Mosie pieng thu
2
1 Levi sungkuoa mi pakhatin Levi chia mi bok nuhmeiah a nei a. 2 Nuhmei chun nau a von a, naupa a nei a, nau lawmum tak a nih ti a hmu chun thla thum zet a thup a. 3 A naupa chu a thup zing thei ta naw phing leh phairuong bawm a lak a, alkatarain a zût phûi vong a, chu taka chun naute chu a’n zăltir a, Nile vakam hnaia phairuong buk lai chun a sie a. 4 Naute chunga chun ieng am a hung tlung hrim ti enthlain naute unu chu hla feah a ngîr a. 5 Faraw naunu chu vadunga insil dingin a zu fe a, a tirtawnhai chun va kamah kein an zui a. Phairuong buk lai chun bawm a zuk hmu a, a siehlawnu chu a zu’n laktir a. 6 A hang hong chun naute a hmu a. Naute chu a trap a, a lunginsiet ta ĕm êm a, “Hebrai naute a ni hi tie!” a ta.
7 Naute unu chun Faraw naunu kuomah, “Hi naute don pektu ding che hi Hebrai nuhmei ka va zongpek ding che?” a ta. 8 Ama chun, “Va zong ta la” a ta. Nuhmeite chu a fe a, naute nu chu a hung thruoi a. 9 Faraw naunu chun a kuomah, “Hi naute hi fepui la, mi pom tleipek la, i pom tlei man hlaw pe’ng ka ti che” a ta. Nuhmei chun naute chu a lâk a, a pom ta a. 10 Naute chu a hung inthrang lien a, Faraw naunu kuoma chun a thruoi a, a naupain a um a. “Tuia inthoka ka lăk suok a ni leiin’ a ta, a hmingah Mosie a sak a.
Midian ramah Mosie a tlansie
11 Mosie chu a hung puitling hnungin ni khat chu a mihai umna hmunah a fe a, inrim taka sin an thaw lai chu a thlìr a. Aigupta mi pakhatin a unau Hebrai mi a vuok lai chu a hmu a. 12 A ngha vêl a, mi dang a hmu naw phing leh Aigupta mi chu a vuok hlum a, phaiphina chun a phŭm hmang a. 13 A zînga chun a suok nawk a, Hebrai mi le Hebrai mi insuol lai a hmu a, a thaw indik naw pa lem kuoma chun, “Ieng dinga i Hebrai chanpui i vuok am a na?” a ta. 14 Chu mi chun, “Tuin am kan chunga thuneitu le rorêltu dingin a ruot che a? Aigupta mi i that ang bok khan mi that ve i tum a ni?” a ta. Mosie chun a lungrilin, “Ka thilthaw kha tlângin an hriet tah a ni awm de aw!” a ta, a trithawng ta hle a.
15 Chu rîva chu Faraw khomin a lo hriet a, Mosie chu that a tum a, sienkhom Mosie chu Faraw kuoma inthokin a tlân hmang a, Midian ram a tlung a, tuikul sǐrah a thrung a. 16 Chun hieng hi a na, Midian rama thiempu chun nau nuhmei pasari a nei a, anni chun an pa beram ruol chu tui pe dingin tuikula chun an hung a, taikuonga chun tui an sung sip a. 17 Beram vêngtu dang an hung a, anni chu an hung hnot zăm a, sienkhom Mosie chun anni chu a lo san a, an beramhai chu tui a’n dawntir a.
18 Nunghakhaiin an pa Reuel kuom an tlung chun, “Iem a ta voisun chu in va hung inlawi inhma ngei de?” a lo ta. 19 Anni chun, “Aigupta mi pakhatin beram vêngtuhai lakah a mi san a. Tui dam a mi thălpĕk a, beram ruol khom tui a pêka a nih” an ta. 20 Ama chun, “An leh ama chu khaw la’m a um ta le? Iengti ziea in hung maksan el am a na? Va ko inla, bu dâm hung fa raw se” a ta.
21 Mosie chun chu pa kuoma um chu a remti a, ama chun a naunu Zipora chu nuhmeia nei dingin Mosie a pêk a. 22 Zipora chun naupa a nei a, Mosie chun, “Mi ramah pêm ka lo ni ta hi” a ta a hmingah Gersom a sak a.
23 Sawt fè hnungah Aigupta lal chu a thi a. Israelhai saltang inrŭm ri le thrangpuitu ngaia an khĕk ri chun Pathien kuom a hang tlung a. 24 Pathienin an inrŭm ri chu a lo hriet a, Abraham le Isak le Jakob kuoma a thuthlung chu a hriet zing a. 25 Pathienin Israel thlahai chu a zuk thlir a, a zuk ngaisak a.