Aron hlănbiekna
9
1 A ni riet ni chun Mosien Aron le a naupahai le Israel upahai chu a ko khawm a. 2 Aron kuoma chun, “Suol ngaidamna thilhlâna dingin bawngchal tuoi le pumraw thilhlâna dingin beramchal, hmêl hem lo ve ve chu LALPA hmaah hung inhlăn rawh. 3 Chun, Israelhai kuomah hieng hin hril rawh: ‘Suol ngaidamna thilhlâna dingin kelchal, pumraw thilhlâna dingin bawng tuoi le beram tuoi hmêl hem lo, kum khata upa ve ve dam, 4 inremna thilhlâna dingin bawngchal le beramchal hai chu hriek le chokpol bu le bâl thilhlânhai le chun LALPA hmaa inhlăn dingin hung la ro. Voisun hin in kuomah LALPA a hung inlang ding a nih’ tiin hril rawh” a ta.5 Mosien thaw dinga thu a pĕk thilhai chu Intuokna Puon in hmaa chun an hung chawi a, pungkhawm po po chun an va hnai a, LALPA hmaa chun an ngǐr a. 6 Mosie chun an kuomah, “LALPA ropuina chu nangni lai a hung inlang theina dingin hi hi a nih LALPAN thaw dinga thu a pĕk chêu kha” a ta.
7 Mosie chun Aron kuomah, “Maichăm hung hnai la, LALPA thupĕk angin i suol ngaidamna thilhlân le pumraw thilhlân chu inhlăn la, nang le mipui ta dingin inremna siem la; chun, mipuihai thilhlăn chu inhlăn la, an ta dingin inremna siem rawh” a ta. 8 Aron chun maichăm a va hnai a, ama puola suol ngaidamna thilhlân bawngchal tuoi chu a that a. 9 Ran thisen chu a naupahaiin an hung pĕk a, thisena chun a kutpăr hmor a phŭm a, maichăm kia hai chun a tât a, thisen chu maichăm bula chun a bun thlak a; 10 LALPAN Mosie thu a pĕk ang khan, suol ngaidamna thilhlân a thău hai, a kal hai, a thin tuomtu duorda hai chu maichăma chun a raw a. 11 A sâ le a vun ruok chu khawhnăwmah a raw a.
12 Chu zoah pumraw thilhlân chu a that a. A nauhai chun ran thisen chu an hung pĕk a, maichăm sir vêl tinah a thè a. 13 Pumraw thilhlân chu a tlang tlangin an hung pek a, a lu le chun maichàmah a raw a. 14 A kawsung le a kehai chu tuiin a sawp a, maichàma pumraw thilhlân chunga chun a buk a.
15 Aron chun mipuihai thilhlàn ding chu a hung kei a. Mipuihai suol ngaidamna thilhlân kèl chu a that a, a hmaa mi ang bok khan, suol ngaidamna dingin a’n hlăn a. 16 Pumraw thilhlân chu a hung chawi a, a dăn ang takin a’n hlàn a. 17 Bu le bâl thilhlân khom chu a hung chawi a, vei khat a lâk a, zing tienga pumraw thilhlân leh chun, a raw a. 18 Chun, mipui puola inremna thilhlân bawngchal le beramchal chu a that bok a, Aron naupahai chun a thisen chu an hung pèk a, maichăm chu a vêlin a thè a. 19 Bawngchal thâu le beramchal thâu hai, a ngùm thâu tak hai, a rîl thâu hai, a kal hai, a thin tuomtu duorda hai chu an hung pêk bok a, 20 a thăuhai chu a ir chunga chun a sie a, Aron chun maichămah a raw a. 21 Mosien thu a pĕk angin, a ir le a chang tieng mal chu thĕn thilhlâna dingin Aron chun LALPA hmaah a thên a.
22 Chu zoah Aron chun mipui tieng bân a phar a, mal a sawm tawl a. Suol ngaidamna thilhlân, pumraw thilhlân le inremna thilhlânhai a’n hlàn zo chun a hung trum a. 23 Mosie le Aron chu Intuokna Puon ina chun an lŭt a, an hung suok nawk chun mipuihai chu mal an sawm a, LALPA ropuina chu mipuihai hmaa chun a hung inlang a. 24 LALPA hmaa inthok chun mei a hung suok a, mei chun maichăma pumraw thilhlânhai le thăuhai chu a kăng hmang ta vong a. Chuong thil po po mipuiin an hmu chun lawmin an khĕk a, an bokkhup a.