Mosie hla
15
1 Chuongchun, Mosie le Israelhai chun LALPA chawimawiin hi hla hi an sak a:“LALPA inpâkin hlâ sak ka tih,
Ropui takin a hnè ta si a;
Sakor le a chungchuonghai,
Tuipuiah a pei thlàk tah.
2 LALPA chu ka hrătna le ka hla,
Mi sandamtu a hung ni tah.
Ka Pathien a na, inpâk ka tih,
Ka thlatuhai Pathien a na,
Ama chu chawimawi ka tih.
3 LALPA chu râlhrât a na,
A hming khom LALPA a nih.
4 Faraw tawlailirhai le sipaihai,
Tuipuiah a pei thlăk tah.
A hotu suongtawlolhai chu,
Tuipui Senah an pil vong.
5 Tuiin a chǐm pil vong a,
Lungtum thlak ang vang vangin,
Li rilah an pil hmang tah.
6 LALPA, i kut chang tieng chu,
Thilthawtheinan a sip a,
LALPA, i kut chang tieng chun,
Hmêlmahai i pot nawi vong.
7 I lalna ropui tak chun,
Nangma khingtuhai chê chu,
I pei thlăk tawl ta vong a,
I lungsenna puok dar chun,
Anni chu bu pawl angin,
A kăng hmang vong ta si a.
8 I hnâr i hang hnâwt meu chun,
Tuipui a hung intieng thŭr a,
Tuifawn insok lai hai khom,
Bang angin a ngîr khup a,
Lipui rila tuihai khom,
An inkhal zo tah a nih.
9 Hmêlma chun chapo takin,
‘Hnot thlûrin hnot khûm ka ta,
Ka râllâkhai chu semin,
Ka dû tawkin chèn ka ta,
Ka kawlhnâm chu phawi suokin,
Ka kut ngèi hin anni chu,
Sukbohmang ka tih’ a tih.
10 Sienkhom thuoka i mût chun,
Tuipuiin a’n khum tawl a,
Tuia suon tlang thlâk angin,
Tuipuiah an pil vang vang.
11 Aw LALPA, nang ang hrim hi,
Tu pathien am an um a?
Thienghlimna tienga ropui,
Ropuina tienga râpum,
Thil mak ropui tak thaw hlak,
Tu hrim am um ta’ng an ta?
12 I kut chang tieng i phar a,
Hnuoiin a lem zo tawl tah.
13 I hmangaina chuoi lo chun,
I’n tlansahai thruoi i ta,
I hmun thienghlim tlung chenin,
I hratna’n thruoi pei i tih.
14 Hnam danghan an hriet pha chun,
Triin inthin hâwp an ta,
Filistin mihai khom chu,
Thlaphângnan man tawl a ta,
15 Edom lalhai chî-àiin,
Moab thruoiituhai khom chu,
Inthinnan man tawl a ta;
Kanan rama chênghai khom,
Intui ral zo vong an tih.
16 Tritna le thlaphangnaha’n,
Anni chu tlâkbuok a ta,
I bân tha hrăt an hmuin,
Lung angin inchang an ta,
Aw LALPA, i mihaiin,
I’n chăwk sa i mihaiin,
Chu hmun an fe thleng chenin.
17 Anni chu hung thruoi lutin,
I rochung tlânga ngei chun,
Anni chu la phun i ta,
Chu hmun chu chĕngna dinga,
Aw LALPA i siem a na,
A hmun thienghlim khom LALPA,
I kuta i’n din a nih.
18 LALPA chun ro rêl a tih,
Chatuon a’nthok chatuon chenin”
tiin.
19 Faraw sakorhai, tawlailirhai le sakor chungchuonghai chu tuipuia an tlàn lut zoin LALPAN tui chu a hung inluong kirtir a, Israelhai ruok chun hnuoi chàrah tuipui chu an fe thleng a nih. 20 Chun, zawlnei Miriam, Aron farnu chun khuongte a chawi a, a hnunga chun nuhmei po poin khuongte chawiin an zui a, an làm a.
21 Miriam chun hi hla hi a sakpek a:
“LALPA inpakna hla sak ka tih,
Ropui takin a hnè ta si;
Sakor le a chungchuonghai,
Tuipuiah a pei thlak tah”
tiin.
Mara tui khà
22 Mosie chun Israelhai chu Tuipui Sena inthok chun Sûr thlalĕrah a thruoi a, ni thum zet an inzin sŭngin tui hrim an hmu nawh. 23 Mara hmun an hung tlung a, tui chu a kha leiin an dawn thei naw a, chu leia chu hmun chu Mara ti an inbùk a nih. 24 Mipui chun Mosie kuomah, “Iem a na ei dawn ta ding?” tiin a chunga chun an chier a.
25 Mosie chun LALPA a ko a, ama chun thing pakhat hi a kâwkhmu a, chu chu tuiah a zuk dĕng lŭt a, tui chu a hung inhnik ta a. Chu hmuna chun LALPAN thupêk le danhai a siempek a, anni chu a fie bok a. 26 “LALPA in Pathien rawl fimkhur taka ngaithla a, a mit hmua thil indik thaw a, a thupêkhai le a dànhai in poisa chun, Aigupta mihai chunga hremna hri ka’n lèngtir ang kha nangni chunga chu inlèngtir ve naw ning; kei hi LALPA, a sukdamtu chĕu chu ka ni si a” a ta.
27 Elim hmun an va tlung a, chu taka chun tui hnăr sawm le pahni le tûm thing sawmsari a um a, chu hmuna chun tuikhur bulah an riek a.