4 LALPA chun Mosie kuomah, “In fak dingin vana inthokin bu ka hung insŭrtir ding a nih. Mipuihai chun ni tin ni khata an fak khop pei rût hlak raw hai se. Chuong ang chun ka thupêk an zawm le zawm naw hang fie tawl ka tih. 5 A ni ruknaa an rût ruok chu fàk dingin buotsai an ta, ni danga an rŭt let hni pei an rŭt ding a nih” a ta.

6 Mosie le Aron chun Israelhai kuomah, “Aiguptaa inthoka thruoi suoktu chêu hi LALPA a nizie zăn tieng hin hrieng in tih. 7 Zîng tieng leh LALPA ropuizie hmung in tih, a chunga in chierna thu chu a hriet ta si a. Keini hi ieng telul am kan ni a, in mi chier khum ding chu?” an ta. 8 Mosie chun, “LALPAN zăn tieng sâ le zîng tieng bu a pêk chĕu in hmu pha chun a thawtu chu LALPA a nih ti hre ta’ng in tih, a laka in chierna kha a lo hriet ta si a. Keini hi tu am kan ni a? Keini laka chier ni loin Pathien laka chier in ni lem” a ta.

9 Mosie chun Aron kuomah, “Israel pungkhawmhai kuomah hi thu hi hril rawh: ‘LALPA hmaah hung ro, in chierna kha a hriet ta si a’ tiin” a ta. 10 Aronin Israel mipuihai kuoma thu a hril lai chun, thlalĕr tieng an hei thlir a, LALPA ropuina chu sûmah a hung inlang a. 11 LALPA chun Mosie a biek a, 12 “Israelhai chierna kha ka lo hriet a; an kuomah, ‘Zanbuah sa fa tang in ta, a tuka ruok chu tlai takin bu fa ta’ng in tih. Chuongchun, kei hi LALPA in Pathien chu ka nih ti hrieng in tih’ a tih tiin hril rawh” a ta.

13 Zan tieng chun an riebuk dâp sip vong khopin vamim an hung vuong lut ta hum hum a; zingkâr chun an riebuk vela chun daidaw a lo tla dup el a. 14 Daidaw a hang hul chun thlalĕr hnuoi chunga chun thil biel inpĕr chik té tè, daidaw khal ang el chu a bang uoi el a. 15 Chu chu Israelhaiin an hmu chun, “Hi hi iem a na?”^a an ta, iem a nih ti an hriet si nawh. Mosie chun an kuomah, “LALPAN in fak dinga bei a pĕk chêu a ni hih. 16 Hi hi LALPA thupĕk chu a nih: Mi tinin mani mamaw tawk peiin in rût khawm ding a nih. In puon ina chêng mi pakhat pei ta dingin litar hni (omer khat) pei in rŭt ding a nih” a ta.

17 A hril ang chun Israelhai chun an thaw a, a rût treuh an um a, tlawmte rŭt an um bok a. 18 Noa an inkhi pha a rût tamin an chang tam bik naw a, a rût tlawmin a chang tlawm chuong bik bok nawh. Mi tinin mani khop tawk seng an rŭt a. 19 Mosien an kuomah, “Tu khomin a zinga fak dingin khêk naw ro” a ta. 20 Amiruokchu, threnkhatin an poisa naw a, a zinga dingin an sie a, sienkhom a lo inngê vong a, a rim a se êm ĕm a, chuleiin Mosie chu an chungah a lungsen hle a. 21 Zing tinin mani fak khop tawk seng an rŭt a, nisa a hung insăng pha leh a’n tui ral vong hlak.

22 A ni ruk nia ruok chu a lêt hnia tam, mi pakhatah litar li (omer hni) pei an rŭt a, chu chu khawtlang hotuhai chun Mosie kuomah an hung ripawt a. 23 Ama chun an kuomah, “Hi hi LALPA thupĕk chu a nih: ‘Zinga chu LALPA Chawlni thienghlim, Sabat a ni leiin chawlna ni ding a nih. Chuleiin, beia zeu nuomin zeu unla, a suonga suong nuomin suong ro. In fak mahla chu zinga dingin hlà ro” a ta. 24 Mosie hril ang chun a zinga ding khom an hlà a, sienkhom a thûm naw a, a’n ngê bok nawh. 25 Mosie chun an kuomah, “Voisun chu hi hi fa ro. Voisun hi LALPA ta dingin Sabat a na, tuolah rŭt ding um naw nih. 26 Ni ruk sung tûk tin rût in ta, a ni sari ruok chu Sabat a ni leiin rŭt ding ieng khom um naw nih” a ta.

27 A ni sari ni chun rût dingin threnkhat an suok a, amiruokchu rŭt ding an hmu nawh. 28 LALPA chun Mosie kuomah, “Ieng chen am ka thupêk le ka dànhai hi poisa loin in um ding a na? 29 En ta u, LALPA chun chawlni a pêk cheu a, chuleiin a ni ruk niah ni hni ring bu a pêk chĕu a nih. Mi tin in umnaah um trok trok unla, a ni sarinaa chu tu khom suok dok naw ro” a ta. 30 Chuongchun, mipuihai chu a ni sarinaa chun an chawl a.

31 Israel sungkuohai chun chu thil chu ‘mana’ tiin an ko a. Maruoi mu anga vâr sar el a ni a, hang fak chun beipèra khuoizu năl ang a nih. 32 Mosie chun an kuomah, “Hi hi LALPA thupĕk chu a nih: Mana omer khat la unla, suon la hung thar pei dinghai khoma Aigupta rama inthoka ka thruoi suok lai chêua thlalĕra fak ding bu ka pĕk chêu hi an hriet zing theina dingin, sie thra ro” a ta. 33 Mosie chun Aron kuomah, “Bêl chawi la, a sûngah mana litar hni thun rawh. Chu chu Pathien hmaah suon la hung thar pei ding chena vong dingin LALPA hmaah sie rawh” a ta.

34 LALPAN Mosie kuoma thu a pĕk angin, mana chu vong zing dingin Aron chun Thuthlungna hmaa chun a sie a. 35 Israelhai chun mihriem chêngna ram, Kanan ramri bul an tlung chenin mana chu kum sawmli sung an ring a nih.

36 Chuong laia bu inkhǐnaa an hmang tak chu efa a na, chu chu litar sawmhni tluk a nih.