Mosie le inchikna thilmak
4
1 Mosie chun, “Mi ringhlela ka thu ngaithla loin, ‘I kuomah LALPA inlâr naw nih’ mi tihai sien, iem ka law ding?” a ta. 2 Pathienin a kuomah, “I kuta i chawi kha iem a na?” a ta, ama chun “Hmol” a ta. 3 LALPA chun, “Hnuoiah pei rawh” a ta. A pei thlàk charin rûlin a hung inchang a, Mosie chu a tlansie a. 4 LALPA chun a kuomah, “I kutin ban la, a meia khan man rawh” a ta, a ban a, a hei man chun a hmolah a hung inchang nawk a. 5 LALPA chun, “Hi hi LALPA, an thlatuhai Pathien, Abraham Pathien, Isak Pathien le Jakob Pathien chu i kuomah a hung inlâr ngeizie an ring theina ding a nih” a ta.6 LALPA chun, “I kutin i korfuol mansa kha pur rawh” a ta. Mosie chun a pur a, a kut a hang lak suok chun, ngai ta, vûr anga vârin a lo inphăr ta vong a. 7 LALPA chun, “Tu khan i kutin i mansa pur nawk rawh” a ta. Mosie chun a pur a, a hang lak suok chun a kut chu a pang vun dang ang charin a hung um nawk el ta a.
8 LALPA chun Mosie kuomah, “Inchikna thil mak i thaw voi khatna hi an awi naw a, i thu an ngaithlak naw a ni khomin a voi hnina hi chu awi tang an tih. 9 Hi inchikna thil mak pahni hi pom lo a, i thu an la ngaithlak nâw rop a ni chun, Nile vadung tui zu thâl la, chu chu hnuoi chărah bun thla la, tui chu thisenah hung inchang el a tih” a ta.
10 Mosie chun LALPA kuomah, “Aw LALPA, kei hi chu kha hma le i siehlaw i biek hnung khom hin, mi bau themthiem ka ni ngai naw a, pa dangâwk le muong taka thu hril mi ka ni si a” a ta. 11 LALPA chun a kuomah, “Mihriem bâu hi tû pêk am a na? Trong thei lo le nasêta siemtu chu tu am a na? Tu am a na mit sukvara sukdel theitu? Kei, LALPA hi ka ni naw am a ni? 12 Tu hin fe el rawh, trong dàn ding zirtîr ka ti che a, i hril dinghai chu hril pei ka ti che” a ta. 13 Mosie chun, “Aw LALPA, hi thilthaw ding hin chu mi dang tir lem el ta la” a ta.
14 LALPA chu Mosie chungah a lungsen a, a kuomah, “I unaupa Aron, Levi chia mi hi teh? Ama hi chu a bău a themthiem ti ka hriet. Nangma hmu ding chein a hung nghé nghè a, a hmu phâ che chu a lungril lawm a tih. 15 Ama chu inbiekpui la, a băuah thû hi tù rawh; in pahnia in trong dan ding le thaw dan ding chu hril pei ka ti chêu. 16 Ama chu mipuihai kuoma i thu hril sawngtu, i ta dinga bău ning a ta, nang chu ama ta dingin Pathien ang ning i tih. 17 Amiruokchu, inchikna thil mak i thawna dingin hi hmol hi chawi rawh” a ta.
Aigupta ramah Mosie a kîr nawk
18 Mosie chu a tarpu Jethro kuomah a kîr nawk a, a kuomah, “Aigupta rama ka mihai zu kan a, a dama muol an la um am ti en dinga ka fe mi phalpêk rawh” a ta. Jethro chun, “Ni e, thlamuong takin fe rawh” a ta. 19 Midian rama a la um lai chun LALPAN Mosie kuomah, “Aigupta ramah kir nawk ta la, a that tumtu che po po kha an thi ram vong tah” a ta. 20 Mosie chun a nuhmei le a naupahai chu sabengtung chungah a’n chuongtir a, Aigupta panin an inthok suok a. Chun, a kutin Pathien hmol chu a chawi a.
21 LALPA chun Mosie kuomah, “Aigupta ram i tlung pha chun inchikna thil mak thaw theina ka pèk che hi Faraw hmaah i thaw ding a nih. Sienkhom a lungril sukkhaupêk ka ta, mihai chu insuoktir phal el naw nih. 22 Chu phâ chun Faraw kuomah hieng hin hril rawh: ‘Hi hi LALPA thu chu a nih: Israel hi ka nâu lutir a nih. 23 Ka naupa chun ka rong a bawl theina dingin insuoktir rawh khai, ka ti a, i’n suoktir phal naw vei a, chuleiin i naupa, i nau lutir chu sukhlum ka tih, a tih’ ti rawh” a ta.
24 Lampuia an riebukah LALPAN Mosie chu a zu sir a, a sukhlum hman vang a. 25 Zipora chun lung sìr ngei a lâk a, a naupa ser vun chu a tan thlak a, chu chun Mosie ke chu intawktirin, “Nang hi ka ta dingin thisen insuo hmang pasal i lo ni ngei luo hi tie!” a ta 26 LALPA chun Mosie hringna chu a hlapek a (Hi taka ‘thisen insuo hmang pasal’ a ti hin sertan thu a hril a nih).
27 LALPA chun Aaron kuomah, “Mosie tuok dingin thlalĕrah fe rawh” a ta. Mosie chu Pathien tlângah a’n tuokpui a, a fâwp a. 28 Mosie chun LALPAN a tir thu po po le inchikna thil mak a’n thawtir dan ding po po chu Aaron a hril a. 29 Mosie le Aaron chun Israel upahai po po chu an ko khawm a, 30 LALPAN Mosie kuoma thu a hrilhai po po chu Aaron chun a hril sawng nawk vong a, inchikna thil makhai a thaw bok a, mipui chun an awi ta a. 31 LALPAN Israel thlahai ngaisak a, an rinum tuor nasatzie a hmu tah ti an hriet chun kûnin ama chu an chawibiek a.