Nupa thu
3
1 Chuong ang bokin nangni nuhai, in pasalhai thu awi ro; chuongchun anni lai ringnaw an lo um a ni khomin thu hril kher ngai loin in nungchang chun hnè el a tih, 2 anni ngeiin thienghlim tak le inzà taka in khawsakzie chu an hmu ding a ni si a. 3 In hmĕl thratna chu puo tieng incheina sam chei lĕr dam, incheina hmangruo rangkachak dam le silfen to inbel dama innghat ni naw raw se. 4 Chuong nêk hmanin, sûng tieng hmêl thratna, nunnĕmna le zaidăwna thlarau, mawina chuoi thei loa inthuom ni lem raw se. Chu chu Pathien mit hmuah a hlu hlie hlie a nih. 5 Chuong ang chun tiena tlânga nuhmei thienghlim, Pathiena beiseina innghattuhai kha, an pasalhai thu awinain an lo inthuom mawi a nih; 6 Sarin Abraham thu a awi a, “Ka lalpa” tia a ko ang khan. Indik taka in thaw chun Sari nauhai ni’ng in ta, tritna ding hrim nei naw ti niu. 7 Nangni pahai, chuong ang bokin nupa in ninaah in nuhmeihai lakah zâi daw unla, derdêp lema siem an ni lei le Pathien lunginsietna thilpêk hringna chu hluopuitu chĕu an ni leiin, inzà takin cheibawl ro. Chuongchun, in trongtraina hluotu ieng khom a um naw ding a nih.
Felna leia tuor
8 A tawp taka chun, in rênga lungril hmun khat putin, inlainata unau anga inhmangai tuoin, inlunginsietin thuhnuoirol takin um ro. 9 Suol chu suolin thungrul naw unla, trongsie khom trongsiea thungrul loin malsawmpek lem ro; malsawmna dong dingin annawm Pathienin a ko chêu chu. 10 Pathien lekha thuin,
“Tu khom mani nun thlâkhla a,
Ni thra hmua dam sâwt nuom chun,
Suol lakah a lei vêng thra sien,
A hmŭrin khêl hril naw raw se.
11 Suol nghatsanin thil thra thaw ro,
Inremna zongin hnot pei ro.
12 LALPAN mi felhai a hmu zing,
An ko pha a ngaithlak var hlak.
Suol thawtuhai laka ruok chu,
LALPA hmĕl a’n tûr zing hlak”
a tih.
13 Thil thra thaw tieng thrahnem in ngai chun tuin am in chungah thil thra naw a thaw ding? 14 Thil indik in thaw leia tuor in ni chun hamthraah inngâi ro. An thil trìhai chu trì ve naw unla, sukthlaphângin um naw ro. 15 In lungrilah Krista chu inzain Lalah sie ro. In beisei san indontu taphot chêu chu hril fie nghal dinga inpei sa zingin um ro. 16 Nisienlakhom, thuhnuoirol le hawihawm takin, sie le thra hrietna fîm tak neiin thaw hlak unla, chuongchun, Kristaa in um dan thra hril hnâwmtuhai chu sukzakin um an tih. 17 Pathien remtia tuor in ni rau rau si chun thil suol thaw leia tuor nêkin thil thra thaw leia tuor chu a thra lem.
18 Krista khom ei suolhai leiin voi khat a thi a, Pathien kuoma a mi thruoi theina dingin, mi fel chu mi fel naw ta dingin a thi a nih. Taksaa sukhlum a ni a, thlaraua ruok chu sukhringin a um a. 19 Ama chun lung ina intâng thlarauhai kuoma khom thu a zu hril a. 20 Chuonghai chu Nova long tuk sunga Pathienin dawthei taka a nghăk laia awi nuom nawtuhai thlarau kha an nih. Longa chun mi tlâwm te, pariet chauh sanhim an nih. 21 Chu angpui, baptisma hin, Isu Krista thonawkna leiin tu hin a sandam tah chêu a nih; baptisma chu taksa tirdakum sawpfaina chauh a ni naw a, sie le thra hrietna fîm taka Pathien kuoma thu tiemna hi a ni lem. 22 Isu Krista chu vanah fein Pathien chang tieng a um a, vantirkohai le lalna le thuneina po po chu a thuhnuoiah an um ta vong a nih.