6
1 LALPA chun Mosie a biek a, 2 “Tu khomin LALPA lakah thil suol thaw a, ringum lo taka um a, tuolbawmhaiin a kuoma thil an dăndĕ amanih le inkoltir chungthu amanih, thil inhmang thu amaniah mi hlĕm a, 3 mi thil inhmang hmu sia hmu lo anga inhril a, khêla inkhâm a, mihaiin suol an thaw hlak hrim hrim laia a ieng khom a thaw chun, 4 suol a thaw leia thiem naw a chang pha leh a thil inrŭk le lăklui po pohai, miin thil an inkoltir po pohai, mi thil inhmang a hmuhai, 5 an naw leh khêla a’n khàmna thil po pohai chu a pêkkîr vong ding a nih. A kima a rul bakah hmun ngaa threa hmun khat hù chawi belsa’ng a ta, thiem naw ngaidamna thilhlân a’n hlàn niin a neituhai kuomah a pêkkîr vong ding a nih. 6 A bawsiet man tlăkna dingin LALPA hmaah thiempu kuomah thiem naw thilhlân dingin beram ruol laia mi beram chal, hmêl hem lo hung kei a ta, a bawsietna man hù zàt sum hung chawi bok a tih. 7 Thiempuin LALPA kuomah inremna thilhlàn inhlànpêk a ta, thiem naw changna thil a thaw po po lakah ngaidamin um a tih.
Pumraw thilhlân
8 LALPA chun Mosie a biek a, 9 “Aron le a naupahai kuomah hi thupêk hi hril rawh: ‘Hieng hi pumraw thilhlân phaa an thaw dan ding chu a nih: pumraw thilhlân chu maichăm chunga a răwnaa chun zankhuoin, a tùk zing chenin a um a ta, zankhuoin maichăma mei chu a mit ding a ni nawh. 10 Thiempu chun puon zai inhmia siem silfen inbel a ta, a saruokna inkhumtu dingin puon zai inhmia siem kekor hnuoi bun bok a ta, pumraw thilhlân kăng văphai chu inthiel a ta, maichăm sîra chun sie’ng a tih. 11 Chu zoah a silfenhai inthlâk a ta, silfen dangin inthuom a ta, a vâp chu khawhnăwm hmun faiah fepui a tih. 12 Maichăma mei chu chok zing a ta, a mit ngai ding a ni nawh. Zîng tinin thiempu chun thing buk sa’ng a ta, pumraw thilhlân chu sie fel a ta, inremna thilhlâna a sa thău chu a ràw ding a nih. 13 Maichăma mei chu maichămah chok zing a ta, a mit ding a ni nawh.
Bu le bâl thilhlân
14 “‘Bu le bâl thilhlân thaw dan ding chu hieng ang hi a nih: Aron naupahai chun maichăm bulah, LALPA hmaah an hung chawi ding a nih. 15 Thiempu chun beiphit indip taka mi chu vei khat la’ng a ta, hriek le beraw chu la bok a ta, chuonghai chu LALPA suklawmtu, hriet zingna rimtui dingin maichâmah a raw ding a nih. 16 An inhlàn mahlahai chu Aron le a naupahaiin chol thrang lo bei leh Intuokna Puon in tuol hmun thienghlimah an fak ding a nih. 17 Chol le beiphit hmet pola inthoka siem a ni ding a ni nawh. Meia ka kuoma thil an inhlàn laia anni chanpuol dinga ka pĕk a nih. Suol ngaidamna le bawsiet ngaidamna thilhlân anga thil thienghlim tak a nih. 18 Aron thla pasal po poin fa thei an tih. Chu chu LALPA ta dinga meia thilhlân chungthua a thlâ peihai chena an kumkhaw chan chu a nih. A tawk taphot chu ser thieng ni pei an tih’ tiin thu pe rawh” a ta.
19 LALPA chun Mosie a biek a, 20 “Hriek i năl ni phaa Aron le a naupahaiin LALPA kuoma thil an inhlăn ding chu beiphit indip tak, kilogram khat ning a ta, a zătve chu zing tieng, a zătve dang chu zan tieng an inhlăn ding a nih. 21 Hriek leh inruol taka hmet polin, thleng kûmah ur hmin an ta, chikté tea khoi nawiin hung chawi an ta, chu chu LALPA ta dinga rim inhnik bu le bâl thilhlânah an inhlàn ding a nih. 22 A naupahai laia mi hriek nàl, thiempua la hung thlâktu dingin chu chu buotsai a tih. LALPA chanpuol a ni leiin raw fai vong ding a nih. 23 Thiempuin bu le bâl thilhlân a’n hlàn réng rèng chu raw fai vong ding a na, fàk dêr lo ding a nih” tiin.
Suol ngaidamna thilhlân
24 LALPA chun Mosie a biek a, 25 “Aron le a naupahai kuomah hieng hin hril rawh: ‘Hi hi suol ngaidamna hlànbiek thaw dan ding chu a nih: pumraw thilhlân in thatna hmunah suol ngaidamna thilhlân ran khom LALPA hmaah in that ding a nih; chu chu thil thienghlim tak a nih. 26 Suol ngaidamna hlănbiek inhlăntu chun Intuokna Puon in kot zawl hmun thienghlimah hlănbiekna sa chu a fâk ding a nih. 27 A sa tawk taphot chu hung thienghlim an tih; a thisenin silfen a khiengna taphot khom hmun thienghlima ngei sawp thlâk ding a nih. 28 A sa suongna chu pil bêl a ni chun sukkoi ding a na, dâr bêl a ni ruok chun nawt fai a, tuia intleng fai ding a nih. 29 Thiempu sungkuoa mi pasal taphotin a sa chu fa thei an tih; thil thienghlim tak a ni si a. 30 Amiruokchu, suol ngaidamna dinga ran inhlăn, inremna siemna dinga hmun thienghlim, Intuokna Puon ina a thisen an hung lâk lut ruok chu, a sâ fàk loa raw hmang ding a nih.