Ringna
11
1 Ringna chu thil beisei a um ngei namnghetnaa le la hmu lo thil hriet chiengna a nih. 2 Ringna thua hin tien lai mihai kha inpâk an um hle.3 Khawvel hi Pathien thua inumtir le thil hmu theia umhai hi hmu thei loa inthoka hung um a nih ti ringnain ei hriet.
4 Ringnain Abel chun Kaina hlànbiekna nĕka pom tlâk lem Pathien kuomah hlanbiekna a’n hlàn a, Pathienin a thil inhlàn chu a pom a, mi fela a ruot thu a’n hriettir a. Ama chu thi tah sien khom a ringna leiin thu a la hril zing a nih.
5 Ringnain Enok chu thǐna intem loa lăk tung a ni a, Pathienin a lâk tung leiin hmu ding a um ta nawh. Lăk tung a ni hma khan Pathien a suklawm ti Lekha thuin a ziek. 6 Ringna naw chun Pathien suklawm ruol a ni si nawh. Tu khom Pathien hung pantu chun Ama chu a um ngei a, lungril taka Ama zongtuhai chu lawmman a pêk hlak ti a ring ding a nih.
7 Ringnain Nova chun thil hung tlung ding chungchang hrillawkna a dong chu Pathien trîna thienghlim tak neiin a sungkuo himna dingin long a tuk a. A ringna chun khawvel thiem naw a’n changtir a, ringna leia thiem inchangtirna rochungtu a lo ni tah. 8 Ringnain Abraham chun a la rochung ding ram pan dinga Pathien kona chu a zawm a, panna ding tieng khom hre loin a’n thok suok a. 9 Ram tiema chun, mi rama mikhuol chambâng ang elin, ringnain a châm ta zing a, thutiem thuhmun a dongpui Isak le Jakob hai leh puon inah an khawsa a. 10 Pathien rêl le indin khawpui, lungphŭm nghet tak nei chu, Abraham chun a nghâk ta zing a.
11 Ringnain Abraham chu tar ta hlein le Sari khom chu ching sien khom chi thla theina a dong a, thutiemtu chu a ring tlat a. 12 Chuongchun, thi ang deuthaw ni tah sien khom, hi mi pakhata inthok hin chi thla, vana arasi anga tam le tuipui kama tiem seng lo phaiphin anga tam an hung suok tah a nih.
13 Hienghai po po hi an thi khan ringnaah an la um zing a, thil tiem chu la chang hri naw hai sien khom an hmu tah a, hla taka inthokin an lo lawm a nih. Hnuoia hin mikhuol le khuolzin châm el an nih ti an inhriet a. 14 Chuong ang chauh chu an nih ti hretuhai chun mani ram hlun ding an zong lem hlak ti an suklang. 15 An suoksan ram kha lungkham ni hai sien chu, kǐr nawkna ding hun remchang hmu ngei an tih. 16 Sienkhom, ram thra nawkzuol, vana um chu, an ngai lem a nih. Chuongchun, Pathien khomin an Pathien ni a’n zak naw a, an ta dingin khawpui a lo buotsai tah a nih.
17 Ringnain Abraham chu fiea a um lai khan a naupa nei sun Isak chu hlanbiekna dingin a’n hlàn a. 18 Thutiem dongtu a na, “Isaka hin i thlahai sui ning an tih” ti ni sien khom, 19 Pathien chun mithi khom keitho thei a tih ti ringin a’n hlàn a, thi hnung hung dam nawk ang elin a hmu kǐr nawk ta ngei hrim a nih.
20 Ringnain Isak chun thil la hung um dinghai thuah Jakob le Esau mal a sawm a.
21 Ringnain Jakob chun a thi tawm khan Josefa nauhai chu mal a sawm vé vè a, a funghrol ringsana kûnin Pathien a chawibiek a.
22 Ringnain Josefa chun a thi a hung hnai khan Aigupta rama inthoka Israel thlahai an suok ding thu hrilin a ruong phŭm dan ding thu a’n cha bok a.
23 Ringnain Mosie a hung pieng khan nau pangngai a ni nawh ti hmuin a nu le pahai chun thla thum sung an thup a, lal thupêk khom an tri nawh.
24 Ringnain Mosie a hung puitling hnung khan Faraw naunu naupaa inbûk a nuom naw a, 25 sawt nâw tè sŭnga dinga suol inhoitirna chĕn nêk chun Pathien mihai le suknomnat tuor chu a thlang tah lem a. 26 Aigupta ram hausakna po po nêk chun Krista an hmusitna chu ro hlu lemah a ngăi a, lawmman a dong ding chu a thlîr tlat a. 27 Lal lungsen khom tri loin Aigupta ram chu ringnain a suoksan a, Hmutheilo chu a hmu leiin sel takin a tuor a. 28 Ringnain Fekân kŭt chu a tran a, sukbohmangtuin Israel naulutirhai a tăwk nawna dingin an kotkhar biengah thisen a’n thètir a. 29 Ringnain Tuipui Sen kha hnuoi hula fe ang elin an fè kăi a, Aigupta mihaiin kăi ve an tum a, an tla hlum ta vong a. 30 Ringnain Jeriko kul chu ni sari an inhuol a, a chim tah a. 31 Ringnain nawchizor Rahabi chun enthlatuhai kha lawm takin a lo intlungtir a, ringnawtuhai lai a bohmang ve ta nawh.
32 Ei la hril pei di’m a ni? Gideon hai, Barak hai, Samson hai, Jeftha hai, Davida hai, Samuel hai le zawlneihai chanchin hril ding ni inla, hunin a mi dai awm si nawh. 33 Chuonghai chun ringnain ramhai an lăk a, indik takin ro an rĕl a, thu tiem chu an dong a, sakeibaknei bauhai an sukchǐp a; 34 meichok inhlap puot puot an sukmit a, kawlhnâma that an pumpel a, ongrophai sien khom sukhrâtin an um a, indonaah an hrăt a, ram dang sipaihai an tukdol a. 35 Nuhmeihaiin an sunghai thi tah hung hring nawkhai chu an lo lawm a. A threnin suknomnatna an tuor a, thonawkna thra lem an chang theina dingin san suok khom an nuom nawh. 36 Threnkhatin sukdŭdăna le vuok an tuor a, threnkhat khaidiet inbuntirin lung inah an khum a. 37 Threnkhat lungin an dĕng hlum a, threnkhat thing ătnain an ăt bong a, threnkhat kawlhnâmin an săt hlum a, threnkhat beram le kêl vun silin an văkvăi a, sukdŭdaa umin, rethei takin an tuor tlok tlok a. 38 Chuong mihai ta ding chun khawvel hi umna tlâk a ni naw a, thlalĕra hai, tlânga hai, pûka hai, hnuoi khura hai an văkvăi hlak.