5 Israelhai an tlan suok vong tah ti thu Aigupta lal an hril chun, Faraw le a thoktuhai chun an lungril an thlăk a, “Ieng am a na ei thaw ta hi? Israelhai ei insuoktir ringot hi, tuin am ei rong bâwl ta’ng a ta?” an ta. 6 Faraw chun a tawlailir a’n buotsaitir a, a sipaihai chu a thruoi a. 7 Aigupta mihai tawlailir băkah a tawlailir laia a thra tak vong zaruk le tawlailir khal thiem thlanghai le chun an hnot a. 8 Ngaingam taka suok Israelhai chu hnot zui dingin LALPAN Aigupta lal Faraw lungril chu a sukkhauh a nih.

9 Faraw sakor tawlailir le a khaltuhai le Aigupta sipaihai chun Israelhai chu Baâl Zefon zawn Pi-hahirot bul tuipui kama an riek lai chu an va hnot phàk a. 10 Faraw-in a hung hnot lai chun mipui chu an hang ngha a, anni hung hnottu Aigupta mihaiin an hung hnot phak el ding a nih ti an hmu chun, thlabârin LALPA an ko khek a. 11 Mosie kuomah, “Aigupta rama khan thlăn ding a um naw leia thlalĕra hin thi dinga i mi thruoi a lo ni maw? Ieng leia hienga mi thaw dinga Aigupta rama inthoka i mi thruoi suok? 12 Aigupta rama khom khan, ‘Mi chokbuoi ta naw rawh. Keini chun Aigupta mihai rong hi bâwl el kan tih’ kan ti zing an naw maw? Thlalĕra thi hlol nĕkin Aigupta mihai rong kha lo bawl inla a thra tah lem awm vei leh!” an ta.

13 Mosie chun mipuihai chu zâp deiin, “Tri naw ro. Ngir nghet unla, voisuna LALPAN sansuokna a hung intlunpek ding cheu hi thlîr ringot ro. Voisuna Aigupta mi in hmuhai hi hmu nawk ta ngai naw ti niu. 14 LALPAN dopêk a ti chêu; ngaingam takin um trok trok ringot ro” a ta.

15 LALPA chun Mosie kuomah, “Ieng dinga i mi ko khèk am a na? Israelhai kha hma tieng pan pei dingin hril rawh. 16 I hmol kha inlet la, tuipui chungah i bân phar la, Tuipui hi Israelhaiin hnuoi chàra an kàn theina dingin tui hi inthrè raw se. 17 Aigupta mihaiin an hnot zui chêu theina dingin an lungril sukkhauh ka ta, Faraw le a sipaihai, a tawlailirhai le a sakor chungchuong mihai lakah chawimawina hmung ka tih. 18 Faraw le a tawlailirhai le a sakor chungchuong mihai laka chawimawina ka hmu pha leh Aigupta mihai chun LALPA chu ka nizie hre ta’ng an tih” a ta.

19 Israelhai hmaa fe Pathien vantirko chu an hnungah a’n son a, sûm lawn khom chu an hmaa inthoka insonin an hnung dâlah a thrang a, 20 Aigupta mihai le Israel mihai inkara chun a hung tla a. Zan khuoin sûm lawn chun khing tieng a hlie thim a, khing tieng a elvar leiin a tu tieng tieng khom an inpan hnai thei nawh.

21 Chun, Mosien tuipui chungah a bân a phar a, LALPAN zankhuoin khaw sak thli hrat takin tuipui chu a’n mŭt kirtir a, tuipui chu a hung inthre a, hnuoi chărah a hung inchang ta a. 22 An voi le changa bang anga tui insi khup ngǐr kara chun hnuoi chărah Israelhai chun Tuipui chu an fe kai a.

23 Aigupta mihai chun hnot peiin, Faraw sakor hai, tawlailirhai le sakor chungchuong hai chun tuipuiah an hnot lut a. 24 Khawfingchat vel chun LALPAN mei le sûm lawn chunga inthokin Aigupta mihai chu a zuk en a, a zuk sukbuoi ta nuoi nuoi a. 25 An tawlailir kehai a sukthlongpek a, an fe dukdak thei ta naw a. Aigupta mihai chun, “Israelhai tieng LALPA a thrang a, a mi do a ni hi! Inrang takin kirsan ei tiu” an ta.

26 LALPA chun Mosie kuomah, “Aigupta mihai hi an tawlailir le an sakor chungchuong mihai leh tuiin a hung chǐm pil tawlna dingin i bân kha Tuipui chungah phar rawh” a ta. 27 Mosie chun tuipui chungah a bân a phar a, khuo a var charin tuipui chu a luong inzom nawk a. Aigupta mihai chun tlàn kîr an tum a, sienkhom LALPAN tuipuiah a’n lèn luttir ta vong a. 28 Tui a hung inmat nawk chun, tawlailir le sakor chungchuong po po le tuipuia Israelhai hnot luttu Faraw sipaihai po po chu a chǐm pil ta vong a, pakhat khom damin an suok nawh.

29 Israelhai ruok chun an voi le changa tui bang insi khup kar, li truong hulah tuipui chu an fe thleng a. 30 Chu ni chun Israelhai chu LALPAN Aigupta mihai kuta inthokin a sansuok a, tuipui kama Aigupta mi thihai ruong chu Israelhai chun an hmu a. 31 Aigupta mihai chunga LALPA thilthaw râpthlâk tak el Israelhaiin an hmu chun, mipuiin LALPA chu an tri a, LALPA le a siehlaw Mosie chu an ring ta a.