Mihriema pût mi sukporchètu
15
1 LALPA chun Mosie le Aron a biek a, 2 “Israelhai kuomah hi thu hi hril ro: Pasal tu khomin a taksaah thil pût suok a nei chun, chu thil pût suok chu thil porchè a nih. 3 A taksaa inthokin a pût zing amanih a chât tah amanih a ni khomin, ama chu tirdakum a’n kaitir a nih. Thil pûtin mi a sukporchè dan chu hieng hi a nih:4 “‘Thil pût nei zàlna khum chu a sukporchè a, a thrungna taphot khom a sukporchê bok a nih. 5 A khum tawk taphot chun tuiin an puon sawpin an insil ding a nih; zan tieng chen porchè kâi an tih. 6 Tu khom thil pût nei inthrungna tawk taphot chun tuiin an puon sawpin an insil ding a nih; zan tieng chen porchè kâi an tih.
7 “‘Tu khomin thil pût neitu a tawk chun tuiin a puon sawpin a’n sil ding a nih; zan tieng chen porchè kâi a tih.
8 “‘Thil pût nei tu khomin mi porchè lo khom chil a sakkhum chun, chu mi chun a puonhai sawpin a’n sil ding a nih; zan tieng chen porchè kâi a tih.
9 “‘A chuongna iengkima a thrungna taphot chu a porchè a, 10 a thrung dè tawktu taphot chu zan tieng chen porchè kâi a tih. Chuong thilhai chawi sontu chun a puonhai sawpin tui a’n sil ngĕi ngêi ding a nih; zan tieng chen porchè kâi a tih.
11 “‘Thil pût neituin tuia a kut sawp fai loa mi a tawk taphot chun a puonhai sawpin tuiin a’n sil ding a nih; zan tieng chen porchè kâi a tih.
12 “‘Pil bêl a tawk a ni chun vuok koi ding a na, thinga siem a ni ruok chun tuia intleu fai vong ding a nih.
13 “‘Chun, thil pût neitu chu a thil pûta inthoka a hung fai chun inthienna dingin ni sari sung inbituk a ta, a puonhai sâwp a ta, vadung tuiah insil a ta, hung inthieng a tih. 14 A ni rietnaa vathru amanih parva pahni LALPA hmaah hung chawiin Intuokna Puon in kota chun hung a ta, thiempu hung pe’ng a ta, 15 thiempu chun pakhat chu suol ngaidamna dingin inhlàn a ta, pakhat dang chu pumraw thilhlânah hmang a tih. Chuong ang chun mi chu a thil pûtna laka chun LALPA hmaah inremna siempek a tih.
16 “‘Pasal chi a pût chun a pumin insil a ta, zan tieng chen porchè kâi a tih. 17 Puon amani savun amania chi hlek kai hrim hrim chu tuia sawp fai vong ding a nih. 18 Pasalin nuhmei a zalpuia a chi a pût chun an pahniin insil fai an ta, zan tieng chen porchè kâi an tih.
19 “‘Nuhmeiin a dan pangngai anga thi a nei chun, thla a pal zâta a porchè sung chu ni sari ning a ta, tu khom a tawk taphot chu zan tieng chen porchè kâi a tih. 20 A thla pal sunga a zàlna taphot chu porchè kâi a ta, a thrungna taphot khom porchè kâi bok a tih. 21 A khum tawk taphot chun a puonhai sawpin tuiin insil sien la, zan tieng chen porchè kâi a tih. 22 A thrungna tawk taphot chun a silfen sawpin tuiin insil fai sien, zan tieng chen porchè kai a tih. 23 Khum amanih ieng khom a thrungna taphot tawktu chu zan tieng chen porchè kâi a tih. 24 Pasalin a zalpui a, a thla pal thiin a tawk chun ni sari sung porchè kâi a ta, a zalna khum taphot chu porchè kâi bok a tih.
25 “‘A thla pal hun lai ni loa nuhmeiin thi sawt tak a nei amani le a thla pal hun sung nêka sawt a nei amani chun thla a pal lai ang bokin a porchè a nih. 26 A zàlna khum taphot amani le a’n thrungna taphot chu thla a pal hun lai ang bokin porchè kâi vong a tih. 27 A tawk taphot chun a silfen sawpin tuiin insil fai sien, zan tieng chen porchè kâi a tih.
28 “‘A thla pal a tawp pha leh ni sari sung inthienna dingin inbituk sien, chu hnung chun hung inthieng ta’ng a tih. 29 A ni rietna chun thiempu kuomah vàthrû an naw leh parva pahnih chawiin Intuokna Puon in kotah a hung ding a nih. 30 Thiempu chun pakhat chu suol ngaidamna thilhlânah inhlàn a ta, a pakhat dang chu pumraw thilhlânah inhlàn a tih. Chuong ang chun thisen a palna laka chun LALPA hmaah thiempuin inremna siempêk a tih.
31 “‘Israelhai chun anni laia ka chĕngna biekbŭk an sukporchè nawna ding le chu leia an thi pha nawna dingin, anni sukporchè thei thil laka inthokin i vong fihlim tawl ding a nih.