Bawsietna thilhlân
7
1 “Hieng ang hi bawsiet ngaidamna thilhlân thaw dan ding chu a nih, chu chu thil thienghlim tak a nih. 2 Pumraw thilhlân an thatna hlak hmuna chun bawsietna thilhlân khom that ding a na, a thisen chu maichăm sîr tinah thè ding a nih. 3 A thăuhai po po, a ngŭm thău dam, a kawsung thău dam, 4 a kal pahnihai le a diemnem vela thău dam, a kalhai thrangsain a thin tuomtu thău po po hai chu inhlăn vong ding a nih. 5 Chuonghai chu thiempuin LALPA ta dinga meia thilhlânah maichăma chun a raw ding a nih, chu chu bawsiet hlănbiekna a ni si a. 6 Thiempu sungkuoa mi pasal taphotin a sâ fa thei an ta, sienkhom hmun thienghlimah an fak ding a nih, thil thienghlim tak a ni si a.7 “Bawsiet ngaidamna hlănbiek chu suol ngaidamna hlănbiek leh a thaw dan thuhmun a nih. Chu taka inremna siempêktu thiempu chun hlănbiekna thilhlân chu chang a tih. 8 Mi tu khom ta dinga pumraw hlănbiekna inhlănpêktu thiempu chun a vun chu chang bok a tih. 9 Bu le bâl thilhlân, thuka ur amanih, bêla suong amanih le thlengdâra ur amanih chu a’n hlăntu thiempu chanpuol a na, 10 bu le bâl thilhlân, hriek le chokpola hmet amanih le beiphit hulhal hrim hrim chu Aron naupahaiin an insem tlàng ding a nih.
Inremna thilhlân
11 “LALPA kuoma inremna hlănbieka thil inhlăn dan ding chu hieng ang hin ning a tih. 12 Lawmthu hrilna hlănbiek a ni chun lawmna thilhlân leh hrieka hmet chol thrang lo bei amanih, chol thrang lo beipĕr inphân tak amanih, beiphit le hriek chokpola hnĕ taka hmet amani chu a’n hlàn sà ding a nih. 13 Hi lawmthu hrilna thilhlâna hin chol thranga siem bei a’n hlăn sa bok ding a nih. 14 Hieng thilhlân tina pakhat seng chu LALPA ta dingin thĕn thilhlânah inhlăn a ta, chu chu inremna thilhlâna thisen thêtu thiempu chun chang a tih. 15 Lawmna chunga inremna thilhlân sa hi inhlăn ni ngèi ngéia fak zo ding a nih; a zing chena dinga hlà awi a ni nawh.
16 “Amiruokchu, a thilhlân chu thu tiemna ding amanih, mani nuom thua thil inhlăn amanih a ni ruok chun, hlănbiekna sa fak mahla chu a zinga chen la fak thei a nih. 17 A ni thum ni chena hlănbiekna sa fak bâng la um ruok chu raw vong ding a nih. 18 Inremna thilhlân sa chu a ni thum ni chena a fak chun a hlănbiekna chu pom ni naw ni a; a’n hlăntu thil inhlăn chu thil inhlăna ngai ni bok naw nih, thil porchè a ni si a. A fatu tu khomin a maw chu phur a tih.
19 “Chun, hlănbiekna sa chun ser le sang thila porchea ngai thil hrim hrim a tawk chun fak ding a ni nawh; raw hmang ding a nih. Hlănbiekna sa dang chu a fa thei dinga ngaihai chauin an fak ding a nih. 20 Mi porchè tu khomin inremna thilhlâna LALPA chanpuol sa a fâk chun, ama chu a chipuihai laia inthoka tuithlăr ding a nih. 21 Mi tu khomin thil porchè, mihriema thil porchè amanih, sa porchè amanih, tirdakum thil porchè hrim hrim a tawk a, inremna thilhlâna LALPA chanpuol sa a fâk chun ama chu a mihai laia inthoka tuithlăr ding a nih.
Thau le thisen fâk khapna thu
22 LALPA chun Mosie a biek a, 23 “‘Bawng thau amani, beram thau amani le kèl thau amani chu in fak ding a ni nawh. 24 A thi saa hmu ran thau le sahuoi se hlum sa hrim hrim chu thil dangah hmang thei in ta, făk ruok chu in făk ding a ni nawh. 25 Tu khom LALPA kuoma meia inhlăn ding sa thau fatu chu a mihai laia inthoka tuithlăr ding a nih. 26 Khaw lai hmuna khom um inla, vate amanih sa amanih thisen hrim hrim in fak ding a ni nawh. 27 Tu khomin thisen a fâk chun a mihai laia inthoka tuithlăr ding a nih’ tiin Israelhai kuomah hril rawh,” a ta.
Thiempuhai chanpuol
28 LALPA chun Mosie kuomah, 29 “Tu khom LALPA ta dinga inremna thilhlân hung chawitu chun a thil hung chawi laia mi a thren chu LALPA kuomah a’n hlàn ding a nih. 30 LALPA ta dinga mei hmanga thil inhlăn chu a kutin hung chawi a ta, a thău chu a ir pumin hung chawi bok a ta, a ir chu thĕn thilhlâna dingin LALPA hmaah a thên ding a nih. 31 A thâu po chu maichămah thiempuin raw’ng a ta, a ir ruok chu Aron le a naupahai chanpuol a nih. 32 Inremna thilhlâna a mal chang tieng chu thĕn thilhlânah thiempu kuomah in pek ding a nih. 33 Aron naupa, inremna thilhlâna thisen le thău inhlăntu chun a chang tieng mal chu a chang ding a nih. 34 Israelhaiin inremna thilhlân an inhlăn chănga a ir le a chang tieng mal ka kuoma thêna an hung inhlăn po po chu Aron le a naupahai chanpuol ni rop dingin ka pêk suok a nih ti hi Israelhai kuomah hril rawh” a ta.
35 Hieng hi LALPA ta dinga meia thilhlân, Aron le a naupahaiin LALPA thiempu nia a rong bawl dinga an inhlăna inthoka an chanpuol dinga ruot chu a nih. 36 Hriek năl an nia inthoka suon la hung um pei dinga khom, chu chu an chanpuola Israelhaiin an pêk rop dinga Pathien thupêk a nih.
37 Chuongchun, hieng hi pumraw thilhlân dam, bu le bâl thilhlân dam, suol ngaidamna thilhlân dam, bawsiet ngaidamna thilhlân dam, ser hrangna thilhlân dam le inremna thilhlân dama in hlànbiek dan ding chu a na, 38 chuonghai chu Sinai thlalera LALPAN Mosie kuoma thihlân hung chawi dinga Israelhai a hril truma a thupêkhai chu an nih.