3 “Aronin Hmun Thienghlim Tak sŭng a hung lŭt dan ding chu hieng ang hin a nih: suol ngaidamna thilhlâna ding bawngchal tuoi le pumraw thilhlâna ding beramchal a hung chawi ding a nih. 4 Puon zai inhmia siem zakuo thienghlim chu hâk a ta, a saruok inkhumna ding puon zai inhmia siem kekorte bun a ta, cheizemin a kawng hrèn a ta, puon lukawm kawm bok a tih. Hieng hi silfen thienghlim a ni a, a hàk hmain tui a’n sil hmasa zet ding a nih. 5 Israel pungkhawmhai chun an suol ngaidamna thilhlânah kelchal pahni le pumraw thilhlâna dingin beram pakhat an pĕk ding a nih.

6 “Aron chun ama puola suol ngaidamna thilhlâna dingin bawngchal hung inhlàn a ta, ama le a sunghai ta dingin inremna siempek a tih. 7 Chu zoah kèl pahni hung keiin Intuokna Puon ina chun LALPA hmaah hung thruoi bok a tih. 8 Kèl pahni chungchanga chun thrum vawr a ta, pakhat chu LALPA chanpuol ning a ta, pakhat chu suol phurtu^b chanpuol ning a tih. 9 Aron chun LALPA chanpuol kèl chu la’ng a ta, suol ngaidamna thilhlânah inhlàn a tih. 10 Suol phurtu chanpuola tlu kèl chu LALPA hmaah a hringin hung thruoi a ta, inremna siemna dinga thlalera suol phur hmangtu dingin a hringa insuo ding a nih.

11 “Aron chun ama puola suol ngaidamna thilhlân bawngchal chu hung kei a ta, ama le a sunghai ta dingin inremna thilhlânah inhlàn a ta, ama suol ngaidamna thilhlân bawngchal chu that a tih. 12 LALPA hmaa maichama inthokin mei lakna berbua chun meiling a sipin la’ng a ta, rimtui inhnik tak rawt dip thrûm hni leh puonzâr sung tieng chun lutpui a ta, 13 a thi nawna dingin, rimtui chu LALPA hmaah meia chun phul a ta, rimtui khu inzâm chun Thuthlung Bawm chunga zangaina thrungpha chu tuom vel a tih. 14 Bawngchal thisen iemani zat chu la’ng a ta, a kutpàr hmorin zangaina thrungpha hma tieng chu the’ng a ta; chu zoah a kutpâr hmor bokin a thren chu zangaina thrungpha chunga chun voi sari the’ng a tih.

15 “Chu zoa chun mipui ta dinga suol ngaidamna thilhlânah kèl chu that a ta, a thisen chu puonzâr sung tieng chun chawi a ta, bawngchal thisen a thaw dan ang khan thaw’ng a ta, zangaina thrungpha chunga le a hma tieng chun the’ng a tih. 16 Chuong ang chun Israel thlahai inthieng nawna le helna leiin, an suolna chu ieng po khom ni sien, Hmun Thienghlim ta dingin inremna siem a ta; chuong ang bokin an inthieng nawna huol vela um Intuokna Puon in ta ding khomin inremna a siem bok ding a nih. 17 Ama le a sungkuo le Israel hnam pumpui ta dinga inremna siem dinga Hmun Thienghlima Aron a lut lai le a hung suok nawk hmâ khat chun Intuokna Puon inah tu khom an um ding a ni nawh. 18 LALPA hmaah maichàma chun hung a ta, chu taka ding chun inremna siem a ta, bawngchal thisen le kel thisen iemani zàt chu lain maicham ki tina chun a vêlin tât a tih. 19 Chun, a kutpâr hmorin thisen chu voi sari the’ng a ta, inthien a ta, Israel thlahai chu an inthieng nawna laka inthok chun sukthienghlim a tih.

20 “Hmun Thienghlim le Intuokna puon in le maicham ta dinga inremna a siem zo chun kèl hring chu hung kei a ta, 21 a lu chunga chun a kut khing hnia innghatin, Israelhai rîtlona, helna le suolna po po chu insam a ta, kèl lu chunga chun innghat vong a ta, kel chu mawphurtu dinga ruot diem ta sa mi pakhat kuta chun pein thlalĕr tieng infetir a tih. 22 Kèl chun an suolna po po chu thlalĕr hmun reah phur a ta, chu taka chun insuo hmang a tih.

23 “Chu zoah Aron chu Intuokna puon inah lût a ta, Hmun Thienghlim a lŭt laia a silfen inbelhai kha hlîp a ta, chu taka chun maksan a tih. 24 Hmun Thienghlima chun insil a ta, a silfen pangngai inbel nawk a ta, hung suok a ta, ama puola pumraw thilhlân le mipui puola pumraw thilhlân chu inhlăn a ta, ama le mipui ta dingin inremna siem a tih. 25 Chun, suol ngaidamna thilhlâna thău chu maichămah raw bok a tih.

26 “Suol phurtu kèl inthlaa fe khan a silfenhai sawpa tui a’n sil zo hnungin riebûkah a hung lut chauh ding a nih. 27 Inremna siemna dinga Hmun Thienghlima an thisen Aronin a chawi lut, suol ngaidamna thilhlân bawngchal le kèl ruok chu khawhnawma fepui ding a na, a vun hai, a sa hai le a êk hai chu raw ding a nih. 28 A rawtu chun a silfenhai sawp a ta, insil a ta, chu hnungah riebûk tieng hung inlawi thei a tih.

29 “Hi hi in kumkhaw dan ding chu a nih: Thla sarina ni sawma chun ieng khom faa dawn loin, nangni le a ram mi rĕng amanih le ram dang mi nangni laia khawsahai khomin sin in thaw ding a ni nawh. 30 Hi ni hin nangni sukthienghlimna dingin in ta dingin inremna siem a ni ding a na, LALPA hmaa in suolna po po laka chun hung thienghlim in tih. 31 In ta dingin Sabat, chawl trok trokna ni a ni a, ieng khom tawk naw ro, chu chu in kumkhaw dan ding a nih. 32 Thiempu, a pa aia thiempu ni dinga hriek nàl le namnghet chun inremna siem a ta, puon zai inhmia siem silfen thienghlim chu inbel a ta, 33 Hmun Thienghlim puola dingin inremna siem a ta; Intuokna Puon in le maicham puola dingin inremna siem a ta, thiempu le mipuihai puola dingin inremna siem bok a tih. 34 An suolna po po leia Israelhai ta dinga kum tin inremna voi khat siem zie ding ti hi kumkhaw thupêk a nih” a ta. LALPAN thu a pek angin Mosie chun a thaw a.