4 “‘A vun puorna lai chu vâr sien khom a mithi vun nêka inthûka inlang loa, a hmul khom a vâr bok naw chun hri invoitu chu thiempuin ni sari khum hrang a tih. 5 Ni sarinaah en nawk a ta, a ngâi zingin a hmu a, a hrî chu a’n zăm dar naw chun ni sari dang la khum hrang nawk a tih. 6 Ni sarinaa chun thiempuin en nawk a ta, a puorna chu a hung kiem a, a vunah a’n văk dar naw chun, pang puor naran a ni leiin, ama chu a’n thieng ti thiempuin puong a tih. Ama chun a silfenhai sawp sien la, hung inthieng ta’ng a tih. 7 Amiruokchu, inthienna dinga thiempu a’n entir hnunga a vun hri chu a hung indar chun, thiempu kuomah a va’n entir nawk ding a nih. 8 Thiempu chun lo en nawk a ta, a vunah a kâi dar chun inkai thei hri invoi a na, ama chu tirdakum kai a nih.

9 “‘Tu khom vun hri inkai thei invoi chun thiempu kuomah fein a’n entir ding a nih. 10 Thiempu chun a vun puorna lai chu a hung văr le văr naw, a hmul chu a hung văr le văr naw le a vunah vûng thar a um le um naw lo en a ta, phâr benvon invoi a ni chun thiempuin tirdakum kaiah puong a tih. 11 Tirdakum kai a ni dĕr ta leiin khum hran ding a ni ta nawh.

12 “‘A vun hri chu a pang po poah indar a, thiempu hmu thei chinah, a lua inthoka a ke chen a tuom ta chun, 13 thiempu chun en fel a ta, a pang po po a tuom suok vong tah chun ama chu a’n thieng tah ti a puong ding a nih. A puma a’n khek văr ta leiin a’n thieng a nih. 14 A vun a hung inraw thar nawk ruok chun tirdakum a kai a nih. 15 Vun inraw thar chu tirdakum, phâr hri kai a ni leiin thiempuin a vun inraw thar a hmu charin tirdakum kaiah a puong ding a nih. 16 A vun inraw thar chu a hung danglam a, a hung vâr ruok chun thiempu kuomah fe raw se. 17 Thiempu chun lo en a ta, a vun inraw chu a hung văr chun hri invoitu chu tirdakum kai loah puong a ta, hung inthieng a tih.

18 “‘Pangah khuoihli a suok a, a hung dam a, 19 khuoihli umna chu dâng hlûpin amanih dâng sen deuin amanih a hung invŭng chun thiempu hmaah inlang raw se. 20 Thiempu chun lo en a ta, a hri chun a mithi vun nêka inthŭkah bû a khuor nia a hriet a, a hmul a hung vâr bok chun ama chu tirdakum kaiah a puong ding a nih. Chu chu inkai thei phâr hri, khuoihli sera hung truong suok a nih. 21 Amiruokchu, thiempuin a en fel a, hmul văr a um naw a, a zung chu mithi vun nĕka inthûk lo a ni a, a’n vŭng chu a triem ta bok chun, thiempuin ama chu ni sari sung khum hrang a tih. 22 Vunah a’n zăm dar chun, thiempuin tirdakum kaiah a puong ding a nih, hri invoi a ni si a. 23 A umna inson lo a, a’n văk dar naw chun khuoihli ser tìna a na, thiempuin tirdakum kai loah a puong ding a nih.

24 “‘Tu khom a vun a kăng a, a kăng inlăwngna lai chun a dâng sen deu amanih, a vâr amanih a hung puor suok chun thiempuin lo en a ta, 25 a puorna lai tak chu a vâr a, a mithi vun nĕka inthûka a’n lang chun phâr a ni a, a kăngnaa inthok chun a hung inphăr suok a nih. Thiempu chun tirdakum kaiah a puong ding a nih, phâr hri invoi a ni si a. 26 Amiruokchu, thiempuin a lo en a, a hung inbăwkna hmuna khan a hmul văr a um naw a, a mithi vun nĕka inthûk lo a ni a, a puor chu a triem ta bok chun, thiempuin ni sari sung khum hrang a tih. 27 Chun, ni sari hnungah thiempuiin lo en nawk a ta, a vunah a’n zăm dar chun, thiempuin tirdakum kai a nih ti puong a tih, hri a ni si a. 28 A puor chu a umna pangngaiah a um zing a, vunah invâk dar lo a, a triem ta bok chun, mei kăng leia puor a ni leiin thiempuin tirdakum kâi loah puong raw se, mei kăng ser chauh a ni si a.

29 “‘Nuhmei khom pasal khomin a lu amanih khâkah pânna a nei chun, 30 thiempuin en fel a ta, a zung chu a mithi vun nĕka inthûk lema inlang a, chu taka chun a hmul eng chîn tak a um chun thiempuin tirdakum kaiah a puong ding a nih. Chu chu lu thak, pupangliek a na, lu le khâk hmula inbuot hri um a nih. 31 Thiempuin pupangliek hri chu a en a, a zung chu a mithi vun nĕka inthûk loin inlang sien khom a hmul dum a um naw chun thiempuin ama chu ni sari sung khum hrang a ta, 32 ni sari zoah thiempuin en nawk a ta, pupangliek chu indar lo a, a hmul eng um lo a, a hri zung chu a mithi vun nĕka inthŭk loa a’n lang chun, 33 a pan umna bul vel chu met kol a ta, ni sari dang khum hrang nawk a tih. 34 Ni sari hnungah pupangliek chu en nawk a ta, a vunah indar lo a, a zung chu a mithi vun nêka inthŭk lema a’n lang naw chun, tirdakum kâi loah thiempu chun a puong ding a nih. Ama chun a silfenhai sawp sien la, hung inthieng ta’ng a tih. 35 Inthienga puong a ni hnungin a lu inbuot hri chu a hung indar chun thiempuin en nawk a ta, 36 a lu inbuot hri chu a’n zăm dar chun thiempuin a hmul eng zong buoi ngai ta loin ama chu tirdakum kâiah a puong nghal ding a nih. 37 Amiruokchu, a hmu danin indar lo a, a’n thakna hmunah sam dum a hung mawng chun phâr chu a dam tah a, a’n thieng a, thiempuin tirdakum kai loah a puong ding a nih.

38 “‘Nuhmei khom pasal khom a vunah thil vâr kak a um chun thiempu kuomah inentir sien la, 39 a vâr dal deu chun vun puor naran, trium lo a na, ama chu a’n thieng a nih.

40 “‘Pasal sam a tril a, a lu a kol chun a’n thieng a nih. 41 A bâwk sam a tril a, a chal a’n lang vong chun a’n thieng a nih. 42 Amiruokchu, a chal kol amani a lu kol amania thil sendang deuh a hung puor suok chun a lu le chal vunah phâr hri a hung suok a na, 43 thiempuin ama chu en fel a ta, a lu le a chala puor chu a sen har chun, ama chu phâr a ni a, 44 tirdakum a kai ti thiempuin puong a tih, a luah phâr hri a um lei chun.

45 “‘Chuong ang natna inkai thei phâr hri neitu chun silfen triek hâk a ta, a sam hla thur a ta, a hmâi chenve, a khâk tieng chu tuom a ta, “Phâr ka nih, phâr ka nih” tiin a khêk ding a nih. 46 Phârin a bawm sung chu tirdakum a nih. Khawhnawmah a um hran ding a nih.

47 Sil le fen ieng khom, sahmul amanih patpuon thra chi amanih, 48 patpuon khawng amanih, sahmul phier amanih, savun le savuna inthoka siem thil rêng rĕng a hung hmuor a, 49 chuong khawng le phier le savuna inthoka siem thilhai hrim hrim chu a rong a hung sen amanih a hung hring chun a hmuor hrikin a fâk a na, thiempu kuoma inentir ding a nih. 50 Thil hmuor chu thiempuin en fel a ta, a hmuor po chu ni sari sung sie hrang a tih. 51 Ni saria chun en nawk a ta, a hmuor hri chu silfen a khawnga khawng dam, phiera phier dam, sahmula dam, puon zai inhmia dam, savun siem chi hrim hrima dam a kai zap chun, chu hri chu phâr nghet tak chi a na, tirdakum a nih. 52 Silfen chu khawng amanih, phier manih, sahmul amanih, patpuon innĕm amanih, savuna siem chi hrim hrim amanih khom ni sien, phâr hri kaina taphot chu raw hmang vong ding a nih.

53 Chun, silfen khawng amanih, phier amanih, savun hmanga siem hrim hrimah hmuor hrî a kâi zap a, 54 a hmuorna lai chu a hring deu amanih sen deuh amania a hung inlang chun hmuor indar hrât chi a ni leiin a hmuorna lai chu thiempuin insawptir a ta, ni sari sie hrang a tih. 55 A hmuorna lai chu sawp hnungin thiempuin en fie nawk a ta, a hmuor chu a bo chuong naw chun, hmun dangah kai zap naw sien khom, thil tirdakum a ni leiin meia raw ding a nih. 56 Thiempuin a en fie a, a hmuorna lai chu sawp hnunga a hung da ta khomin, puon amanih, savun amanih le a phiera phier chi rêng rĕnga a hmuorna lai chu ât thlăk ding a nih. 57 Amiruokchu, silfen khawng amanih phier amanih le savuna siem ienga khom a hmuor a hung inlang nawk chun, meia raw hmang ding a nih. 58 Chun, silfen khawng amanih, phier amanih, savuna siem ieng khom i sâwp a, a hmuor a bo chun săwp nawk ding a nih, chuongchun hung inthieng tàng a tih. 59 Hi hi silfen, sahmul amanih patpuon, a khawnga khawng amanih, a phiera phier amani le savuna siem hrim hrim amania a hmuor hri um chu a tirdakum le tirdakum lo puong dan ding thua danhai chu an nih” tiin.