Upahai infŭina
5
1 Nangni laia kohran upahai chu kei, upa ve bok, Krista tuornahai hmutu le ropuina hung inlang ding chang ve beiseitu hin ka’n fŭi a nih. 2 Nangni laia Pathien beramhai chu enkol thra ro. Thaw dinga ti in ni lei ni loin, Pathien dit dan anga nangnia thaw inhâwkna leiin thaw unla, sum tienga in inhawmthaw lei ni loin, rongbawl nuomna lungril putin enkol ro. 3 In enkolhai chungah insuklal naw unla, an enton tlăkin um lem ro. 4 Chuongchun, Beram Vengtu Laltak a hung pha chun ropuina lallukhum chul thei lo chu dong in tih.5 Chuong ang bokin nangni thralaihai, upahai thu awi ro. In rêngin thuhnuoirolnaa inthuomin rong inbawlpêk ro. “Pathienin chapohai a dodăl a, inngaitlawmhai ruok chu a lunginsiet hlak” ti a ni si a. 6 Chuleiin, a hun takah chawimawia in um theina dingin Pathien kut hrât tak hnuoia chun inphàhnuoi ro. 7 In lungkhamna po po ama chungah innghat vong ro, a ngaisak ĕm êm chêu a nih.
8 Ngaiven unla, fimkhur ro; in hmĕlma Diebol chun sakeibaknei inrŭm angin sè ding zongin a vê zing chêu a nih. 9 Ringnaah ngîr nghet unla, ama chu do ro. Khawvel hmun danga in unauhai khomin chuong ang bok chu an tuor ti in hriet si a. 10 Sawt nâw tè in tuor hnungin, Kristaa a chatuon ropuina chang dinga kotu chĕu, lunginsietnaa sip Pathien chun hung tungding a ti chêu a, siem thraa sukhrâtin, suknghet a ti chêu. 11 Ama kuoma chun thilthawtheina kumkhuoin um raw se. Amen.
Inthlàna chibai
12 Unaupa, mi ringum a nih ti ka hriet Sila kuta hin hi lekha tawite hi ka hung thon chêu a nih. Hi hi Pathien lunginsietna chu a nih ti inhriettir ding chĕu le chu taka chun ngîr nghet tlat dinga ka’n fŭina chĕu a nih. 13 Babulon kohran, nangni ang boka thlanghai hin chibai an bŭk chêu; ka naupa Marka khomin a bûk chĕu. 14 Krista hmangainaa kut inchelin, chibai inbûk ro. Nangni Kristaa umhai po po kuomah inremna um raw se.