6 “‘Inremna hlănbieka LALPA kuoma a thil inhlăn chu beram ruol laia mi a ni chun, a pui amanih a chal amanih khom ni sien, hmêl hem lo a ni ding a nih. 7 Beram tuoi inhlăn a ni chun LALPA hmaah a hung chawi ding a nih. 8 A beram tuoi inhlàn lu chunga chun kut innghat a ta, Intuokna Puon in kotah that a ta, Aron naupahaiin a thisen chu maichăm sîr vêl tinah an thĕ ding a nih. 9 Inremna thilhlâna inthok chun LALPA ta dinga meia inhlăn dingin a thău dam, a mei thău tak tluon, a mei bithlinga tan dam, a kawsung le a rîl bawmtu thău po po dam, 10 a kal pahnihai le a diemnĕma thău po po le a thin tuomtu duorda po po chu a kal chopin phor suok a ta, 11 chuonghai chu thiempuin maichămah rawng a ta, chu chu LALPA ta dinga meia thilhlân a nih.

12 “‘Kèl inhlăn a ni chun LALPA hmaah hung kei a ta, 13 kèl lua chun kut innghat a ta, Intuokna Puon in kotah that a ta, Aron naupahaiin a thisen chu maichăm sîr vel tinah an thĕ ding a nih. 14 LALPA kuoma meia inhlăn dingin a kawsung thău le a rîl bawmtu thău po po, 15 a kal pahni le a diemnêm chen bawmtu thău po po le a thin tuomtu a duorda po po leh phor suok a ta, 16 chuonghai chu fak ding thilhlàna dingin thiempu chun LALPA lawm riminhnik dingin maichămah a raw ding a nih. A thău po po chu LALPA chanpuol a nih.

17 “‘Thău le thisen hrim hrim fak lo ding ti thu hi khaw lai khom khawsa unla, in thla peihai ta ding chen khoma ka thupêk ngîr zing chu a nih’ ti hril rawh” a ta.