3 “‘Pumraw hlănbieka inhlăn ding chu bawngchal tuoi, hmêl hem lo a ni ngei ding a nih. LALPA ta dinga pom tlâk a ni theina dingin Intuokna Puon in kot bulah hung inhlăn raw se.

4 Pumraw hlănbiekna ran lu chunga chun a hung inhlăntu chun kut innghat a ta, a ta dinga inremna siemtu^a dingin pompêk ni’ng a tih. 5 LALPA hmaah bawngchal tuoi chu that a ta, thiempu Aron naupahai chun a thisen la’ng an ta, Intuokna puon in kota maichăm chu thisen chun thĕng an tih. 6 Pumraw thilhlân bawngchal chu a’n hlăntu chun a vun inhlip an ta, chan nawi a tih. 7 Thiempu Aron naupahai chun maichămah mei sêm an ta, thing ti ding khom ngaituo bok an tih. 8 Chu zoah Aron naupa thiempuhai chun a sa le a lu le a thăuhai chu maichăma mei choka chun buk an tih. 9 Thiempu chun a sûng le a kehai chu tuiin sawp fai a ta, maichămah raw’ng a tih. Chu chu mei hmanga pumraw thilhlân, LALPA ta dinga rim inhnik chu a nih. 10 “Pumraw thilhlân dinga a hung chawi chu a ran ruol laia mi beram amanih kèl amanih a ni chun, a chal, hmêl hem lo a ni ding a nih. 11 Maichăm hmar tieng chun LALPA hmaah that a ta, thiempu Aron naupahai chun ran thisen chu maichăm sîr tinah a vêlin thĕ khum an tih. 12 Chun, a sâ chu chan a ta, a lû le a thăuhai leh maichàm chunga chun thiempuin sieng a ta, 13 a sûng le a kehai chu tuiin sawp fai a ta, chuonghai chu thiempuin hung chawi a ta, a rêngin maichămah rawng a tih. Chu chu mei hmanga pumraw thilhlân, LALPA ta dinga rim inhnik chu a nih.

14 “‘Chun, LALPA ta dinga pumraw thilhlân chu vatê a ni chun, vàthru tuoi amanih parva tuoi amanih a ni ding a nih. 15 Thiempu chun maichămah hung chawi a ta, vate rîng chu her bong a ta, maichămah raw’ng a ta, a thisen chu maichăm sîra chun infar kangtir a tih. 16 A ong le a hmul chu vut siena maichăm sak tieng chun peihawn a tih. 17 A thlaah manin pot fâi a ta, pot nawi si loin maichăma meichoka chun raw’ng a tih. Chu chu mei hmanga pumraw thilhlân, LALPA ta dinga rim inhnik chu a nih.