THUPUONG
Thuhma
1
1 Isu Krista thu puong suok hi Pathienin thil hung tlung vak ding thu a siehlawhai hriet dinga a pĕk le vantirko tira a siehlaw Johan kuoma a hung inhriettir chu a nih. 2 Johan chun Pathien thu le Isu Krista inhriettirna a hmu le dong po po chu a puong a nih. 3 Hi hrillawkna thuhai hi tiem a, ngaithla a, thu zieka umhai lungrila zawmtuhai chu an ham a thra ie, a hun a tlung trĕp ta si a.4 Johan chun Asia rama kohran pasarihai chibai a bûk chĕu. Um zing le um tah le la um ding le a lalthrungpha hmaa thlarau pasari le 5 Isu Krista, thuhretu ringum, mithi laia inthoka tho hmasa tak, hnuoia lalhai chunga rorêltu kuoma inthoka lunginsietna le inremna chu in kuomah um raw se.
6 Mi hmangai a, a thisena ei suolhaia inthoka mi’n tlan suok a, a lalram le Pa Pathien rong bawl dinga thiempu hnama mi siemtu kuomah, ama kuoma ngei chun, ropuina le lalna chatuonin um raw se. Amen.
7 En ta u, sûm lai khin a hung mĕk a nih, mit tinrêngin hmu’ng an ta, ama suntuhai ngei khomin. Chun, khawvela hnam tinin ama trà bok an tih. A nih, chuong ang tak chu ni raw se! Amen.
8 “Kei hi Alfa le Omega, um zing le um tah le la um ding, Iengkimthawthei chu ka nih” Lalpa Pathien chun a tih.
Krista inlărna
9 Kei Johan, in unau, Isu leia sukdŭdăna sel taka tuorpuitu chĕu le a lalna intrawmpuitu chêu hi Pathien thu lei le Isu thu inhriettir ka hril leiin Patmosa an ti thlierkarah siein ka um a. 10 Lalpa nia chun thlarauin ka lo um a, ka hnung tienga inthokin rawl inring tak el, tawtawrawt ri ang ka hriet a. 11 “I thil hmu hi lekhaah ziek thla la, kohran pasari- Efesi kohran, Smurna kohran, Pergamos kohran, Thuatira kohran, Sardis kohran, Filadelfia kohran le Laodikei kohran -hai kuomah thon rawh” a ti ka hriet a.
12 Rawla mi hung betu chu hmu tumin ka hei ngha kǐr a, rangkachak khawnvar siena pasari ka hmu a, 13 khawnvar siena lai chun ‘Mihriem Naupa ang’,b kepha huopa korfuol hăk, a âwma rangkachak kawngchŭna inhrêng ka hmu bok a; 14 a lu le a sam chu sahmul vàr ang le vûr anga vâr a na, a mit chu meichok inhlap ang a na; 15 a kephahai chu dâr tle chi, rawtuina meia raw thieng tah ang el a na; a rawl chu tuipui insok ri hum hum ang a nih. 16 A kut chang tieng arasi pasari a chawi a; a baua inthok chun kawlhnâm ngei ton, ngei tak el a hung suok a, a hmêl chu nisa var vanglai ang a nih.
17 Ama ka hmu phing leh a ke bulah thidangin ka tlu a. A kut chang tieng ka chungah a hung innghat a, 18 “Tri naw rawh, kei hi a Hmasatak le Nuhnungtak, Mihring chu ka nih; ka thi a, sienkhom ngai ta, chatuona dingin ka hring nawk tah. Thina le Mithi khaw chabihai neitu ka nih.
19 “Chuleiin, i thil hmu tahai, thil um zing le thil la tlung dinghai chu ziek thla rawh. 20 Ka kut chang tienga arasi pasari le rangkachak khawnvar siena pasari i hmuhai umzie inthup chu hi hi a nih: arasi pasarihai chu kohran pasari vantirkohai an na, khawnvar siena pasari chu kohran pasarihai chu an nih” a ta.