Zălpui lo dinghai
18
1 LALPA chun Mosie kuomah, 2 “Israel thlahai inbiekpui la, an kuomah hieng hin hril rawh: ‘LALPA in Pathien chu ka nih. 3 In umna hlak Aigupta rama mihai thaw dan angin thaw ve naw unla, ka thruoina ding chĕu Kanan rama mihai thaw dan angin thaw bok naw ro. An thil chìnghai chu chîng ve naw ro. 4 Ka dànhai zawm unla, ka thupêkhai fimkhur takin zui ro. Kei hi LALPA in Pathien chu ka nih. 5 Ka thupêk le ka danhai vong ro, a zawmtu taphot chun hringpui a tih. LALPA chu ka ni si a.6 “‘Tu khomin sungkuo inhnaipuihai zălpui dingin in thlêm ding a ni nawh. LALPA chu ka ni hi.
7 “‘I nu zălpuiin i pa hming sukpawi naw rawh. I nu a ni leiin i zălpui ding a ni nawh.
8 “‘I pa nuhmei i zălpui ding a ni nawh, i zălpui chun a hming sukpawi i tih.
9 “‘I farnu amanih, i pa naunu amanih, i nu naunu amanih, in hmunkhata pieng amanih hmun danga pieng amani khom i zălpui ding a ni nawh.
10 “‘I naupa naunu amanih i naunu naunu amanih i zălpui ding a ni nawh, nang le nang insukpawina a nih.
11 “‘I pa nuhmei naunu, i pa thràlbea inthoka suok chu i farnu a ni leiin i zălpui ding a ni nawh.
12 “‘I pa farnu i zălpui ding a ni nawh, i pa laichin hnai a ni leiin.
13 “‘I nu zuorpuinu i zălpui ding a ni nawh, i nu laichin hnai a ni leiin.
14 “‘I pa unaupa nuhmei chu zălpui dingin thlêm naw rawh, i nutê a ni si a.
15 “‘I mo i zălpui ding a ni nawh. I naupa nuhmei a ni leiin i tawk ding a ni nawh.
16 “‘I unaupa nuhmei i zălpui ding a ni nawh, i zălpui chun i unaupa sukpawi i tih.
17 “‘Nufa a kopin i zălpui ding a ni nawh. A naupa naunu khom, a naunu naunu khom i zălpui ding a ni nawh, inlaichin hnâi vong an ni leiin. Chuong thil thaw chu rîtlona a nih.
18 “‘I nuhmei a la dam lai zingin a zuorpuinu chu ama khingpuia nuhmeia nei dingin zălpui naw rawh.
19 “‘Nuhmeiin a dan pangngaia thla a pal laiin zălpui dingin pan naw rawh.
20 “‘I tuolbawm nuhmei zălpuiin insukporche naw rawh.
21 “‘I nauhai tu khom Moleka kuoma inhlàn dinga pein Pathien hming i sukpawi ding a ni nawh. Kei hi LALPA chu ka nih.
22 “‘Nuhmei ang elin pasal i zălpui ding a ni nawh; chu chu thil tirdakum a nih.
23 “‘Ran rǐmin nang le nang insukporchè naw rawh. Nuhmei khom ran le inpawl dingin a’n pek ding a ni nawh; chu chu a letlinga piengsuolna a nih.
24 “‘Chuong thila hai chun in insukporchè ding a ni nawh, in hmaa ka hnot suok ding hnamhai hi chuong anga lo insukporchê vong chu an nih. 25 A ram chenin an sukporchè a, an suolna leiin ram chu ka hrem a, a sunga chênghai a luok suok tawl el a nih. 26 Nangni chun ka dan le thupêkhai in vong ding a nih. A rama pieng le ram dang mi nangni laia chênghai khomin hieng ang thil tirdakum hi an thaw ding a ni nawh. 27 Chuonghai po po chu in hmaa chênghai khan an lo thaw hlak a, a ram phêkin an sukporchè tah a nih. 28 Nangni khomin in sukporchè chun a hmaa chênghai ang bokin a ram chun luok suok ve’ng a ti chêu.
29 “Nangni lai tu khom chuong ang tirdakum thaw an um ve chun a chipuihai laia inthoka tuithlàr ni’ng a tih. 30 Chuleiin, hieng thil tirdakum, in hmaa an chǐng ang chu in chǐng ve nawna ding le chuonga chun in insukporchè nawna dingin ka thupêkhai hi in zawm ding a nih. Kei hi LALPA in Pathien chu ka ni si a’ tiin” a ta.