Thiempu rongbawl dan
9
1 Thuthlung hmasaa khom khan rongbawl dan ding le rongbawlna ding Hmun Thienghlim, hnuoia mi chu ruot a nih. 2 Biekbuk an bawl a, a tontîra chun khawnvar siena dam, bei siena dawkan dam a um a, chu chu Hmun Thienghlim an tih. 3 Puonzar pahnina khêla chun biekbuka Hmun Thienghlim Tak an ti chu a um a. 4 Chu taka chun rimtui rawna rangkachak maicham dam le rangkachak tuia inluon Thuthlung Bawm a um a. Thuthlung Bawm sunga chun mana siena rangkachak bêl dam, Aron funghrol inder dam le thuthlung ziekna lung phek dam a um a. 5 Thuthlung Bawm chunga ropuina cherub umhai chun zangaina lalthrungpha chu thla an zàr khum a. Chuong thilhai chu tu hin a kip a kawiin ei hril hman nawh.6 Hienga iengkim rem fel a ni hnung hin thiempuhai chu biekbuk tontìra chun an thiempu sin thawin ni tin an lŭt hlak a. 7 A dottua ruok chu thiempu laltak chauh, kum khatah voi khat, thisen chawiin a lût hlak a, chu chu ama ta ding le mipuihaiin hre loa an thawsuolhai ngaidamna dingin a’n hlàn hlak. 8 Hieng an thil rem dana inthok hin biekbuk tontîr hi a la um sŭng chun Hmun Thienghlimtaka lŭt theina lampui chu a la’n hong hri nawh ti Thlarau Thienghlim chun a kawkhmu a nih. 9 Hieng thil hi tuta hun inentirna chauh a na, thilpêk le hlanbieknaa an thil inhlànhai chun a hung inhlàntu mipuihai sie le thra hrietna a sukfamkim thei nawh; 10 chuonghai chu fâk le dawn thil dam, tui hmanga inthien dan dam le taksa vong dan ding dam a na, siemtharna hun a tlung hma poa hmang dinga ti a ni chauh a nih.
11 Krista ruok chu thil thra tlung tah le la tlung mĕk dinga Thiempu laltak a hung ni khan, biekbuk ropui lem le thienghlim lem, mihriem kuta bawl ni lo, khawvela thilsiem ang khom ni lo chu a lût thleng a. 12 A thisen inhlàn khom chu kelchal le bawng tuoi thisen ni loin, ama thisen ngei a ni a, Hmun Thienghlima chun voi khat chauh lutin chatuona dingin tlanna chu a siem tah a nih. 13 Kelchal le bawngchal thisen le bawngla tuoi vâp thè hmana dan bawsietna leia taksa puo tienga inthieng nawna chu a sukthienghlim thei si chun, 14 Krista thisen lem chun a va sukthienghlim zo nasa ding de aw! Chatuon Thlarau zarah ama ngei chu Pathien kuoma hmêlhem lo thilhlàna dingin a’n pêk a, Pathien hring rong ei bawl theina dingin a thisen chun thina chauh intlun thei thilthaw trangkai lo laka inthokin ei sie le thra hrietna chu a sukthienghlim tah a nih.
15 Hi lei hin Krista chu thuthlung thar palai a na; thuthlung hmasa bawsietna laka inthoka mihai a hung intlan suok theina dingin a lo thi tah a, kohai chun chatuon ro hluo dinga tiem chu an chang tah a nih. 16 Thurosie khom hi a sietu a thi le thi naw fie hmasak a trûl hlak a; 17 a sietu a dam sung chun hmang thei a ni hri naw a, a thi hnung chaua hmang ding a nih. 18 Chuleiin, thuthlung hmasa khom kha thisena suknghet a ni kha. 19 Dan thupêk tinrêng Mosien mipui a hril lai khan, bawngchal tuoi thisen chu tui leh, sâpsen leh husawpa leh a lâk a, lekhabu ziel le mipui po po chu a thè a, 20 “Hi hi in zawm dinga Pathienin in kuoma a pĕk thuthlung suknghetna thisen a ni hi” tiin a’n sam a. 21 Chun, biekbuk le rongbawlna hmangruo po po khom chuong ang bokin thisen chun a thè a. 22 Dan thu ang chun iengkim deuthaw hi thisena sukthieng ding a nih; thisen insuo naw chun suol ngaidamna a um thei si nawh.
Suol ngaidamna Krista chu
23 Chuongchun, van thil angpui chauh hman chuonga sukthienghlim a trûl chun van thil tak takhai lem chu chuong nèka inhlànna thra lema sukthienghlim ding a ni hrim a nih. 24 Kuta bawl, Hmun Thienghlim, a tak angpuia chun Krista chu a lut naw a, vana khin a hang lŭt lem a, tu hin ei aiawin Pathien hmaah a hang ngǐr tah a nih. 25 Thiempu laltak chu mani thisen ni lo, ran thisen chawia kum tin Hmun Thienghlima a lût hlak angin, ama chu mani inhlàn non rop dingin a lût ve nawh. 26 Chuong ni naw sien, leilung insieng tira inthok khan voi tam tak tuor ta’ng a tih. Nisienlakhom, hun tawpa hin ama ngei inhlàna voi khat thilthua suol la hmang dingin a hung inlang tah a nih. 27 Mihriem ta dingin voi khat thi ruot a ni a, chu hnungah a chungthu rêlna um a tih. 28 Chuong ang bokin Krista khom mi tam tak suol la hmang dingin trum khat inhlàn a ni tah. Suol la hmang ding ni loin, ama lo nghaktuhai chu sandamnaa thruoi lût dingin, a hung nawk ding a nih.