Suol ngaidamna thilhlan
10
1 Dan hi thil thra la hung um dinghai hlimthla chauh a ni a, a tak tak a la ni naw leiin, kum tina chawl loa hlànbiek pangngai an inhlân rophai hin ieng kong khomin a hung inhlàntuhai chu a sukfamkim thei nawh. 2 Sukfamkim thei chu ni sien, hlanbiek inhlàntuhai hi sukthienghlim ni vong tang an ta, suola inhrietna nei ta naw ni hai a, hlanbiek hi an bansan daih tah naw ding maw? 3 Chuong nêk hmanin hi hlànbiekna hin an suolzie kum tinin a’n hriet nontir lem hlak a nih. 4 Suol hi kelchal le bawngchal thisena sukbo ruol a ni nawh. 5 Chuleiin, khawvela Krista a hung lai khan hieng hin a lo hril chu:
“Hlanbiekna le thil inhlanhai,
I thil dit tak a ni naw a,
Ka ta dingin taksa,
I mi buotsaipek lem a;
6 Pumraw thil inhlânhai le
Suol ngaidamna thilhlânhai
I lawm bok nawh.
7 Chu phing leh hieng hin ka ti a:
“Aw Pathien, hi taka hin ka um,
Lekhaa ka chanchin inziek ang khan,
I ditzawng thaw dingin ka hung” tiin.
8 A hmasaa ‘Hlànbiekna hai, thilhlân hai, pumraw thilhlân le suol ta dinga thilhlân i dit naw a, i lawm bok nawh” ti hi Dan thupêk ang taka hlanbiekna inhlàn hlak kha a nih. 9 “Chu phing leh, i ditzawng thaw dingin ka hung” a ti hi hlànbiekna hmasa kha bànin Ama thisena hlànbiekna chun a hung thlăk tah tîna a nih. 10 Isu Krista chun Pathien ditzawng angin kumkhuoa dinga trum khatah a taksa inhlànin a mi sukthienghlim tah a nih.
11 Thiempu tinin kawla nisa suok zuia rong bawlin, ngir pumin hlànbiekna pangngai an inhlân rop hlak a, sienkhom chuong hlanbieknahai chun suol ieng tin khom a sukbo thei nawh. 12 Krista ruok chun chatuona dinga suol ngaidamna voi khat a’n hlàn hnungin, Pathien chang tieng a hang inthrung tah a. 13 Chu taka inthok chun a hmêlmahai ke sirsana a hmang hun ding chu a nghâk ta zing a. 14 Voi khat a’n hlànna khan a sukthienghlimhai chu chatuona dingin a sukfamkim tah a nih.
15 Thlarau Thienghlim khomin hieng ang hin a mi’n hriettir bok:
16 “Chu hnunga an kuoma thuthlung
Ka thlung ding chu hi a nih,
Lalpa chun a tih:
An lungrilah ka danhai sieng ka ta,
An ngaituonaah ziek bok ka tih”
tiin. Chu baka chun,
17 “An suolna le bawsietnahai,
Hre zing ta naw ningah”
a ti bok a.
18 Suolhai ngaidam a ni ta si chun, suol ngaidamna thilhlàn dang a ngai ta nawh.
Pathien hnai a thra
19 Chuleiin unauhai, Isu thisenin Hmun Thienghlimtaka ngam taka lŭt theina lampui thar le hring, 20 indâidànna puonzâr fe thlengna lampui chu, a mi hongpek tah a, chu puonzâr chu a taksa kha a nih. 21 Chuongchun, Pathien sungkuohai chun Thiempu Ropuitak ei nei leiin, 22 suol leia inthiem nawna lungril sawpfaipĕka umin, ei taksa khom tui thienghlima sawp faiin, lungril thienghlim tak le ringnaa inhriet chiengna nghet tak leh Pathien chu hnai ei tiu. 23 Beiseina thuring ei pom hi nghet takin chel tlat ei tiu, thu mi tiemtu chu a ringum si a. 24 Hmangaina hau ding le thil thra thaw dingin inchokphûr dan ngaituong ei tiu. 25 Threnkhatin inkhawm thlàdà an chǐng angin chîng ve naw inla, inkhawm taima dingin infui tuo lem ro; Ni chu a hung hnăi tah ti in hriet leiin infŭi tuo uor zuol sauh ei tiu.
26 Thutak hrietna ei nei ta hnung khoma ei suol lui pei chun suolhai la hmang thei hlanbiekna dang a um ta naw a, 27 rorêlna le ama dodâltuhai kăng hmang vong dinga Pathien lungsenna mei chok a hung thlàk ding hun thlaphâng taka nghăk ringot naw chu hma bâk dang ei nei nawh. 28 Mosie Dan bawsetuhai chu thuhretu pahni pathum thuin zangaina thrang dêr loa sukhlum an ni hlak a. 29 Pathien Naupa sir de a, ama sukthiengtu thuthlung thisen chu thienghlim loa ngai a, lunginsietna Thlarau chêksoltu chu ieng anga nasa nawkzuola hrem am ning a ta?
30 Phuba lăk chu ka chan a nih,
Keiman thungrul ka tih”
ti le
“Lalpan a mihai ngaituong a tih”
titu hi ei hriet si a.
31 Pathien hring kut thlăkna ni hi thil pangzatum tăwp a nih.
32 Kha hma, sunvara in um hnunga ngor taka inbeinaah thrang khaw a, rinumna nasa tak in tuor lai nihai kha hre zing hlak ro. 33 A chângin vantlang ennuoma siemin, hmusit le suknomnat in tuor a, a chângin chuong ang tuortuhai chu tran tlatin in tuorpui hlak a. 34 Kol buna intânghai chu in lainat a, in thil nei an làkpèk chêu khomin lawm takin in tuor a, thil thra lem le hlun lem chu in nei ti in hriet si a.
35 Chuongchun, in huoisenna kha inhmang naw unla, lukhâwng ropui tak la nei a tih. 36 Pathien ditzawng thaw zo hnunga a thil tiem dong ding chun teirei pei a ngai.
37 “A hung ding chu hung vak a tih,
Muongchâng naw nih;
38 Ka mi fel chu ringnan hring a tih;
A hnungtol ruok chun,
A chungah lawm naw ning.”
39 Eini ruok chu bohmang dinga intol kîrhai laia mi ei ni naw a, ringtu le sandam ni tahai laia mi ei ni lem si a.