5 Mosie chun pungkhawmhai kuomah, “Hi hi thaw dinga LALPAN thu a pĕk chu a nih” a ta. 6 Mosie chun Aron le a naupahai chu a hung thruoi a, dan angin tui a’n siltir tawl a. 7 Aron chu zakaw hnuoi le korfuol an hăktir a, kâwngchŭn a’n chŭntir a, a chunga chun thiempu zakuo efod chu a’n hăktir a, mawi taka khawng thiempu zakaw hrĕnna cheizem chun a hrĕn de a. 8 A chunga chun awmbel a bel a, chu taka chun Urim le Thummim a zep a. 9 LALPAN thu a pĕk angin, Mosie chun Aron chu lu a’n kawmtir a, a lukawm hma tieng chun rangkachak phêk thienghlim ‘LALPA PUOL’ ti inziek chu a bel bok a.

10 Chun, Mosie chun năl chi hriek chu a lâk a, biekbŭk le a sûnga iengkim chu hriek a năl a, a’n hlăn thienghlim a. 11 Maichăm chunga chun hriek iemani zat chu voi sari a thè a, maichăm le a bûr le bĕl po po le maihŭn le a thrut chu hriek a nâl vong a, a’n hlăn thienghlim bok a. 12 Hriek iemani zat chu Aron luah a buok a, hriek nălin a ser hrang a. 13 Chu zoah Aron naupahai chu a hung thruoi a, zakuo a’n hàktir a, cheizem a’n zemtir a, lu an kawmtir a, a kuoma LALPAN a hril ang takin a thaw a.

14 Chu zoah suol ngaidamna thilhlân ding bawngchal chu a hung kei a, Aron le a naupahai chun bawngchal luah kut an innghat a. 15 Mosie chun bawngchal chu a that a, a thisen iemani zăt a lâk a, maichăm sukthiengna dingin ran thisen chu maichăm ki tina chun a kutpàrin a tât a. Thisen dang po chu maichăm bula chun a bun thlăk a. Chuong ang chun maichăm chu inthienin a’n hlăn thienghlim a nih. 16 Mosie chun a kawsung thău po po, a thin tuomtu duordahai le a kalhai le a bawmtu thăuhai chu a lâk a, maichăma chun a raw a. 17 Bawng vun le a taksa le a êk hai ruok chu, LALPAN Mosie kuoma thû a pĕk angin, khawhnăwmah a raw a.

18 Chu zoah pumraw thilhlâna dingin beram chal a hung kei a, Aron le a naupahai chun beram lua chun kut an innghat a. 19 Mosie chun beramchal chu a that a, a thisen chun maichăm chu a vêlin a thè a. 20 Beram chu a chan nawi a, a lu le a thău leh a chan nawi po po chu a raw a. 21 A kawsung le a kehai chu tuiin a sawp fai a, LALPAN Mosie kuoma thu a pĕk angin, beram chu maichàma chun pumraw thilhlânah arêngin a raw vong a; chu chu LALPA ta dinga meia thilhlân, rim inhnik chu a nih.

22 Beramchal dang, ser thiengna beram chal chu a hung kei nawk a, Aron le a naupahai chun a luah kut an innghat a. 23 Mosie chun a that a, a thisen chu a lâk a, Aron chang tieng natil le a chang tieng kutpui le kepuia hai chun a năl a. 24 Mosie chun Aron naupahai chu a hung thruoi a, an chang tieng natil le kutpui le kepui senga chun thisen chu a nàl bok a. Maichăm sîr vêl tina chun thisen chu a thè a. 25 A thău po po, a ngŭm thău dam, a kawsung thău po po dam, a thin tuomtu duorda dam, a kalhai le a tuomtu thău le a chang tieng mal chu a lâk a. 26 LALPA hmaa bei bawm, chol thrang lo bei sienaa inthok chun hriek le siem bei le beiper inphăn a lâk a, chuonghai chu a thăuhai le a chang tieng mal chunga chun a sie a. 27 Hienghai po po hi Aron le a naupahai kutah a’n hlàn a, LALPA hmaa chun thĕn thilhlân dingin a thên a. 28 Chu zoah an kuta inthokin Mosien a lâk nawk a, pumraw thilhlân chungah maichăma chun a raw a; chu chu LALPA ta dinga meia thilhlân, ser thiengna rim inhnik chu a nih.

29 Mosie chun ser thiengna beramchal ir chu a lâk a, LALPAN thu a pèk angin, LALPA hmaa thĕn thilhlâna dingin a thên a, chu ser thiengnaa thilhlân beramchal chu Mosie chan a nih. 30 Mosie chun năl chi hriek le maichàma ran thisen chu a lâk a, Aron le a silfenhai le a naupahai le an silfĕnhai chu a thè a. Chuong ang chun Aron le a silfĕnhai le a naupahai le an silfĕnhai chu a’n hlàn thienghlim a nih.

31 Mosie chun Aron le a naupahai kuomah, “A sâ chu Intuokna Puon in kotah suong unla, thupêka ‘Aron le a naupahai chun fa’ng an tih’ ti ang khan, ser hrangna thilhlân bawma bei leh chun, chu taka chun fa ro. 32 Sâ le bei fak bânghai chu in raw ding a nih. 33 In inser hrang hunin ni sari a àw ding a ni leiin, a hun a kim hma ni sari sung chun Intuokna Puon in suoksan naw ro. 34 Inremna siempêk ding chêua LALPAN thu a mi pĕk chu voisun hin ei thaw a nih. 35 Intuokna Puon in kotkhar bula chun ni sari sŭng, sŭn le zăn um zing in ta, in thi nawna dingin LALPA thupĕk chu in zawm ding a nih, chuong anga thu chu pĕk ka ni si a” a ta. 36 Chuongchun, LALPAN Mosie hmanga thaw dinga thu a pĕk po po chu Aron le a naupahai chun an thaw a.