Lalpa thununna
12
1 Chuongchun, chuong ang lawma tam thlirtuhaiin sumpui anga an mi’n huol khup lei chun, mi sukhnok le kei châi thei suol taphot chu thè thlain, ei hmaa intlànsieknaa hin sel takin tlân ei tiu. 2 Isu, ei ringna innghatna bul le sukfamkimtu chu en tlat ei tiu. Ama chun a hmaa hlimna lo hmuoktu ding lei chun, muolphona chu ngainêpin, kraws-ah sel takin a tuor a, Pathien lalthrungpha chang tieng a hang inthrung tah a nih. 3 Châua in beidong nawna dingin, chuonga mi suolhai dodălna po po lo tuor muolsuotu chu ngaituo hlak ro. 4 Suol doin thisen suok khopin in la thrang nawh. 5 Nauhai anga an infŭina chêu kha in lo theinghil tah a ni hi:
“Ka naupa, Lalpa thununna chu ngainêp naw la,
Kăwka i umin i lung sukhnuol bok naw rawh;
6 Lalpan a hmangai chu a thunun hlak a,
Naua a pom taphot chu a hrem hlak”
7 Harsatna hi thununnaa ngaiin tuor hrâm hrâm ro, nauhai chunga thaw angin Pathienin in chunga khom a thaw ve a ni hi. Pa thunun lo nau tu am an um hlak a? 8 Nauhaiin an hlaw hlak pa thununna in hlaw ve naw chun, nau tak ni loin sâwn ning in tih. 9 Mi thununtu pa ei nei seng a, ei inzà êm êm bok. Ei hringna dingin thlarau tienga Pa thununna hnuoiah ei kûn lem naw ding maw? 10 Ei paha’n thra an ti angin sawt nâw tè an mi thunun hlak a, ama ruok chun a thienghlimna ei chang ve theina dingin, ei thratna dingin a mi thunun lem hlak a nih.
11 Thununna hrim hrim hi tuor lai chun a rinum ĕm leiin thil lawmumin a’n lang ngai nawh; sienkhom mi a sawizoi hnung ruok chun felna le thlamuongnain a ra suok a, mi a siem thra hlak.
12 Chuleiin, in kut zoi thla tahai kha phar suokin, in khŭp tlep tahai kha sukhråt unla, 13 kebâi chu a ke inpelsol loa a hung dam theina dingin in lampuihai siem ruol ro.
Pathien lungsietna hnar lo ding
14 Mi po po leh inrem tum hrâm hrăm unla, thienghlimna hnot ro; thienghlimna naw chun tu khomin Lalpa hmu thei naw ni hai. 15 Pathien lunginsietna chu tu khomin an chăn nawna ding le sukbuoi le sukporchè theitu khâkna zung dăm nangni lai a hung inder suok nawna dingin fîmkhur ro. 16 Tu khom inngai chîng dam le Esau anga sakhuo poisa lo dam in um nawna dingin fimkhur bok ro. Esau chun a naulutir nǐna chu bu voi khat fâk chauin a zor a ni kha. 17 Chu hnung chun a malsawmna dong ding chu chang nuom ieng ang sien khom hnăwlin a um a, mitthli leh a ngèn ngiela chu thlăk danglam thei a ni ta nawh ti in hriet kha.
Van Zion le hnuoi Zion
18 In tlungna tlang hi Sinai tlang ang a ni nawh ti hre ro. Sinai tlang chu tawk thei a na, chu tlang chu mei chok zur zur suokna, thim sa mupin a bawm, thlipui a hràngna, 19 tawtawrawt an rîk ruoi ruoina, ri nasa tak hung suokna a nih. Chu rawl hretuhai chun thu dang hril zom pei lo dingin an ngèn a. 20 Sa khomin tlâng chu a tawk chun lunga dèng hlum ding a nih ti thupek chu an dawl zo nawh. 21 A tri-um èm leiin Mosie khomin, “Triin ka’n thin” a ti hiel kha.
22 Zaiawn tlang, Pathien hring khawpui, van Jerusalemah, vantirko sang tam tak hai, 23 naulutir kohran, vana hming chuong hai, mi tin ro rêlpêktu Pathien le sukfamkima um tah mi fel thlarau hai inkhawmpuina hmaah in ngǐr tah a, 24 Abel thisen nêka thra lema thu hril thei thisen thêtu Isu, thuthlung thar palai kuom chu in tlung tah a ni hi. 25 Thu hung hriltu hi lo hnawl hlauh rawi in tih, fimkhur ro. Hi hnuoia an kuoma thuhriltu lo hnawltuhai hman khan hrem an pumpel si naw chun, vana inthoka thu hung hriltu ei lo nghatsan vai chun hrem pumpel naw nawkzuol ei tih. 26 Chuong lai chun rawl khan hnuoi a nghor hnǐng a, tu hin ‘voi khat chu hnuoi chauh khom ni lo, van khom la nghor hnǐng nawk ka tih’ tiin thu a tiem a nih. 27 ‘Voi khat chu’ ti hin thilsiemhai chu sukhnînga son bo an ni ding thu le sukhnîng thei lohai chauh an um zing ding thu a kâwk. 28 Chuongchun, ram sukhnîng thei ruol lo ei nei leiin lawm ei tiu, inzà tak le trì tak pumin a lawmzawngin Pathien rong chu bâwl ei tiu. 29 Ei Pathien hi mi kăng hmang thei mei a ni takzet si a.