3 Ei Lalpa Isu Krista Pathien le Pa chu inpâkin um raw se. Ama chun a zangaina ropui tak leia mithi laia inthoka Isu Krista a keithona zara chun beiseina hring nei dingin nun thar a mi pêk a. 4 Ro se thei lo, hmêl hem lo le chuoi thei lo hluotu ding ei lo ni tah a, chu chu in ta dingin vanah sie diem a ni tah. 5 In sandamna buotsaia um tah chu, hun nuhnunga suklanga a um ni chenin, ama in ringna leiin Pathien thilthawtheina chun hum zing a tih. 6 Hi sawt naw te sung hin fiena le lungngaina tinrêng in tuok a ni khomin, hlim takin um ro. 7 Chuong thil chu in ringna chu a tak ngei a nizie fiena ding a nih. Se thei rangkachak hman meia fie a ni chun, a nêka hlu lem in ringna chu fie ding a ni hrim a nih, Isu Krista hung inlang phaa a hlîr ni a, inpâkna dam, ropuina dam le chawimawna dam in dong theina dingin. 8 Ama hmu lo khomin in hmangai a, tu hin ama in la hmu hri nawa chu in ring a, hlimna hril sêng lo khopa nasain in sip a ni hi, 9 in ringna ra, in thlarau sandamna chu in hmu mĕk leiin.

10 Hi sandamna chungchang hi zawlneihaiin fimkhur taka zongin an sui a, in chunga Pathien thilpêk, lunginsietna hung tlung ding chu an lo puong a nih. 11 Annia Krista thlarau um chun Krista tuorna le a hnunga chawimawia a um ding thu chu a’n hriettir lawk a, a hung ding le a hung dan ding chu hriet an tum hlak a nih. 12 Anni ta ding ni loin nangni ta dinga rongbawl an nih ti inhriettir an ni a, vana inthoka tirh Thlarau Thienghlim hmanga in kuoma Chanchin Thra hriltuhai khan chu thu chu an hril ta chêu kha. Chuong thil chu vantirkohai chen khomin hmu ve an chàk ngăwi ngâwi a nih.

13 Chuleiin, in lungril chu thilthaw dinga inpei diemin, mani inthunun unla, Isu Krista hung inlang huna lunginsietna vûra in um ding chu beisei tlat ro. 14 Nau thu awi thei anga umin, kha hmaa in mawl laia châkna suol in zui ang khan zui ta naw ro. 15 A kotu chĕu a thienghlim angin nangni khom in chêt dan iengkimah lo thienghlim lem ta ro. 16 Pathien Lekha thuin, “Kei ka thienghlim a, nangni khom in thienghlim ding a nih” a ti si a.

17 Paa in ko hi thlier bîk nei lo, mi tin an thilthaw ang peia rêlpektu a ni leiin, hi khawvela in châm sung hin ama chu inzà le trì dêkin khawsa ro. 18 In thlatuhaia inthoka in dong sawng, nun dan invêtthlak taka inthoka thil se thei tangkaruo le rangkachaka intlan in ni naw a, 19 beramte hmêl hem lo le soisĕl bo, Krista thisen hlua intlan in ni lem ti in hriet si a. 20 Ama chu leilung insieng hmaa ruot lawk a ni a, tuta hun nuhnunga hin in ta dingin a hung inlang tah a nih. 21 Mithi laia inthoka keithotu le ropuina petu Pathien chu ama leiin in ring tah a, chuongchun Pathien chu in ringna le beiseina innghatna tak a hung ni tah a nih.

22 Thutak zawma in insukthieng tah leiin unauhai khom titak zetin in hmangai tah a, chuleiin lungril po poin inhmangai tuo ro. 23 Chi hmon thei ni loin, chi hmon thei lo, Pathien thu hring le tloa inthoka pieng thar in nih.