3 Mosie chun mipuihai kuomah, “Voisun, bawia in intàngna laka LALPA kut hrâta Aigupta rama inthoka a thruoi suokna chĕu ni hi in inser hlak ding a nih. Hi ni hin chol thranga siem bei hrim hrim in fak ding a ni nawh. 4 Voisun, Abib thlaa hin in suok a ni hih. 5 Kanan mihai, Hit mihai, Amor mihai, Hiv mihai le Jebu mihai ram hluo, khuoizu le nenetui luongna, in thlatuhai kuoma inkhâm meua pek a tiem ramah LALPAN a thruoi tlung pha chĕu chun hi ni hi tuta thlaa hin in inser hlak ding a nih. 6 Ni sari sung chu chol thrang lo bei in fak ding a nih. A ni sarina chu LALPA ta dinga kût a ni ding a nih. 7 Ni sari sung chun chol thrang lo bei in fak ding a nih. Chol thranga siem thil hrim hrim nangni lai a um ding a ni nawh. In umna taphotah chol a um ding a ni bok nawh. 8 Chu ni chun in nauhai kuomah, ‘Aigupta rama inthoka kan suok lai khan LALPAN thil a mi thawpĕk leiin hi ni hi kan inser a nih’ tiin in hril ding a nih. 9 LALPA dàn chu in bàuah a um zing theina dingin, hi thil inser hi in kutzie ang le in chalmit inkâra inchikna angah ngai ro. LALPA kut hratin Aiguptaa inthokin a thruoi suok ta si chêu a. 10 Hi dân thu hi kum tin kum tinin a hun takah in hung zâwm pei hlak ding a nih.

11 “LALPAN Kanan ramah a thruoi lut pha chêu le in pi pe puhai kuoma inkhâm meua pĕk a lo tiem ram chu a pĕk phâ chĕu chun, 12 LALPA kuomah sŭl suok ra hmasa tak chu in inhlàn ding a nih. In ran laia a chal pieng hmasa tak chu LALPA ta a nih. 13 Sabengtung chal pieng hmasa tak chu beramtein in intlan ding a nih. In intlan nuom naw chun a rîng in suktliek ding a nih. Chun, in nauhai laia nau pasal pieng hmasa tak chu in intlan bok ding a nih.

14 “Hun la hung peiah i naupain, ‘Hi thil hi iemana a umzie?’ tia a la hung indon phâ chè chun a kuomah, ‘LALPA kut hrătin bawia kan intăngna Aiguptaa inthokin a mi thruoi suok a. 15 Lulul taka Farawin mi chăr dè a tum tlat laiin, LALPAN Aiguptaa nau lutir po po, a mihriem a sain a sukhlum vong a. Chu lei chun a nih ran laia a chal pieng hmasa takin LALPA kuoma hlànbiek kan inhlan hlak le kan naupa pieng hmasa tak chu kan intlan hlak chuh. 16 Chu chu i kutzie le i chalmit inkara inchikna ang el khan LALPA kut hràtin Aiguptaa inthoka a mi thruoi suokzie inchikna a nih’ tiin hril hlak rawh” a ta.

17 Faraw-in mihai suok a phal khan Filistinhai ram tieng chu lam hnài lem ni sien khom Pathienin, “Indona dam an tuok chun insîr an ta, Aigupta ram tieng kîr nâwk rawi an tih” a ti leiin chu tieng chun a thruoi nawh. 18 Tuipui Sen panna thlalĕr lam tieng mipuihai chu Pathienin a thruoi kawi ta lem a. Indo dinga inrâlring zingin Aigupta rama inthokin Israel thlahai chu an suok a nih.

19 Josefa khan Israel thlahai kuomah, “Pathienin a la hung kan nawk ngĕi ngèi ding chĕu a na, ka rùro chu hi taka inthok hin in zawn tung ding a nih” tia inkhâm meua thu a lo intiemtir tah a ni leiin, Mosie chun Josefa rùro chu a hawn tung a.

20 Sukot-a inthok chun an fe pei a, thlalĕr tontira khuo Etham-a chun an riek a. 21 Sŭn le zăn an inzin theina dingin LALPA chun sŭnah sûm lawnin an hma a thruoi a, zănah mei lawnin an lampui a elvar bok a. 22 An hma thruoitu sŭna sûm lawn le zăna mei lawn chun mipui chu a fesan ngai hrim hrim nawh.