Vun inpăn sukfai dan
14
1 LALPA chun Mosie a biek a, 2 “‘Inthien dinga thiempu kuoma phâr in thruoi phaa in thaw dan ding chu hi hi a nih: 3 thiempu chu khaw dâiah feng a ta, phâr chu en a ta, a phâr hri a hung dam ta chun, 4 thiempu chun inthiena um ding kuoma chun vate hring lai pahni le sidar thing le pat zai sen le husawp kău hung chawi dingin thu pe’ng a tih. 5 Thiempu chun vate pakhat chu pil bela tui luong lai sung thar hlol chunga chun that dingin thu pe’ng a ta. 6 Chu zoah, tui chunga vate thisena chun vate hring lai chu sidar thing le pat zai sen le husawp le chun thiempuin zuk phûm a ta, 7 phâra inthoka inthiena um lu chunga chun voi sari thĕng a ta, a thienghlim thu puong a ta, vate hring chu ramah insuo’ng a tih.8 “‘Inthiena um ding chun a silfenhai sâwp a ta, a sam vaw kol a ta, tui insil a ta, chuongchun hung inthieng ta’ng a tih. Chu hnungah riebûkah hung lut thei a ta, sienkhom a puon in tuolah ni sari a riek phot ding a nih. 9 A ni sarinaa chun a sam a mêt nâm rìt ding a nih: a lu vaw kol a ta, a khâkhmul le a mitko hmul le a hmul dang po po khom a vaw nâm rǐt ding a nih. A silfĕnhai sâwp a ta, insil fài a ta, hung inthieng ta’ng a tih.
10 “‘A ni riet ni chun beramchal tuoi pahni le beramla tuoi pakhat, kum khata upa, hmêl hem lo le beiphit indip tak, kilogram thum, hrieka hmet le hriek litar hmun thuma threa hmun khat a hung chawi ding a nih. 11 Intuokna Puon in kota chun a’n thieng tah ti puongtu thiempu chun inthiena um ding le a thilhlânhai chu LALPA hmaah sieng a tih.
12 “‘Chu zoah thiempu chun beramchal tuoi pakhat le oliv hriek litar hmun thuma threa hmun khat chu suol ngaidamna hlănbieka dingin inhlăn a ta, thĕn thilhlânin LALPA hmaa chun thên a tih. 13 Pumraw thilhlân le suol ngaidamna thilhlân an thatna hmun thienghlima chun beramchal tuoi chu an that ding a nih. Suol ngaidamna thilhlân chu thiempu chanpuol a ni ang bokin bawsiet ngaidamna thilhlân khom thiempu chanpuol a nih; thil thienghlim tak a ni si a. 14 Bawsiet ngaidamna thilhlân thisen chu thiempu chun la’ng a ta, inthien ding chang tieng natila dam, kutpui le kepuia dam nàl a tih. 15 Hriek no khata inthok chun thiempu chun hriek la’ng a ta, ama kutpha voi tieng chun sung a ta, 16 a kut chang tieng hmor chu a kutpha voi tienga hrieka chun phûm a ta, hriek chu LALPA hmaah a kutpăr chang tieng chun voi sari thĕng a ta, 17 a voi tieng kuta hriek la um chun inthien ding chang tieng natil, kutpui le kepuia bawsiet ngaidamna thilhlan thisen a nălna chunga chun năl a tih. 18 Chun, a kuta hriek la um po chu thiempu chun inthien ding lu-ah năl a ta, LALPA hmaah inremna siempêk a tih.
19 “‘Chu zoah thiempu chun suol ngaidamna thilhlân chu inhlăn a ta, a thienghlim nawna leia inthiena um ding ta ding chun inremna siempĕk a ta, pumraw thilhlân chu that a tih. 20 Pumraw thilhlân le bu le bâl thilhlân chu maichăma chun thiempuin inhlăn a ta, inremna siempêk a ta, hung inthieng tang a tih.
21 “‘A rethei leia chuong ang chu a thaw zo naw a ni chun, inthienna thilhlânah beram tuoi pakhat, bawsiet ngaidamna thilhlân dingin hung chawi a ta, suol ngaidamna dingin thĕnin inhlăn a ta, chu ruol chun beiphit indip tak, kilogram khat, hriek le hmet pol le oliv hriek litar hmun thuma threa hmun khat chu in hlăn sà bok a tih. 22 Vàthrû pahnih amani parva pahnih, a nei thei lem lem chawi bok a ta, pakhat chu suol ngaidamna dingin, pakhat dang chu pumraw thilhlâna dingin inhlăn a tih.
23 “‘A ni riet ni chun inthienna thil ding chu thiempu kuomah Intuokna Puon in kotkhar bula chun LALPA hmaah a hung chawi ding a nih. 24 Thiempu chun bawsiet ngaidamna thilhlàn beramte chu hriek no khat leh la’ng a ta, thĕn thilhlânah LALPA hmaah thên a tih. 25 Bawsiet ngaidamna thilhlân beramte chu that a ta, a thisen chu thiempuin la’ng a ta, inthien ding chang tieng natila dam, kutpui le kepuia dam chun năl a tih. 26 Hriek no khata inthok chun thiempu chun hriek la’ng a ta, ama kutpha voi tieng chun sung a ta, 27 a kut chang tieng hmor chu a kutpha voi tienga hrieka chun phûm a ta, hriek chu LALPA hmaah a kutpàr chang tieng chun voi sari the’ng a ta, 28 a voi tieng kuta hriek la um chu inthien ding chang tieng natil, kutpui le kepuia bawsiet ngaidamna thisen a nălna chunga chun năl a tih. 29 Thiempu chun a kuta hriek la um po chun inthien ding lu chu nălin, LALPA hmaah inremna siempêk a tih. 30 Chun, vàthrû amanih parva amanih a nei thei lem lem chu a’n hlân bok ding a nih. 31 Pakhat chu suol ngaidamna thilhlan ning a ta, pakhat dang chu pumraw thilhlân ning a ta, chu chu bu le bâl thilhlân leh inhlànin, inthiena um ding chu thiempuin LALPA hmaah inremna siempêk a tih. 32 Hi hi phâr hri invoi inthienna dinga a tlin zo naw hai ta dinga dàn chu a nih” tiin.
In sŭnga phâr hri
33 LALPA chun Mosie le Aron a biek a, 34 “Hluo dinga ka pĕk chêu Kanan ram in hluo hunah, chu rama chun inah hmuor hri inkai olsam tak el ka sie a nih. 35 A in neitu chun thiempu kuomah fein, ‘Ka inah phâr hri ni awm tak ka hmu a’ tiin hril raw se. 36 Hri en dinga thiempu a lut hmain in sunga thil ieng khom tirdakuma a puong sa nawna dingin in chu sukruok vong dingin thiempu chun thu pe’ng a ta, an sukruok vong pha leh en fie dingin thiempu chu lût a tih. 37 Thiempu chun banga thil hmuor chu en dik a ta, a hmuorna hmun chu indêp bik met a, a rong chu a hring amanih a sen deu a, a hri chun bang zŭtna thuo nêka inthûkah zung a thlâk nia a hriet chun, 38 in chu thiempu chun in chu kotpui tieng suoksan a ta, ni sari sung khâr a tih. 39 Ni saria chun thiempu chun in chu hung en nawk a ta, thil hmuor chu bangah a’n zàm dar a ni chun, 40 a hri bawmna lung bang chu invuok thlăktir a ta, lung chu khawhnâwm hmun tirdakuma pei dingin thu pe’ng a tih. 41 In sung tieng bang zŭtna po po chu inkhok thlaktir vong a ta, khok thlak po chu khawhnâwm hmun tirdakumah inpeitir bok a tih. 42 Lung thar la’ng an ta, chu chun thlak an ta, pil thar la’ng an ta, a puo chu zût an tih.
43 “‘Lung bang an lak hmang chu a thara thlâk a, pil thara an zŭthnung khoma a hmuor a hung inlang nawk a ni chun, 44 thiempu chun en fel nawk a ta, thil hmuor chu inah a hung inzăm dar nawk a ni chun phar hri trium a ni a, in chu tirdakumah puong a tih. 45 In chu thriek fai vong a, a lung, a thing le a chărna po po chu khaw puo tieng lak suok a, hmun tirdakuma pei ding a nih.
46 “‘Tu khom chu in an khăr sŭnga lût hrim hrim chu zan tieng chen tirdakum kâi a tih. 47 Chu ina riek le bu fa taphotin an puonhai an sawp ding a nih.
48 “‘Amiruokchu, thiempuin a hung en nawk a, a bang zûtnaah hmuor hri a hung inlang ta naw chun, hmuor hri chu a bo tah tǐna a ni a, chu in chu a’n thieng tah ti thiempuin puong a tih. 49 Inthienna dingin vate hring lai pahni le sidar thing le pat zâi sen le husawp kău a hung chawi ding a nih. 50 Thiempu chun vate pakhat chu pil bêla tui sung thar hlol chunga chun that a ta. 51 Chu zoah, tui chunga vate a that thisena chun vate hring lai chu sidar thing le pat zâi sen le husawp le chun thiempuin phûm a ta, in chu voi sari the’ng a tih. 52 Vate thisen, tui thar, vate hring, sidar thing, husawp le pat sen làr chun in chu inthien a ta, 53 chu zoah vate hring chu khaw puo tieng ramah insuong a ta, chuong anga inremna a siempek hnung chun in chu hung inthieng ta’ng a tih.