Efesi kohran kuoma thucha
2
1 “Efesi kohran vantirko kuoma chun hieng hin ziek rawh: A kut chang tienga arasi pasari chawi, rangkachak khawnvar siena pasari laia inlon inlon khan hieng thu hi a hril a nih: 2 I thilthawhai ka hriet, i sin inrimzie dam, i selzie dam, mi rilohai i ngai thei nawzie dam, tirko ni si lo tirkoa insâlhai chu fie a, a tehlêm an nih ti i man suok thuhai ka hriet a. 3 Ka hming leiin sel takin, harsatnahai beidong loin i tuor tihai khom ka hriet.4 “Amiruokchu, demna chê ka nei: i mi hmangai tìr ang khan i mi hmangai ta nawh. 5 I mi tlŭksan nasatzie hi ngaituo la, sim la, a tǐra i thaw ang khan thaw nawk rawh. I sim naw chun i kuomah hung ka ta, i khawnvar siena kha a hmuna inthokin son hmang ka tih. 6 Ka theidă zawng, Nikolahai Thup 2:14; Nam 31:15, 16a thilthaw i theidâ ruok hi chu i thaw thra. 7 Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnĕtu taphot chun Pathien paradis-a hringna thing ra chu fa thei an tih” tiin.
Smurna kohran kuoma thucha
8 “Smurna kohran vantirko kuoma chun hieng hin ziek rawh: A Hmasatak le Nuhnungtak, thia hring nawk ta khan hieng hin a tih: 9 I tuornahai le i pasietziehai ka hriet, sienkhom i hausa si. Juda mi ni lo, Juda inti, Setan Sunagoga mihaiin an hril siet dan chê khom ka hriet. 10 I thil tuor ding hi tri naw. Ngai ta, nangni laia mi threnkhat chu lung inah khumin Diebol chun a fie ding chĕu a na, ni sawm sung suknomnatna tuor in tih. Thi chenin ringum takin um pei la, hringna lallukhum pe’ng ka ti che. 11 Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnĕtu taphot chu thi hnǐna chun ieng khom law thei naw nih.
Pergamos kohran kuoma thucha
12 “Pergamos kohran vantirko kuoma chun hieng hin ziek rawh: 13 Kawlhnâm ngei ton, ngei tak neitu khan hieng hin a tih: Setan lalthrungpha innghatna hmunah i um ti ka hriet; sienkhom ka hming i chel tlat a, ka thu hretu mi ringum Antipa kha, in khuo Setan hmuna an that lai khom khan, i mi ringna i’n phatsan chuong nawh. 14 Amiruokchu, demna met che ka nei, Balaam zirtirna thu pomtu nangni lai in kol leiin. Ama chun Balak chu Israel nauhai thruoi suol dan a’n chuktir a, Israel nauhai chu milim biekna sa fa ding le inditna suola lût dingin a thruoi suol a. 15 Chuong ang bokin, nangni lai Nikola zirtirna chel tlat in um a. 16 Chuleiin sim ro, chuong naw chun in kuomah hung nghal ka ta, ka baua kawlhnâm hin ka hung bei tawl ding cheu a nih.
17 Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnĕtu taphot kuoma chun mana inthup threnkhat chu pe’ng ka ta; chun lung văr pe bok ka ta, chu lunga chun a dongtu chauin a hriet hming thar a chuong” tiin.
Thuatira kohran kuoma thucha
18 “Thuatira kohran vantirko kuoma chun hieng hin ziek rawh: Pathien Naupa, meichok inhlap ang mit nei le dâr tle chi ang ke nei chun hieng thu hi a hril a nih: 19 I thilthawhai ka hriet, i mi hmangaizie dam, i ringumzie dam, i rongbawl dan dam, i tuorselzie dam, i tran hlim nêka tuta thil i thaw nasat lemzie dam. 20 Amiruokchu, demna chê ka nei; nuhmei Jezebel, zawlnei inti kha i ngai thei leiin; ama chun ka siehlawhai chu indit chîng ding le milim biekna sa fa dingin a zirtir a, a thruoi suol a. 21 A simna dingin hun ka pêk a, sienkhom indit chîng a bănsan chuong nawh. 22 Chuleiin, natna khumah thè thlu’ng ka ta, a uirepuihai khomin an thil chǐng an sim naw chun nasa takin tuor an tih. 23 A nauhai chu khâwng hlum ka ta, chuongchun lungril le ngaituona po po hre vongtu ka nizie kohranhaiin hrieng an tih. In thilthaw ang peiin rul seng ka ti chêu.
24 “Thuatira khuoa mi danghai chun hi zirtirna hi zawm ve lo a, ‘Setan thurŭk ril’ an tihai khom in pom ve naw leiin in chungrikna belsa naw’ng ka tih. 25 Ka hung nawk hmâ khat in thil nei kha vong tlat ro. 26 A tawp chena ka ditzawng thawtu le hnĕtu chu, ka Pa kuoma inthoka thuneina ka hmu ang bokin, hnam tin chunga thuneina pe’ng ka ta, 27 ama chun thîr hmol hmangin an chungah ro rêl a ta, pil bêl angin dêng dar a tih. 28 Chun, sikhawvar khom pe bok ka tih. 29 Thlarauin kohranhai kuoma thu a hril hi hrietna dinga na nei chun ngaithla ngun raw se” tiin.