2 “’Tu khomin thil thieng lo hrim hrim, sa thieng lo ram sa amanih ran sa thi ruong amanih, hnuoi chunga invâk chi sa thieng lo amanih a tawk palh chun, a hriet naw leia a tawk khom ni sien, a hung hriet chara inthokin a hung inthieng ta naw nghal a nih.

3 “‘Tu khomin mi sukporchè thei, mihriema inthoka suok, inthieng nawna lai a tawk chun, a hriet naw leia a tawk khom ni sien, tawk a thieng nawh ti a hriet chara inthokin hung inthieng ta naw nghal a tih.

4 “‘Tu khomin inngaituo chieng loa thil thra amanih thil thra lo amanih thaw dinga thu a’n khàm zung zung chun, chu chu thu intiemkamnaa fimkhur lo taka a hril amanih, an naw leh a umzie a hriet naw leia a thaw a ni khomin, a hung hriet suok ni chun thiem naw chang a tih.

5 “‘Hieng thila hin mi tu khomin thiem naw a chang chun, thil suol a thaw dan inpuong sien la, 6 a suol thaw manah ran ruol laia mi beram amanih kel la tuoi amanih LALPA kuoma suol ngaidamna thilhlân hung chawi sien la, thiempuin inremna hlànbiek lo thawpek a ta, ngaidamin um a tih.

7 “‘Beram tuoi a chawi thei naw chun vàthrû pahni amani parva pahni amanih a suol ngaidamna dingin LALPA kuomah hung chawi sien la, pakhat chu suol ngaidamna thilhlân ning a ta, a dang chu pumraw thilhlân ning a tih. 8 Thiempu kuomah hung chawi sien la, suol ngaidamna thilhlân chu lo thaw hmasang a tih. Parva chu a rîngah her tliek a ta, sienkhom her bong loin, 9 a thisen iemani zat chu suol ngaidamna thilhlâna dingin maicham sîr velah thèng a ta, a thisen dang po chu maicham bula chun infar kangtir a tih. Hi hi suol ngaidamna thilhlân chu a nih. 10 Thiempuin parva dang chu a dan ang takin pumraw thilhlânah hmangin, a thil suol thaw lakah inremna hlànbiek lo thawpek a ta, ngaidamin um a tih.

11 “‘Amiruokchu, vathru pahni amanih parva pahni amanih khom a nei zo hlol naw a ni chun a suol tlàkna thilhlânah beiphit indip tak, efa hmun sawma threa hmun khat hung chawi raw se. Suol ngaidamna hlànbiek a ni leiin hriek amanih beraw amanih a thrang sa ding a ni nawh. 12 Thiempu kuomah hung chawi a ta, ama chun hriet zingna dingin vei khat lang a ta, LALPA ta dinga meia thilhlânah maicham chunga chun a raw ding a nih; chu chu suol ngaidamna thilhlân a ni si a. 13 Chuong ang chun thiempuin a thil suol thaw laka inremna hlànbiek chu lo thawpek a ta, ngaidamin um a tih. A dang la um po chu, bu le bâl thilhlân angin, thiempu chanpuol ding a nih’ ti rawh” a ta.

14 LALPA chun Mosie a biek a, 15 “Mi tu khomin tum lei ni loa LALPA dan thienghlim a lo bawsiet palh^a chun, a suol manah beram ruol laia mi beramchal, hmêl hem lo chu LALPA hmaah hung kei a ta, a bawsiet inkhumna ding hù tawk, Hmun Thienghlima an sekel hmang ang tangkaruo iemani zat a hung chawi bok ding a nih. Hi hi bawsiet ngaidamna thilhlân a nih. 16 Thil thienghlim chunga a lo sukdik naw hai chu rul a ta, hmun ngaa threa hmun khat pe belsang a ta, chu chu thiempu kuomah inhlàn a ta, thiempu chun bawsiet hlànbiekna beram chal chu inhlànin inremna siempek a ta, ngaidamin um a tih.

17 “‘Tu khomin thil suol a thaw a, LALPA thupĕkin thaw lo dinga a khap chu a lo bawsiet chun, a hriet naw leia a thaw khom ni sien, thiem naw chang hrim hrim a ta, a suol maw chu phur a tih. 18 Bawsiet hlànbiekna thilhlâna dingin beram ruol laia mi beram chal, hmêl hem lo chu thiempu kuomah hung kei a ta, a bawsiet man tlakna ding hù zat sum hung chawi bok a tih. Chuong ang chun thiempuin inremna hlânbiek chu thawpêk a ta, tum rêng lei ni loa a thaw suol palhai chu ngaidam ning a tih. 19 Hi hi LALPA thu a bawsiet leia thiem naw a changna laka bawsiet ngaidamna thilhlân chu a nih” tiin.