Suol ngaidamna thilhlân
4
1 LALPA chun Mosie a biek a: 2 “Israelhai kuomah hieng hin hril rawh: ‘Tu khomin tum rêng lei ni loa thil suol a thaw a, LALPA thupĕkin thaw lo dinga a khap chu a lo bawsiet palh amanih, 3 hriek nàl tah thiempuin mipui chunga thiem naw intlungtir thei thil suol a lo thaw amanih a ni chun, bawngchal tuoi, hmêl hem lo chu LALPA kuomah a suol ngaidamna dingin hung inhlăn raw se. 4 Intuokna Puon in kotah bawngchal chu LALPA hmaah hung kei a ta, bawng lu chunga chun kut innghat a ta, LALPA hmaah bawng chu a that ding a nih. 5 Hriek năl thiempu chun bawng thisen iemani zat chu la’ng a ta, Intuokna Puon ina chun hung chawi a ta, 6 a kutpăr hmor chu thisenah zuk phûm a ta, thisen chu Hmun Thienghlim puonzâr bula chun LALPA hmaah voi sari a thè ding a nih. 7 Chu zoah thiempu chun LALPA hmaah Intuokna Puon ina rimtui răwna maichăm kia hai chun thisen chu tlawmte tât a ta, bawng thisen dang po chu Intuokna Puon in kota pumraw inhlănna maichăm bula chun a bun thlâk vong ding a nih. 8 Suol ngaidamna dinga inhlăn bawngchal thâu po po chu la’ng a ta, a kawsung thău le a rîl bawmtu thău po po, 9 a kalhai le a diemnĕm laia thău po po, a thin tuomtu duorda leh a kal pumin la bok a ta, 10 inremna thilhlàna thău a lak suok ang bokin thaw’ng a ta, thiempu chun pumraw hlanbiekna maichămah chuonghai chu raw’ng a tih. 11 Amiruokchu, bawng vun le a taksa po po, a lu le a kehai, a phingpui le a êk hai chu 12 khawhnâwm hmun fai, vut an peina hmuna chun chawi a ta, vut chunga meipuia chun raw hmang a tih.13 “‘Israelhaiin an tum lei reng khom ni loa an hnam puma thil suol thaw a, LALPA thupekin thaw lo dinga a khap chu an lo bawsiet palh chun, an thil suol thaw chu an hnam inpuiin a hrietpui naw khom ni sien, thiem naw an chang a nih. 14 Chu an thil suol thaw chu an hriet pha leh an inpui chun suol ngaidamna dingin Intuokna Puon in hmaa chun bawngchal tuoi an hung kei ding a nih. 15 LALPA hmaah Israel upahai chun bawngchal lu-ah kut innghat an ta, bawngchal chu LALPA hmaah an that ding a nih. 16 Hriek năl thiempu chun bawng thisen iemani zat chu Intuokna Puon inah chawi lût a ta, 17 a kutpàr hmor chu thisena chun zuk phûm a ta, thisen chu Hmun Thienghlim puonzar bula chun LALPA hmaah voi sari a thè ding a nih. 18 Chu zoah thiempu chun Intuokna Puon ina rimtui răwna maichăm kia hai chun thisen chu LALPA hmaah tât a ta, bawng thisen dang po chu Intuokna Puon in kota pumraw hlànbiekna maichăm bula chun a bun thlâk vong ding a nih. 19 A thău po po chu la suok a ta, maichăma chun raw’ng a ta, 20 suol ngaidamnaa bawngchal inhlàn a thaw ang charin a dang khom thaw ve’ng a tih. Chuong anga thiempuin an suol ngaidamna thilhlân a’n hlànpek hnung chun, ngaidam hung ni ta’ng an tih. 21 Chu zoah bawngchal ruong chu khawhnâwmah chawi a ta, bawngchal hmasa a raw angin raw’ng a tih. Hi hi khawtlang ta dinga suol ngaidamna hlànbiek chu a nih.
22 “‘Rorêltuin tum rêng lei ni loa suol a thaw palh a, LALPA a Pathien thupêkin thaw lo dinga a khap thil a lo bawsiet chun, thiem naw a chang a nih. 23 A thil suol thaw chu inhriettir a ni charin kelchal hmêl hem lo chu thilhlânah a hung kei ding a nih. 24 Kèl lu-a chun kut innghat a ta, LALPA hmaa pumraw thilhlân an thatna hmuna chun a that ding a nih. Chu chu suol ngaidamna thilhlân a nih. 25 Thiempu chun a kutpăr hmor chu kèl thisenah zuk phûm a ta, thisen chu pumraw hlănbiekna maichăm ki-a hai chun tât a ta, a dang po chu pumraw hlànbiekna maichăm bula chun bun thla vong a tih. 26 Inremna thilhlâna a thăuhai a raw ang khan thiempu chun a thău po po chu raw’ng a tih. Chuong anga thiempuin a suol ngaidamna thilhlân a’n hlănpek hnung chun a suol chu ngaidam hung ni tang a tih.
27 “‘Vàntlâng laia mi tu khomin tum rêng lei ni loa thil suol a thaw palh a, LALPA thupĕkin thaw lo dinga a khap chu a lo bawsiet chun, thiem naw a chang a nih. 28 A thil suol thaw chu inhrietir a ni charin a suol ngaidamna dinga inhlăn dingin kèl, a la tuoi hmêl hem lo a hung kei ding a nih. 29 Suol ngaidamna thilhlân lu chunga chun kut innghat a ta, pumraw hlànbiekna hmuna chun a that ding a nih. 30 Chu zoah thiempu chun kel thisenah a kutpàr hmor zuk phûm a ta, maicham kia hai chun tât a ta, a dang po chu maichăm bula chun bun thla’ng a tih. 31 A thâu po chu inremna hlànbieka an thaw angin at thla’ng a ta, maichama chun LALPA ta dinga rim inhnik dingin raw’ng a tih. Chuong anga thiempuin a suol ngaidamna ding a’n hlănpĕk hnung chun ama chu ngaidam ni’ng a tih.
32 “‘Suol ngaidamna thilhlâna beramte a hung chawi a ni chun a la tuoi hmêl hem lo a ni ding a nih. 33 Beramte lu chunga chun kut innghat a ta, pumraw thilhlânhai an thatna hmuna chun suol ngaidamna dingin that a tih. 34 Chu zoah thiempu chun a kutpàr hmor chu ran thisena chun phûm a ta, pumraw hlănbiekna maichăm ki-a hai chun thisen chu tât a ta, a dang po chu maichăm bula chun bun thla’ng a tih. 35 Inremna thilhlâna beramte thău an làk ang bokin a thău chu thiempuin la’ng a ta, LALPA kuoma meia thilhlânah maichăm chunga chun raw’ng a tih. Chuonga thiempuin inremna hlănbiek a’n hlănpek hnung chun ama chu ngaidam ni’ng a tih.