Pathien ta dinga hring
4
1 Chuongchun, Kristan taksaa a tuor angin nangni khomin chuong ang lungril chu put ve ro; taksa ngeia tuortu chun suol a bansan ta hlak a; 2 taksa puta a dam sung chun mihriem châknahaia hring ta loin Pathien ditzawngin a hring ta lem hlak a nih. 3 Ringnawtuhai nuomzawnga porchè taka khawsa a, tisa chăknaa inhmang a, uoiin inrui a, hlimhlop le zu hmun hlimna chĕn a, milim biekna tirdakum taka kha hmaa hun inkhaw ral zozai kha a huntawk tah. 4 Tu hin an nuomtawlnaa in intawl ve ta naw leiin mak an ti a, an hril siet chêu a ni hi. 5 A la dam laihai le thi tah hai ngaituo dinga inpei zing sa kuoma chun an chungthu anni ngeiin la hril an tih. 6 Hi lei hin annawm lo thi tahai kuoma khom khan Chanchin Thra hril a ni chu, mi danghai ang boka an mihriem taksa chungthu rĕl a ni phaa Pathien hmaa thlaraua an hring theina dingin. 7 Thil po po tawp hun chu a hnai ta a, chuleiin in trongtrai theina dingin lungril fîm tak putin mani inthunun ro. 8 Thil dang po nêkin lungril taka inhmangai tuo uor ro, inhmangaina chun suol tam tak a’n khum si a. 9 Chier loin inmikhuol tuo ro. 10 Mi tinin thlarau thilpĕk in dong seng chu mi danghai rongbawlpĕkna dingin hmang unla, kong hrang hrangin Pathien lunginsietna chu sem dar ro. 11 Tu khomin thu a hril chun Pathien thu ngei hril raw se. Rongbawltu khomin Pathienin hrătna a pĕk angin bawl raw se; chuongchun, Isu Krista leiin Pathien chu iengkimah chawimawiin um thei a tih, ropuina le thilthawtheina chatuonin ama ta a ni si a. Amen.
Kristien anga tuor
12 Dittakhai, fiena rinum tak in tuok hi thilmak tak hung tlung angah ngai naw ro. 13 Krista tuorna intrawmpuitu in ni leiin lawm lem unla, ropui taka a hung inlang pha chun lawm le hlimin in la sip ding a nih. 14 Krista hming leia hal in tuok chun in vangnei ie, nangniah thlarau ropui, Pathien thlarau chu a chêng tǐna a nih. 15 Nangni lai tu khomin tuolthat lei amanih, rûkrŭk lei amanih, thil suol thaw lei amanih, mi sukbuoi leiin amanih tuor naw raw se. 16 Kristien in ni leia tuor in ni ruok chun inzak naw unla, Krista hming in put leiin Pathien chawimawi lem ro. 17 Pathien sungkuohai lai hin rorelna tran a hun tah khop el. Lo tran ni tah inla, Pathien Chanchin Thra awinawhai ngirhmun chu iem ni tang a ta? 18 Pathien Lekha thuin, “Mi indikhai hman sandam a harsa chun, mi suolhai le sakhaw mi lohai chan lem chu ieng top am ni tang a ta?” a ti khah.
19 Chuong chu a ni leiin, Pathien remti anga tuorhai chun thil thra thaw peiin, an thlarau chu Siemtu ringum tak kuomah inkoltir raw hai se.