Sardis kohran kuoma thucha
3
1 “Sardis kohran vantirko kuoma khom hieng hin ziek rawh: Pathien Thlarau pasari le arasi pasari neitu chun hieng hin a tih: I thilthawhai ka hriet; dam vur angin i’n lang a, i thi tlat si. 2 Insukhar la, i thil la nei sun, thi vâng vâng hai kha sukhring nawk rawh. I thilthawhai ka Pathien mit tlung zo hrim ka hmu nawh. 3 A zirtir che le i thu donghai kha hre zingin zawm la, i suol sim rawh. I har naw chun rûkru angin hung ka ta, ka hung tlung hun hre naw pal i tih.4 “Sardis khuoa mi tlâwmte ruok chu an silfenhai sukporchè lo an um a, chuonghai chun an phŭ ang hrimin, thuom vâr hâkin ka kuomah lêng ve’ng an tih. 5 Anni ang boka hnĕtu chun thuom vâr hâk a ta, hringna bua inthokin a hming thâi bo ngai naw ning. Ka Pa le vantirkohai hmaah ama chu tran ka tih. 6 Thlarauin kohranhai kuoma thu a hril hi hrietna dinga na nei chun ngaithla ngun raw se.
Filadelfia kohran kuoma thucha
7 “Filadelfia kohran vantirko kuomah hieng hin ziek rawh: Mi Thienghlim, Mi Indik, Davida chabi neitu, a hong tah chu tu khomin khàr thei lo, a khàr tah chu tu khomin hong thei lo chun, hieng hin a tih: 8 I thilthawhai ka hriet. En ta, tu khom khàr thei lo kotkhar hong sa i hmaah ka’n nghat hi. Hrătna tlawmte chauh i nei ti ka hriet a, sienkhom ka thu i vong tlat a, ka hming i‘n phat ngai nawh. 9 Setan sunagoga mi, mi khêlhlip ruol, Juda ni si loa Judaa insâlhai chu hung thruoiin i ke bulah inkûntir ka ta, nang hi ka hmangai chu i nih ti hre ta’ng an tih. 10 Sel taka tuor dinga thu ka pĕk che chu i vong leiin, hnuoia chêng po po fiena dinga khawvel pumpuia hremna a hung tlung hunah kei khomin humhim ka ti che.
11 “Ka hung vak ding a nih. Lallukhum i chang ding chu tu khomin an inchupêk nawna ding chein i thil nei sa kha vong tlat rawh. 12 A hnĕtu taphot chu ka Pathien tempul banah phun ka ta, chu taka inthok chun son ni ta ngai naw ni hai. Pa Pathien hming anniah chuong a ta, Pathien khawpui Jerusalem thar, ka Pathien kuoma inthoka hung trum hming le ka hming thar chu anniah ziek bok ka tih. 13 Thlarauin kohranhai kuoma thu a hril hi hrietna dinga na nei chun ngaithla ngun raw se.
Laodikei kohran kuoma thucha
14 “Laodikei kohran vantirko kuoma chun hieng hin ziek rawh: Amen, Thuhretu Ringum le Mi Indik, Pathien thilsiem po po bul chun hieng hin a tih: 15 I thilthawhai ka hriet, i dei naw a, i lum bok nawh; i dei amanih i lum amanih ka dit a nih. 16 Dei si lo, lum si loa i lum puot chauh leiin ka baua inthokin peisâk ka ti che. 17 ‘Ka hausa a, iengkim ka hau a, tlăksam ka nei nawh’ i ti vei a; sienkhom mi rimsi, lungsietum, pasie, mitdel le saruok el i nih ti i’n hriet si nawh. 18 I hung hausak theina dingin, meia rangkachak raw thieng hnung chu ka kuoma inthoka inchaw dingin thurâwn ka pêk che. I saruokna inzapuium tak inkhumna dingin hăk ding zakaw vâr le i mita i hmu theina dingin mitna damdawi inchaw rawh. 19 Ka hmangai chu zilin ka thunun hlak. Chuleiin, ka thu ngai la, sim rawh. 20 Ngai ta, kotkhar bula ngîrin ka kik hi; tu khom ka rawl hrea kot mi hongpektu kuoma chun lûtin a kuomah zanbu kîl ka ta, ama khomin ka kuomah kîl bok a tih. 21 A hnĕtu taphot chu ka lalthrungphaah inthrungtir ve’ng ka tih, kei khomin ka hnè a, lalthrungphaa ka Pa bula ka’n thrung ve ang hin. 22 Thlarauin kohranhai kuoma thu a hril hi hrietna dinga na nei chun ngaithla ngun raw se.” tiin.