Mosie le chîmbuk chok
3
1 Mosie chun Midian rama thiempu, a tarpu Jethro beram ruol chu a vèng a; ral tieng thlalĕr ram hla tak chen a beramhai khalin, Horeba, Pathien tlang chu a zu tlung a. 2 Chu taka chun chîmbukah meichokin LALPA vantirko a kuomah a hung inlăr a. Kăng si loa chîmbuk chok chu Mosien a hmu zing a. 3 A lungrilin, “Chîmbuk saw a chok a, a kâng bok si naw a, a va mak de! Va en chieng hrim ka tih” a ta.4 En chieng dinga a fe lai chu Pathienin a hmu a, chîmbuka inthok chun, “Mosie, Mosie” tiin Pathien chun a ko a. Mosie chun, “Hi taka hin ka um” a ta. 5 Pathien chun, “Kha bâk kha hung hnai sap ta naw rawh. I pheikhok kha hlîp rawh, i ngǐrna kha hmun thienghlim a nih” a ta. 6 Chun, Pathien vêkin, “Kei hi i thlatuhai Pathien, Abraham Pathien, Isak Pathien le Jakob Pathien chu ka nih” a ta. Chu phing leh Mosie chun a hmâi a hup a, Pathien chu a en ngam naw a.
7 LALPA chun, “Aigupta rama ka mihai rimsikzie ka hmu zing a, sal vengtuhai kut an tuor leia an inrŭm ri ka lo hriet a, an tuorna ka hriet zing a nih. 8 Chuleiin, Aiguptahai kuta inthoka anni chu san him ding le chu rama inthoka thruoi suok a, Kanan mihai, Hit mihai, Amor mihai, Periz mihai, Hiv mihai le Jebu mihai umna, ram thra le thawveng, nenetui le khuoizu luongna rama chun thruoi lut dingin, ka hung trum a nih. 9 Tu hin Israelhai inrŭm ri chun ka kuom a tlung zing a, Aigupta mihaiin an suknomnat dan khom ka hmu zing. 10 Thaw rawh, tu hin Aigupta rama inthoka ka mi Israelhai thruoi suok dingin Faraw kuomah ka tir ding chè a nih” a ta.
11 Mosie chun Pathien kuomah, “Faraw kuomah fe a, Aigupta rama inthoka Israelhai thruoi suoktu ding chun kei hi tu am ka ni leh?” a ta. 12 Pathien chun, “Ka umpui ding che annawm. Keima tir ngei i nizie i ta dinga inchikna chu hi hi ni’ng a tih: Aigupta rama inthoka ka mihai i hung thruoi suok pha chun, hi tlânga ngei hin Pathien chu chawibiek in tih”a ta.
13 Mosie chun Pathien kuomah, “Israelhai kuoma chun zu fe ta lang, an kuomah ‘In thlatuhai Pathien chun in kuomah a mi tir a nih’ zu ti ta lang, anni rawiin, “A hming iem a na?’ lo ti sien, iem ka hril ding?” a ta. 14 Pathien chun Mosie kuomah, “KEIMA CHU KA NIH.b Israelhai kuoma chun, ‘KEIMA chun in kuomah a mi tir a nih’ i ti ding a nih” a ta.
15 Pathien vêk chun Mosie kuomah, “Nangin Israelhai kuoma chun, ‘LALPA, in thlatuhai Pathien, Abraham Pathien, Isak Pathien le Jakob Pathien chun in kuomah a mi hung tir a nih’ i ti ding a nih. Hi hi kumkhuoa ka hming chu a nih, suon po po chena in mi hriet zingna ding hming chuh. 16 Fe la, Israel upahai ko khawm la, an kuomah, ‘LALPA, in thlatuhai Pathien, Abraham Pathien, Isak Pathien, Jakob Pathien chu ka kuomah a hung inlàr a, hieng hin a tih: Ka hung kan chêu a, Aigupta rama an soisak dan chêu khom ka hmu vong. 17 Aiguptaa sukrinuma in umnaa inthoka thruoi suokin, Kanan mihai, Hit mihai, Amor mihai, Periz mihai, Hiv mihai le Jebu mihai umna ram, nenetui le khuoizu luongna rama chun thruoi lut ka ti chêu ti ka tiem ta sa a nih’ tiin hril rawh.
18 “Chuongchun, i thu lo ngaithlang an tih. Chun, nang le Israel upahai chu lal kuomah fe unla, ‘LALPA, Hebraihai Pathienin a mi hung kan a, chuleiin, thlalĕr ni thum lamah LALPA kan Pathien kuoma hlànbiek kan inhlàn theina dingin, lunginsiet takin fe suok mi phalpêk rawh’ ti ro. 19 Kut hrât takin a’n thaw luitir a ni ngot naw chun Aigupta lal chun infetir phal mei mei naw ni chêu ti ka hriet. 20 Keiin ka kut phar suok ka ta, anni laia thil mak ka la thaw ding po po chun Aigupta chu hrem ka ta, chu zoa chun insuoktir a ti chêu.
21 “Chun, hi mihai hi Aigupta mihai inlunginsiettir ka ta, in suok pha khom kut ruokin suok naw ti niu. 22 Nuhmei taphotin a tuolbawmnu le a ina um nuhmei kuomah tangkaruo le rangkachaka siem incheina thilhai le silfenhai hni sien, chuonghai chun in naunu le in naupa hai inthuomtir ro. Chuong ang chun Aigupta mihai chu in rok ding annawm” a ta.