Hringna lung le hnam thienghlim
2
1 Chuongchun, suol tinrêng bansan unla, inhlêm le inlêmder hai, inthîk le inhril siethai po po bansan ro. 2 In sandamnaah in inthranglien pei theina dingin, naute pieng hlim angin thlarau tieng nenetui, tui pol lo chu châk hle ro. 3 “Lalpa thratna chu hang intem ve hrim ta u” ti ziek a ni kha. 4 Ama chu pan ro, Hringna Lung, mihriemhai hnăwl, Pathien thlang, hlu tak chu a ni si a. 5 Nangni khom hringna lung anga thlarau in dinga rem khawm le thiempu thienghlim hung ni vein, Isu Krista zara Pathien pom tlak, thlarau tienga hlanbiekna chu inhlàn ro. 6 Pathien Lekha thuin,“En ta, lungphum hlu tak ka thlang chu,
Zaiawn thrutah ka phŭm a;
Tu khom ama ring zotu chu,
Muolpho ngai naw nih”
a ti si a.
7 Nangni ringtuhai ta ding chun lung hlu tak,
“In bawltuhai lung hnawl ngei kha,
A bulthrut dotu poimaw tak a hung ni tah”
ti a ni a; ring nawtuhai ta ding ruok chun ziek dangah,
8 “Mi insui thlukna ding lung,
An intol thlŭkna ding lung ngei chu”
tiin a chuong ve thung a. Thu an awi naw leiin an tlu a, chuong anga um ding rènga ruot chu an nih.
9 Nangni ruok chu hnam thlang, Lalpa thiempu, hnam thienghlim, Pathien ta bik, ama var ropui taka chêng dinga thima inthoka ko suoktu chêu inpâkumzie chu puongtu ding in nih. 10 Kha hma khan Pathien mi in ni ngai naw a, tu ruok hin chu in ni tah; zangaina hlaw ve ngai lo khan tu hin chu zangaina in lo chang tah a nih.
11 Unauhai, hi khawvela hin ram dang mi le mikhuol el in ni leiin, in thlarau kala do hlaktu châkna suolhai laka chun inthier fihlim dingin ka ngĕn chêu a nih. 12 Ringnawtuhai lai mawi takin khawsa unla, thil suol thawa an intum chêu a lo ni khomin in thil thaw thrathai an mit ngeiin hmung an ta, Pathienin a mi hung kan ni pha leh ama chawimawi thei an tih.
Thuneituhai laka um dan ding
13 Lalpa leiin mihriem ruot thuneituhai kuoma chun intuklût ro. Thuneina insang tak neitu lal tak kuoma dam le 14 thil suol thawtuhai hrem ding le thil thra thawtuhai chawimawi dinga lalin a tir sawng lârsaphai thu chu awi ro. 15 Ieng khom hre lohai thuhril invêtthlakhai chu thil thra thawa sêl dong dingin Pathienin a dit chêu a nih. 16 Pathien bawihai in ni ang hrimin, zalen unla, sienkhom in zalenna chu suol thawna dinga suonlam remchângah hmang naw ro. 17 Mi po po inzà thiem unla, unauhai hmangai unla, Pathien tri unla, laltak chu chawimawi ro. 18 Nangni siehlawhai, in puhai thupĕk awi unla, a thra le ngilneihai chauh ni loin, a khauhhai khom inzà ro. 19 Miin Pathien lawmzawng nia a hriet tlat leia a tuor kher naw ding khom a tuor chun, chu chu Pathien lawmzawng a nih. 20 In suol leia in tuor chun sel takin tuor inla khom in ta dingin hming thratna ding iem um a ta? Thil thra in thaw sà khoma kut in tuor ruok chun Pathien lawmzawng a nih. 21 Hieng anga um dinga ko in ni a, Krista khomin in ta dingin a tuor a, a hniekhnung in zui theina dingin enton ding a maksanpĕk chêu a ni kha. 22 Ama chun thil suol a thaw ngai naw a, a bauah hlêmna thu a suok ngai bok nawh. 23 Miin an biek el khomin a thungrul ve naw a, a tuor laiin a vau lèt ve naw a, indik taka rorêltu kuoma chun a’n koltir lem hlak a nih. 24 Suol thisána felna tieng ei hring theina dingin, ama taksa ngeiin thinga khan ei suolhai a phur a, a hliemna bèhai chun sukdam ei ni tah. 25 Beram angin lam in inhmang tah a, tu ruok hin chu in thlarau Vĕngtu le Hotu kuoma chun in hung kir nawk tah a nih.