an tih. Kei hi LALPA, anni sukthienghlimtu chu ka ni si a,’ ti rawh” tiin. 24 Chuong thu chu Mosie chun Aron le a naupahai le Israel thlahai po po chu a hril a.