4 “‘Bu le bâl thilhlânah thuka ur bei in inhlàn ding chun chol thrang lo beiphit indip tak, sahriek le hmet amanih, chol thrang loa siem beipèr, a chunga hriek nal amanih a ni ngei ding a nih. 5 I bei inhlàn ding chu thlĕnga ur a ni chun, beiphit indip tak le hriek chokpola siem, chol thrang lo a ni ding a nih. 6 Bei chu suknawi la, hriek buok khum rawh, bu le bâl thilhlân a ni si a. 7 I bu le bâl thilhlàn chu bêla suong a ni chun, beiphit indip tak le hriek chokpola siem a ni ding a nih. 8 Bu le bâl thilhlânhai chu LALPA hmaah hung chawi la, thiempu kutah pe la, ama chun maichămah hung chawi a tih. 9 Thilhlâna inthok chun hriet zingna thilhlân dingin thiempu chun vei khat lang a ta, meiah raw’ng a ta, chu chu mei hmanga thil inhlăn, LALPA ta dinga rim inhnik chu a nih. 10 Inhlăn bâng po chu Aron le a nauhai ta ding ni’ng a ta, chu chu LALPA ta dinga meia thil inhlăn tah, ser hran tlat a nih.

11 “‘Bu le bâl thilhlân i hung chawi hrim hrim chu chol thrang lo a ni vong ding a nih; chol amanih khuoizu amanih hrim hrim hlănbiekna meiah i raw sa ding a ni nawh. 12 In bu le bâl thar hmasa tak ruok chu LALPA hmaah hung inhlăn in ta, maichăma rim inhnika raw ve ding a ni nawh. 13 Bu le bâl thilhlâna hrim hrim machi i saw vong ding a nih. Machi chu Pathien le in inkara thuthlung inentirna a ni leiin, bu le bâl thilhlânah machi a thrang ngei ding a nih. I thil inhlăn po poah theinghil loin machi i saw vong ding a nih.

14 “‘I bu tharsuok hmasa tak LALPA kuoma i hung inhlàn ding chun, bu vui lak hlim kha zêu trawl la, sukphit la, inhlăn rawh. 15 A chungah hriek bur la, beraw rimtui sie rawh, bu le bâl thilhlân a ni si a. 16 Thiempu chun bu sukphit le hriek chu a thren beraw le chun LALPA kuoma bu le bâl hriet zingna thilhlânah inhlăn a ta, chu chu mei hmanga thil inhlàn, LALPA ta dinga rim inhnik chu a nih.