Thisen fâk khapna
17
1 LALPA chun Mosie kuomah, 2 “Aron le a naupahai le Israel thlahai po po kuomah hieng hin hril rawh: ‘Hi hi LALPA thupèk chu a nih: 3 Israel mi tu khom bawngchal amanih, beram le kèl amanih riebûk sung le a puo tieng amania that a, 4 LALPA biekbuk hma, LALPA ta dinga thilhlân inhlănna hmun Intuokna Puon in kota hung chawi lo taphot chu thisen insuo leia thiem naw changa ngai ning a ta, thisen insuotu a ni leiin a mihai laia inthoka tuithlàr a ni ngei ding a nih. 5 Chuong chu a ni leiin, tuta tuolpâra Israelhaiin hlànbiek an inhlàn hlak po po hi LALPA hmaah an hung inhlân vong ta ding a nih. Intuokna Puon in kotah thiempu kuomah, LALPA hmaah hung chawi an ta, inremna thilhlânah an hung inhlàn ding a nih. 6 Thiempu chun Intuokna Puon in kot bula maicham chu ran thisen chun the’ng a ta, a thău chu LALPA ta dinga rimtui inhnik dingin raw’ng a tih. 7 An uiretna hlak kel limhaia kuoma chun an inthawi ding a ni ta nawh’ ti hih an thla peihai ding khoma an kumkhaw dan ding chu a nih” tiin.8 “Chun, hieng hin hril tawl rawh: ‘Israel mi amanih nangni laia hnam dang mi chênghai tu khomin pumraw thilhlân an inhlàn pha a, 9 Intuokna Puon in kot bula LALPA hmaah an hung inhlân si naw chun, chu mi chu a chipuihai laia inthoka tuithlàr a ni ngei ding a nih.
10 “‘Israel mi tu khom le anni laia chêng ram dang mi tu khom thisen fatu laka chun ka hmai sukthim ka ta, a chipuihai intuithlàrtir ka tih. 11 Thilhring hringna chu a thisenah a um si a, maichama in ta dinga inremna siemna dinga ka pĕk chêu a nih; hringna ta dinga inremna siemna chu thisen a ni si a. 12 Chu lei chun a nih Israelhai kuomah, ‘Tu khomin thisen in fak ding a ni nawh, nangni laia chêng ram dang mi khomin an fak ding a ni bok nawh’ tia ka hril chu.
13 “‘Israel mi tu khom le nangni laia chêng le ram dang mi tu khomin făk dinga ram sa amanih vate a pĕl chun a thisen chu hnuoiah infar kangtir vong a ta, chu chu pilin a vur khum ding a nih, 14 thilhring tin hringna chu a thisen a ni si a. Chu lei chun annawm Israelhai kuomah, ‘Thilhring taphot thisen in fak ding a ni nawh, thilhring hringna chu a thisen a ni si a; a fa taphot chu tuithlàr ding a nih’ ka ti chu.