3 “‘Mi tinin in nu le pa in inzà ding a nih. Ka chawlni Sabat in inser ding a nih. Kei hi LALPA in Pathien chu ka nih. 4 Milim tieng ngha naw unla, milim sung pathienhai insiem naw ro. Kei hi LALPA in Pathien chu ka nih.

5 “‘LALPA ta dinga inremna thilhlân in inhlăn pha leh a pom tlăk ni dingin inhlăn ro. 6 In inhlăn ni le a zîng chena făk ding a na, ni thum ni chena a bâng la um chu raw hmang ding a nih. 7 Ni thum nia mi fàk chu thil porchè a ni ta leiin pom a ni ta nawh. 8 A fatu taphot chun LALPA thienghlimna a sukporchè leiin a maw phur a ta, a chipuihai laia inthoka tuithlàr ni’ng a tih.

9 “‘In loa bu in sǐk pha lo hnâwm răwta mi chen chen la naw unla, sǐk hmai bu tro khom zong bok naw ro. 10 In grep huonah lo hmai grep tro in zong ding a ni naw a, a ra tril khom in rŭt ding a ni bok nawh; mi retheihai le ram dang mihai ta dingin hlà lem ro. Kei hi LALPA in Pathien chu ka nih.

11 “‘Inru naw ro. Khêl hril naw ro. Inhlĕmtuo naw ro.

12 “‘Ka hminga indik lo taka inkhâmin in Pathien hming sukpawi naw ro. Kei hi LALPA chu ka nih.

13 “‘I tuolbawm thil lakpêkin ama chu rok naw rawh. Inhlawfa hlaw chu zan khat khom hrênpêk naw rawh.

14 “‘Naset chu trongsie inphur naw la, mitdel hmaah dalkham sie naw la, i Pathien trì lem rawh. Kei hi LALPA chu ka nih.

15 “‘Fel lo takin ro rêl naw la, mi rethei thlier bik naw la, mi lien ditsak chuong bik bok naw la, i tuolbawmhai chungah indik takin ro rêl rawh.

16 “‘I chipuihai lai indem sietna thu thĕ dar naw rawh. I tuolbawm hringna ta dinga trium ieng khom thaw ngai naw rawh. Kei hi LALPA chu ka nih.

17 “‘I lungrilin i unaupa theida naw rawh. I tuolbawm chu tlang takin zil la, a thiem nawnaah chan nei ve naw rawh.

18 “‘Phuba lâk dăn zong naw la, i chipuihai theidăna pâi naw la, nangma i’n hmangai angin i tuolbawm hmangai rawh. Kei hi LALPA chu ka nih.

19 “‘Ka thupekhai vong rawh. I ran chu ran chi hrang hrang inzawltir naw rawh. Lo pakhatah thlai chi hrang hrang chîng naw rawh. Thil hrang chi hnih khawng pola siem silfen inbel naw rawh.

20 “‘Tu khom bawinu, mi hmeia um, intlan la ni lo le insuo zalen la ni lo zàlpui taphot chu an phù anga hrem ngei ding an na, sienkhom sukhlum ding ruok chu an ni nawh, nuhmei chu insuo zalèn a la ni naw leiin. 21 Amiruokchu, LALPA kuoma bawsiet ngaidamna thilhlân dingin Intuokna Puon in kotah pasal chun beramchal a hung kei ding a nih. 22 LALPA hmaa bawsiet ngaidamna thilhlân beram chun a thil suol thawna laka inthok chun thiempuin inremna siempek a ta, a suol chu ngaidam ning a tih.

23 “‘Chun, ram chu in hluo pha le thing in phun pha khom, a ra chu fak thieng loah sie hmasa phot ro. Kum thum sung chu a rà fak thieng loa ngaiin in fàk ding a ni nawh. 24 A kum linaa a rà po po chu rà thienghlim, LALPA inpàkna thilhlâna ngai ning a tih. 25 A kum ngànaa a ra ruok chu fa thei ta’ng in tih. Hieng anga in thaw hin in thar suok hung pung a tih. Kei hi LALPA, in Pathien chu ka nih.

26 “‘Sa hrim hrim a thisen chopin fa naw ro. Dawi le aisan thaw ngai naw ro.

27 “‘I bek phei i vaw ding a ni naw a, i khâkhmul i tan ding a ni bok nawh.

28 “‘Mithi leiin in taksa in àt pop ding a ni naw a, in vunah lem chukin in intriel ding a ni bok nawh.

29 “‘I naunu chu tempul nawchizora^a siemin sukporche naw rawh, chuong naw chun a ramin nawchizor hung inchang an ta, rîtlona sip rawi a tih.

30 “‘Sabat inser unla, ka biekbŭk inzà ro. Kei hi LALPA chu ka nih. 31 “‘Rau ko thiemhai le dawithiemhai pan naw ro, sukporche’ng an ti chêu. Kei hi LALPA in Pathien chu ka nih.

32 “‘Upahai hmaah ngir nachâng hrein, tarhai inzà unla, Pathien chu tri ro. Kei hi LALPA chu ka nih.

33 “‘Ram dang mi in rama chênghai chu sukrimsi naw ro. 34 Nangni laia ram dang mi chêng chu a rama pieng ang charin en ro. In inhmangai ang takin ama khom hmangai ve ro, nangni khom Aigupta rama khan ram dang mi in ni ve kha. Kei hi LALPA in Pathien chu ka nih.

35 “‘Thil seizie, rikzie le tamzie inkhǐna le bŭkna indik lo hmang ngai naw ro. 36 Inkhǐna le bŭkna indik, efa tekhawng le hin no indik tak hmang hlak ro. Kei hi LALPA in Pathien, Aiguptaa inthoka thruoi suoktu chêu ka ni hi.

37 “‘Ka thupêkhai vongin ka dànhai po po zawm ro. Kei hi LALPA chu ka nih’ tiin” a ta.