Bawsietna le hremna
20
1 LALPAN Mosie a biek a, 2 “Israel thlahai kuomah hieng thu hi hril rawh: ‘Tu khom Israel thla laia mi amanih, ram dang mi Israel rama khawsa amanih, mani rîla rà naupang, Moleka kuoma petu taphot chu sukhlum ngei ding a na, hi rama mihai hin lungin an dèng hlum ding a nih. 3 Molek kuomah mani nau pe a, ka Hmun Thienghlim sukporchè a, ka hming sukpâwitu chunga chun kei khomin ka hmâi suktûr ka ta, a chipuihai laia inthokin sukbohmang ka tih. 4 Chun, hi rama mihaiin chuonga mani rîla rà Molek kuoma petu thil thaw chu hmu naw ang ziezanga um a, an sukhlum naw chun, 5 chu mi le a sunghai chunga khom chun ka hmâi suktûr ka ta, a chipuihai lakah sat thla’ng ka ta, ama ang boka Molek kuoma inzortu po po chunga chun thaw bok ka tih.6 “‘Rau ko thiemhai le dawithiemhai pan a, anni laka inzortu chunga chun ka hmâi intûr a ta, a chipuihai laia inthokin sukbohmang ka tih.
7 “‘Chuleiin, inhlàn thienghlim unla, thienghlim takin um ro, LALPA in Pathien chu ka ni si a.
8 Ka thupêkhai vongin zawm ro. In LALPA, sukthienghlimtu chêu chu ka ni si a.
9 “‘Tu khom mani nu le pa trongsie inphurtu chu sukhlum ngei ding a nih. A nu amani a pa amani trongsie inphurtu a na, a thisen maw chu ama lu chungah tla’ng a tih.
10 “‘Tu khomin mi dang nuhmei, a tuolbawmpa nuhmei a uiretpui chun, a uirepa le a uirenu chu an pahnia sukhlum ding an nih.
11 “‘Tu khomin a pa nuhmei a zàlpui chun a pä a sukmuolpho a nih. Uirehai chu sukhlum ve ve ding an nih; an thisen maw chu an lu chungah tla’ng a tih.
12 “‘Tu khomin a mo a zàlpui chun an pahnia sukhlum ding a nih. An thilthaw chu thil letling a na, an thisen maw chu an lu chungah tlâng a tih.
13 “‘Pasalin nuhmei anga pasal dang a zàlpui chun an pahniin thil tirdakum an thaw a nih. An pahniin sukhlum ve ve ding a nih; an thisen maw chu an lu chungah tla’ng a tih.
14 “‘Miin nûfa nuhmeia a nei kop chun ritlona nasa tak a thaw a na, chuong ang ritlona chu nangni lai a um nawna dingin, an rênga raw hlum ding an nih.
15 “‘Pasalin ran a rǐm chun ama chu sukhlum ding a na, ran khom chu that bok ding a nih.
16 “‘Nuhmeiin inpawlpui dinga ran a pan chun nuhmei le ran chu an pahniin that ro. Sukhlum ngei ngei ding an nih; an thisen maw chu an lu chungah tla’ng a tih.
17 “‘Miin a farnu,- a pa naunu amanih a nu naunu amani khom ni sien- nuhmeia neia a zălpui chun thil inzakumthlak tak a ni leiin a chipuihai mit hmua inthoka săt thlâk ding an nih. A farnu a sukmuolphona maw chu phur a tih.
18 “‘Tu khom nuhmei thla pal lai zălpuia a pawltu chun, a thla palna hnàr chu hlîm a, a nuhmei khomin a lo hawkpek a ni leiin an pahniin an chipuihai laia inthoka săt thlâk ding an nih.
19 “‘I pä farnu amanih, i nu zuorpuinu amanih i zàlpui ding a ni nawh, an laichin hnai sukmuolphona a na, a maw chu in pahniin phur in tih.
20 “‘Miin a patê nuhmei a zàlpui chun a patê a sukmuolpho a nih. An pahniin a maw phur an ta, nau boin thi’ng an tih.
21 “‘Miin a unaupa nuhmei a neipek chun, thil tirdakum thawin a unaupa a sukmuolpho a nih. An pahniin nau boin thi’ng an tih.
22 “‘Ka thruoina ding cheu ram, in chèngna ding ram chun a’n luok suok nawna ding cheuin ka thupêkhai vongin ka dànhai zawm ro. 23 In hmaa ka hnot suok ding hnamhai chìng dàn angin hung khawsa ve naw ro. Hieng thil hi an thaw leiin a nih ka tirdak tawl chu. 24 Nangni kuoma ruok chu, ‘An ram chu la hluong in ta, nenetui le khuoizu luongna ram chu in rochung dingin la pe’ng ka ti chêu’ ka ti lem a ni kha. Kei hi LALPA in Pathien, hnam danghai laka ser hrangtu chĕu chu ka nih. 25 Chuleiin, sa thieng le thieng lo, vate thieng le thieng lo in thlier hrang thiem ding a nih. Sa amanih, vate amanih le hnuoia invâk taphot laia thieng loa ka siehaiin an sukporche ding chĕu a ni nawh. 26 Ka ta dingin in thienghlim ding a nih, kei LALPA hi ka thienghlim si a; ka ta dinga hnam danghai laka ka ser hrang in nih.
27 “Nangni laia mi, a nuhmei a pasalin, rau ko thiem le dawithiem po po chu sukhlum vong ro. Lungin in dĕng hlum ding a nih. An thisen maw chu an lu chungah um a tih’ ti bok rawh” tiin.